ՍԻՐԵԼԻ ՄԱՍՆԱԳԻՏՈՒԹՅԱՄԲ՝ ՎԵՐԱԴԱՐՁ ՔԱՐՎԱՃԱՌ
Թամար ԳՐԻԳՈՐՅԱՆ
ք. Քարվաճառ
Քարվաճառցի Գայանե Մարգարյանն այս ուսումնական տարում ավարտել է Ստեփանակերտի Շառլ Ազնավուրի անվան պարարվեստի քոլեջի ՙՊարի մանկավարժություն՚ բաժինը։ Ուսումնառությունն ավարտելուց հետո Գայանեն որոշել է վերադառնալ ու ստացած գիտելիքը փոխանցել քարվաճառցի մանուկներին։
ՙԴպրոցական տարիներից Քարվաճառում պարի խմբակ էի հաճախում, այդ ժամանակվանից շատ եմ սիրել պարելը։ Մասնագիտություն ընտրելիս հաշվի էի առնում ոչ միայն իմ նախասիրությունը, այլև այն բանի գիտակցումը, որ Քարվաճառում պարի որակավորված մասնագետի կարիք կա։ Մտածեցի ինքս ձեռք բերել պարուսույցի մասնագիտությունը՚,- պատմում է Գայանեն։
Ուսումնառության տարիները քոլեջում Գայանեն արդյունավետ է համարում։ Պարարվեստի քոլեջ դիմելուց առաջ մտածել է բարձրագույն ուսումնական հաստատություն դիմելու մասին։ Հիմա վստահ է՝ եթե առանց նախասիրությունը հաշվի առնելու մասնագիտություն ընտրեր, հաստատ ափսոսալու էր։ ՙԵրբևէ չեմ ափսոսում, որ ընտրել եմ քոլեջը, այլ ոչ թե բարձրագույն ուսումնական հաստատությունը։ Կարող եմ ասել, որ քոլեջի մեր ուսուցիչներն ամեն ինչ անում էին, որ մենք լիարժեք գիտելիք, փորձ ստանանք ու լավ մասնագետներ դառնանք։ Թե որքանով է դա ինձ հաջողվել, պարզ կլինի, երբ արդեն աշխատանքի անցնեմ ու ինքս էլ իմ հերթին իմ ունեցած փորձն ու գիտելիքը փոխանցեմ տեղի երեխաներին՚,- ասում է Գայանեն ու հավելում, որ շատ է ցանկանում աշխատել հենց երեխաների հետ։
Քարվաճառ վերադառնալու որոշումը միանգամից ու հեշտ չի կայացվել։ ՙՍովորելուս տարիներին անընդհատ մտածում էի՝ վերադառնալ թե ոչ։ Եթե մնայի Ստեփանակերտում, աշխատանք կգտնեի, բայց գիտեմ, որ թե՜ Ստեփանակերտում, թե՜ շրջակա համայնքներում ավելի շատ մասնագետներ կան, իսկ մեր շրջանում մասնագետների կարիք ավելի շատ է զգացվում։ Եվ վստահ եմ, որ վերադառնալով՝ ճիշտ որոշում եմ կայացրել՚։
Պարային բազմաթիվ տարատեսակներից Գայանեին ամենից հոգեհարազատը ազգային պարերն են։ Արդեն մի քանի տարի է՝ պարում է Արցախի ՙՏնջրե՚ ավանդական երգի-պարի համույթում։ ՙՏնջրե՚ անվանումը կապված է տնջրի հայտնի ծառի հետ, որը խորհրդանշում է մայր հողում խորը արմատներ գցելը։ Մեր խումբը ևս ձգտում է ազգային երգի ու պարի հանդեպ խորը հետաքրքրության արմատներ գցել հատկապես պատանիների, երիտասարդների շրջանում։ Այդ նպատակով մեր համույթը ելույթներ է ունենում Ստեփանակերտին հարակից գյուղական մի շարք համայնքների դպրոցներում՝ ազգային երգն ու պարը ներկայացնելով աշակերտներին։ Առաջիկայում խումբը ծրագրում է Երևանում մասնակցել ՙԳութան՚ ազգագրական երգի-պարի փառատոնին։ Թեկուզ այժմ Քարվաճառում եմ, խմբից դուրս չեմ եկել և շարունակելու եմ ակտիվորեն մասնակցել համույթի ելույթներին՚,- ընդգծեց Գայանե Մարգարյանը։