Պ. ՆՈՒՅԿԻՆ. ՙԱՐՑԱԽՑԻՆ ԱԶԱՏ ԱՊՐԵԼՈՒ ԻՐԱՎՈՒՆՔ ՈՒՆԻ՚
Նվարդ ՍՈՂՈՄՈՆՅԱՆ
Հոկտեմբերի 2-ին ՙԳրիգոր Նարեկացի՚ համալսարանում տեղի ունեցավ հանդիպում Անդրեյ և Գալինա Նույկինների որդու՝ Պավել Նույկինի հետ։ Հյուրի մասին խոսք ասաց ԱՀ ԳՄ նախագահ, բանասիրական գիտությունների դոկտոր, պրոֆեսոր Վարդան Հակոբյանը, նշելով, որ Արցախյան շարժման տարիներին առաջադեմ մտավորականներ, գրողներ, արվեստագետներ, ովքեր արդարամիտ ու ճշմարտախոս էին, այցելեցին, բարձրացրին իրենց բողոքի ձայնը հանուն երկրամասի ազատության։
Ժամանակակիցները հիշում են նշանավոր գրող Անդրեյ Նույկինին, ով ղարաբաղյան շարժման տարիներին ռուս այլ գրողների, մտավորականների հետ եղել է Արցախում, ստեղծել ՙՂարաբաղ՚ (ԽՀԼԽ) կոմիտեն, իր գործունեությամբ, ստեղծագործություններով, հրապարակախոսությամբ արձագանքել է արցախցիների արդար պահանջին, անկախության, ազատության համար պայքարին։ Եվ եթե այսօր Արցախն անկախ է, ապա դրա մեջ նշանակալից է Անդրեյ և Գալինա Նույկինների ավանդը։ ԳՄ նախագահն ընդգծեց, որ որդին ծնողների արժանավոր զավակն է, գնում է նրանց ճանապարհով. Նույկինները գաղափարի, պայքարի, սկզբունքների մարդիկ են, և նրանք կենդանի են իրենց թողած գործով։ Նման մտավորականների միջոցով է մեր ձայնը լսելի դարձել աշխարհի առաջադեմ մարդկությանը,- ասաց Վ. Հակոբյանը, ապա Պավել Նույկինին հանձնեց ԱՀ գրողների միության անդամության տոմսը և հուշանվեր։
Գրականագետ, հրապարակախոս, արվեստաբան Պավել Նույկինի հետ ծանոթանալու առթիվ իր ուրախությունն արտահայտեց ԱՀ նախագահի օգնական, գրող, քաղաքագետ Աշոտ Բեգլարյանը, ասելով, որ նա բազմաթիվ գրականագիտական հրապարակումների հեղինակ է։ Ծնվել է Նովոսիբիրսկում։ Նրա ծնողները նշանավոր մտավորականներ էին, ովքեր դարձան Արցախյան շարժման համակիրներ, մարդու և ազգի իրավունքների պաշտպաններ։ Որդին՝ Պավելն անցյալ տարի առաջին անգամ եղել է Արցախում, պետական համալսարանում, ուր, հոր անունը կրող լսարանում, պահպանվում են գրքեր, փաստաթղթեր ծնողների` արցախյան գործունեության մասին։
Պավել Նույկինն իր խոսքում մասնավորապես կանգ առավ ռուս ժամանակակից գրական և գրականագիտական միջավայրի վրա, խոսեց ռուս գրականության զարգացման միտումների շուրջ։ Նա երախտագիտությամբ նշեց, որ վերջերս ՙԽՈՐՈոՈւրՍՌռ ՍցՐՖպՐ՚ ամսագրում լույս է տեսել Զորի Բալայանի հոդվածն Անդրեյ և Գալինա Նույկինների մասին։ Հանդեսի այդ համարը և հոր մի քանի գրքեր նա նվիրեց համալսարանին։ Ապա խոսեց այն մասին, որ վերակառուցման տարիներին աճել էր հետաքրքրությունը գրքերի, գրականության հանդեպ, որ հսկայական տպաքանակով գրքեր սպառվում էին ընթերցողների կողմից, որի մասին նույնը հիմա չի կարելի ասել։ Ընթերցողական հետաքրքրությունը մարել է, հասարակության մի փոքր մասն է, որ տեղյակ է գրականությանը, մշակույթին։ Բանախոսն անդրադարձավ նաև Անդրեյ Նույկինի գրական գործունեությանը։
ՙԵս զգացված եմ, որ Արցախում չեն մոռացել, սիրով են հիշում իմ ծնողներին։ Ազատ ապրելու իրավունք ունի արցախցին, հայը, որ ենթարկվել է ցեղասպանության,- ասաց Պավել Նույկինը, ապա ավելացրեց.-եթե չհաղթեր Արցախյան շարժումը, ապա դժվար կլիներ պատկերացնել, թե այսօր ժողովրդագրական ինչ վիճակ կլիներ տարածաշրջանում...՚։
Չմոռանանք նշել, որ Պավել Նույկինն այս օրերին Արցախի պետական համալսարանում հանդես է գալիս դասախոսություններով։