ԻՆՉՊԵՍ ԾԱՌՆ Է ԻՐ ԱՐՄԱՏՆԵՐՈՎ ԿԱՌՉԱԾ ՀԱՅՐԵՆԻ ՀՈՂԻՆ, ԱՅՆՊԵՍ ԷԼ ԱԶԳԸ` ՄՇԱԿՈՒՅԹԻՆ
Սուսաննա ԲԱԼԱՅԱՆ
Արդեն 6 տարի է ՙՏնջրե՚ ազգային երգի և պարի խումբը ծառայում է իր նպատակին` դարերի ընթացքում ձևավորված ազգային երգն ու պարը վերադարձնելով ներկայիս սերունդներին:
Նոյեմբերի 25-ին լրացավ խմբի գործունեության 6 տարին: Այդ կապակցությամբ Ստեփանակերտի Թ. Քամալյանի անվան պետական բժշկական քոլեջի դահլիճում տեղի ունեցավ տոնական միջոցառում, որով նաև տրվեց խմբի կողմից անցկացվող, երկար սպասված պարուսուցումների մեկնարկը: ՙՏնջրե՚-ին միացան Շուշիի ՙՆարեկացի՚ արվեստի միության և Նորագյուղի ՙՆշխար՚ ազգային երգի-պարի խմբերը: Ֆեյսբուքյան սոցցանցում տեղադրած հայտարարությանն արձագանքած` ազգային երգի և պարի սիրահարները նույնպես եկել էին միավորվելու նվիրյալներին:
Ինչպես տեղեկացրեց ՙՏնջրե՚ ազգային երգի և պարի խմբի ղեկավար Մանուկ Հարությունյանը, երբ 6 տարի առաջ պատրաստ էին հանդես գալ հանրության առջև, որոշվեց հանդես գալ հենց նոյեմբերի 25-ին` Արցախի հերոս, լեգենդար Մոնթե Մելքոնյանի ծննդյան օրը: Այստեղից էլ ավանդույթ դարձավ` ամեն տարի հենց նոյեմբերի 25-ին խումբը` այժմ ՙՏնջրե՚ անվանումով, պարուսուցումների, նոր համերգների շրջան է բացում: Մ. Հարությունյանը խորին հարգանքով է վերհիշում խմբի առաջին ղեկավար Սարգիս Պարսամյանին, ով երկու տարի առաջնորդում էր այսքան կարևոր առաքելությունը: Մ. Հարությունյանը խորին երախտագիտությամբ նշեց, որ խմբի երկու տարազները` Արցախ և Սեբաստիա տարածաշրջաններին բնորոշ, հաջողվեց ձեռքբերել ԱՀ մշակույթի, երիտասրադության հարցերի և զբոսաշրջության նախարարության աջակցությամբ: Ինչու՞ ՙԱրցախ՚ անվանումը փոխարինվեց ՙՏնջրե՚-ով: ՙԻնչպես ծառն է իր արմատներով կարչած հայրենի հողին, այնպես էլ ազգը` մշակույթին: Իսկ Արցախի հայտնի ծառը` տնջրեն, այս գաղափարի վառ խորհրդանիշն է՚,- համոզված է խմբի ղեկավարը:
Նշենք` վերջին երեք տարիների ընթացքում ՙԿարին՚ ավանդական երգի-պարի խմբի ղեկավար Գագիկ Գինոսյանի և ԱՀ կրթության, գիտության և սպորտի նախարարության կողմից կազմակերպած դասընթացների շնորհիվ այսօր Արցախի 35 հանրակրթական դպրոցներում դասավանդվում են ՙԱզգային պար՚ և ՙԱզգային երգ՚ առարկաները:
-Այո, գործընթացը դանդաղ է ընթանում,- համաձայնում է Մ. Հարությունյանը,- այն, այնուամենայնիվ, գոհացուցիչ կարելի է համարել: Այսօր մշակութային դաշտում կան շատ օտարաշունչ երևույթներ: Եվ փորձեր են արվում դրանք փոխադրել կենցաղ և, այսպես ասած, նոր ավանդույթներ հիմնել: Այս ամենն, անշուշտ, խոչընդոտում է մեր` դարերով կուտակված, բայց մոռացված, մշակույթը վերականգնելու և դրա կրողը դառնալու գործին: Անշուշտ, պայքարել պետք է զանազան ձևերով, ինչն էլ փորձում ենք անել: Գիտեք, որ խմբի անդամները այլ մասնագիտությունների տեր մարդիկ են: Բայց նրանք ազգային ավանդական երգ ու պարի նվիրյալներ են, և ամբողջ ազատ ժամանակը նվիրում են այս գործին: Եվ կրկին խորին երախտագիտությում եմ հայտնում ԱՀ մշակույթի, երիտասարդության հարցերի և զբոսաշրջության և Կրթության, գիտության և սպորտի նախարարություններին` համերգաշարերի անցկացմանն աջակցելու համար: Մեր նպատակն է դարերի ընթացքում ձևավորված տոնածիսական կյանքը բնորոշող ազգային երգն ու պարը վերադարձնել կենցաղ: Եվ այս նպատակն իրականացնելու գործում օգնում են թե՜ մեր համերգները, թե՜ խմբի կողմից կազմակերպված պարուսումները և թե՜ դպրոցներում դասավանդվող նշված առարկաները: Կարծում եմ` տարիների ընթացքում մենք կհասնենք մեր նպատակին, և այսօրվա հարսանիքներին, խնջույքներին կհնչեն մեր ազգային ավանդական ոգեշնչող երգերն ու պարերը: