ՄՇԱԿՈՒՅԹԻ ՈԼՈՐՏՈՒՄ ՊԱԿԱՍՈՒՄ ԵՆ ԱԶԳԱՅԻՆ ԳԱՂԱՓԱՐԱԽՈՍՈՒԹՅԱՆ ՍԿԶԲՈՒՆՔՆԵՐԸ
Սուսաննա ԲԱԼԱՅԱՆ
Հերթական տարին մոտենում է իր եզրագծին` ի մի բերելով տարվա ընթացքում տեղի ունեցածը, նշմարելով անելիքները: Իսկ մշակույթի ասպարեզում տարին աչքի ընկավ բազմաթիվ միջոցառումներով, որոնցից երկուսը` Թումանյանի և Կոմիտասի 150-ամյա հոբելյանները, լայնորեն նշվեց ողջ հանրապետությունով մեկ` շրջաններում, մշակութային օջախներում, հաստատություններում: Իրադաձային էր նաև այն, որ հայտնի հայ կոմպոզիտորներ Մարտին Վարդազարյանի, Տիգրան Մանսուրյանի, Ռոբերտ Ամիրխանյանի 80-ամյա հոբելյանները մեծ շուքով նշվեցին նաև Արցախում: Անշուշտ, մշակույթի այլ ոլորտներում ևս տեղի են ունեցել բազմաթիվ իրադարձություններ` ցուցահանդեսներ, ներկայացումներ, առաջնախաղեր, շնորհանդեսներ. կոնֆերանսներ և այլն:
Իրավամբ, 2019 թվականին հանրապետության մշակութային կյանքը բավականին հագեցած էր: Այսքանով հանդերձ, ի՞նչն էր պակասում մշակութային կյանքն ավելի հարւստ ու բովանդակալից դարձնելու գործընթացում: Եվ ոլորտի հայտնի գործիչներն ինչպիսի՞ն են տեսնում Արցախի մշակույթի զարգացման ուղիները:
Մեր զրուցակիցներն են Արցախի պետական երգչախմբի ղեկավար, ԱՀ արվեստի վարտակավոր գործիչ Նինա Գրիգորյանը և Շուշիի ՙՆարեկացի՚ արվեստի միության տնօրեն, ռեժիսոր Հայկ Պապյանը:
Նինա Գրիգորյանի համոզմամբ, մշակույթի ասպարեզում ունեցած հաջողություններով հանդերձ, պակասում են ամբողջովին մշակված ազգային գաղափարախոսության սկզբունքները: Հայ մշակույթի ուսուցանումը, կիրառումը չի դրվում մշակութային քաղաքականության հիմքում, ասում է Ն. Գրիգորյանը, հաշվի առնելով մշակութային դաստիարակություն իրականացնող համակարգի բոլոր օղակները` մանկապարտեզները, հանրակրթական և մասնագիտական դպրոցները, միջին և բարձրագույն ուսումնական հաստատությունները: ՙԵրբ այս տարի անց էինք կացնում համերգների շարք` նվիրված Կոմիտասի 150-ամյակին,-, պատմում է նա,- երկու եզրակացության եկանք: Նախ` երեխաները կոմիտասյան այդ երգերը գրեթե չգիտեին, և երկրորդ` որ նրանք, այնուամենայնիվ, մեծ հաճույքով ու հետաքրքրությամբ էին ունկնդրում երգչախմբի կատարումները, ուշադրությամբ լսում մեծ երաժշտագետի կյանքի և գործունեության դրվագները՚: Իսկ ինչո՞ւ դպրոցում սովորող մեր երեխաները վատ գիտեն Կոմիտասի երգերը, մանավանդ որ երգեցողության դասագրքում ծրագրով նախատեսված են դրանց իմացությունը,- հարց է բարձրաձայնում Ն. Գրիգորյանը: ՙՄանկապարտեզների միջոցառումներին երբ ներկա եմ լինում,- շարունակում է,- զարմանում ու հիասթափվում եմ: Ինչ օտար երաժշտություն ասես հնչում է այդ միջոցառումներին` բացի զուտ հայկական ազգային երաժշտությունից: Ինչո՞ւ է այդպես: Ո՞վ է խանգարում այդ դաստիարակներին, դասատուներին սովորեցնել երեխաներին մեր այդ աննման հարստությունը: Ցավոք, պատասխանը տխրեցնող է` մենք ինքներս՚:
Նինա Գրիգորյանը համաձայն է, որ իրենց կողմից կազմակերպված համերգներով, փաստորեն, միանում են մատաղ սերնդի դաստիարակման գործընթացին: Բայց ճիշտն այն է, ընդգծում է նա, որ դպրոցներում տված գիտելիքներն ու մշակութային կոլեկտիվների կողմից իրականացվող միջոցառումները պետք է իրար լրացնեն և համատեղ ուժերով հասնեն ընդհանուր նպատակին` մեր երեխաներին դաստիարակել հայկական ազգային մշակույթի խորը իմացությամբ: ՙՄենք հաշվի չենք առնում մի կարևոր հանգամանք. որ պետք է հենց մանուկ հասակում պատվաստել ազգային մշակույթի հիմունքները: Ինչո՞ւ չենք կիրառում Ճապոնիայի, Չինաստանի փորձը: Նրանք ազգային երաժշտությունը մանուկ հասակից են մանկապարտեզներում, դպրոցներում սովորեցնում՚:
Իսկ գուցե ինքնագործ խմբերին խրախուսելո՞վ կարելի է դաշտն ընդլայնել և հարստացնել: Անշուշտ, մեկնաբանում է նա, միայն պրոֆեսիոնալ կոլեկտիվների գործունեությամբ, թեկուզ քիչ չեն դրանք, դժվար է խնդիրը լուծել: Եվ այստեղ կարելի է խրախուսել ինքնագործ խմբերին` ներգրավվելով այս գործընթացի մեջ: Օրինակ, Եվրոպայում բազմաթիվ ինքնագործ խմբեր կան: Այսինքն, մարդիկ չեն սպասում, որ մեկը հրահանգ տա այս կամ այն բանն անելու: Նրանք հիմնում են խմբեր` նվագելու, ներկայացումներ դնելու, որովհետև նրանք ապրում են արվեստով, առանց իրար հետ այդ ամենի իրենց կյանքը չեն պատկերացնում: Հենց դրանով է որոշում, նման խմբերով է պայմանավորվում այդ երկրների մշակութային ընդհանուր զարգացման մակարդակը: ՙՄեր հասարակության շատ շրջաններում կարծիք եմ լսում, որ առաջին հերթին պետք է տնտեսությունը զարգացնել, հետո մյուս ոլորտները: Բոլորովին սխալ մոտեցում: Անհրաժեշտ է միաժամանակ բոլոր ասպարեզներում զարգացում ապահովել՚:
Անշուշտ, աշխատավարձերի բարձրացումը ոլորտի կարևորագույն խնդիրների լուծման մեխանիզմներից է, գտնում է Ն. Գրիգորյանը և ընդգծում, աշխատավարձերի բարձրացման հետ մեկտեղ պետք է պահանջվի կադրերի լիարժեք համապատասխանությունն իրենց մասնագիտությանը:
Իսկ ինչպիսին է տեսնում մեր զրուցակիցն ամանորյա տոների անցկացումը, ի՞նչն է պակասում այս հարցում: ՙԱնմիջականության պակասն եմ տեսնում,- անկեղծանում է մեր զրուցակիցը:- Տեսեք, նախկինում ամբողջ գյուղով էին Նոր տարին տոնում: Եկեք չկորցնենք մեր հին ու բարի ավանդույթները՚:
ՏԵՍՆԵԼ ՇՈՒՇԻՆ ԲԱՐԵԿԱՐԳՎԱԾ ՈՒ ՄՇԱԿՈՒՅԹՈՎ ԱՊՐՈՂ
Շուշիի ՙՆարեկացի՚ արվեստի միության տնօրեն, ռեժիսոր Հայկ Պապյանն արդեն 6 տարի է, ինչ ապրում է Արցախում և իր ուրույն ներդրումն ունի Արցախի մշակութային կյանքում:
Բազմափորձ մասնագետի կարծիքով, թե՜ մշակույթի ոլորտին, թե՜ մյուս ասպարեզներում հիմնարար մոտեցումներ են պակասում՝ շոշափելի արդյունքների հասնելու: ՙԽնդիրը ոչ թե մշակույթի ոլորտում գործող կոլեկտիվների թիվը մեծացնելն է, նորը ստեղծելն է, թեկուզ երևույթն ինքնին դրական է,- պարզաբանում է նա:- Քաղաքականություն մշակելիս պետք է գիտակցել, որ քանակը ոչինչ չի որոշում: Հիմնարար մոտեցում պետք է կիրառվի ցանկացած հարց լուծելիս, լինի դա մշակույթ, թե այլ ոլորտ: Պետք է գիտակցել, որ առանց ենթակառույցների` լավ ճանապարհների, մատչելի հասարակական սննդի կետերի, այլ կարևոր հարցերի, մշակութային խնդիրների լիարժեք լուծում սկզբունքորեն չի կարող լինել: Վերջերս շատ է խոսվում զբոսաշրջության զարգացման մասին: Բայց եթե զբոսաշրջիկը այցելում է մշակութային արժեք ունեցող վայրը, բայց դժվարությամբ է հասնում, քանի որ ճանապարհ չկա, գիշերելու տեղ չկա, այլ կարիքներ հոգալու հնարավորություն չկա, ապա ինչպե՞ս կարելի է մշակույթի զարգացման մասին խոսել՚:
Անշուշտ, համաձայնում է Հ. Պապյանը, լոկալ մասշտաբով որակով բաներ ստեղծվում են, դրական երևույթներ կան: Բայց բավարարվել դրանով պետք չէ, քանի որ չի վերածվում համատարած գործընթացի: Ոլորտը արդյունավետ կառավարելու համար, գտնում է միության տնօրենը, պետք է վերահսկողություն իրականացնել: Ճիշտ որոշում ընդունելը դեռ չի նշանակում, որ հարցը լուծվեց: Պետք է լիարժեք վերահսկողություն՝ գործը որակով ավարտին հասցնելու:
Ամենուրեք ինչ-որ գործընթացներ են ընթանում, համաձայնում է Հ. Պապյանը, բայց ո՞րն է արդյունքը, արդյո՞ք գոհացնում է այն մեզ: ՙԱսենք, տարվա կտրվածքով մի քանի մեծ համերգներ են կազմակերպվում, 400-500-տեղանոց դահլիճը լցնում հանդիսատեսով: Իսկ մյուս համերգնե՞րը, որ 100 հոգի էլ չեն հավաքվում, իսկ Շուշիում այդքան էլ չի ստացվում: Մի՞թե մեզ չի մտահոգում, որ մեր մեծ ու փոքր քաղաքների բնակիչները շատ հանգիստ կարող են ապրել առանց համերգների, ցուցահանդեսների, ներկայացումների: Մշակույթի նախարարության քաղաքականության վերջնական նպատակը որ՞ն է: Որ մեր ժողովուրդը կրթվի, արվեստների մեջ ինչ-որ բան հասկանա, որ մեր երեխաները գնան դպրոց` մի բան սովորելու: Դա՞ է նպատակը, թե՞ պարզապես ինչ-որ միջոցառումներ կազմակերպելը: Ի՞նչ է մեզ համար կարևորը մշակույթում: Ունե՞նք այս հարցի պատասխանը: Ի՞նչ գաղափարներով են ղեկավարվում մշակութային քաղաքականություն մշակելիս: Մասսայական մշակույթում գործողները հստակ ասում են` մենք անում ենք սա ու սա, և ստանում եկամուտ, մնացածը մեզ չի հետաքրքրում: Դա էլ է ճանապարհ: Անձամբ ես չեմ ընդունում այդ ճանապարհը, թեկուզ դա եկամտաբեր է՚:
Այնուամենայնիվ, ի՞նչ անել, որպեսզի արդյունքն ավելի մեծ ու շոշափելի լինի: Հ. Պապյանի կարծիքով` ավելի արդյունավետ կաշխատի փոքր մասշտաբի մշակութային օջախների ստեղծումը: ՙՀանրապետությունում կան մեծ դահլիճներ, բայց դրանք դժվար են լցվում: Իրականում փոքր երկրներում պահանջված են փոքր դահլիճները: Ո՞րն է կարևորը. որ մարդ տարին մեկ կամ երկու անգամ մի իրադարձային համերգի գնա, թե՞ ամեն շաբաթ, աշխատանքն ավարտելուց հետո իր ժամանակը հաճույքով անցկացնի մի փոքրիկ դահլիճում` սիրված երգեր, նվագ լսել, ներկայացում դիտել: Մեկ խոշոր դահլիճ ունենալով, մեկ մեծ համերգ կազմակերպելով մշակույթ չես զարգացնի: Գուցե սխալվում եմ, բայց ես այդպես եմ տեսնում: ՙՆարեկացի՚ արվեստի միությունում փորձեցինք խառնել իրար հետ մի քանի բան. փոքրիկ սրճարանը գործի դնելով, համերգների հետ մեկտեղ ստեղծեցինք հաճելի միջավայր, որտեղ մարդիկ հաճույքով կցանկանան ժամանակ անցկացնել՚:
Միության տնօրենը, սակայն, ափսոսանքով է նշում, որ բարդ է մշտապես դա անել, երբ նման երևույթը համընդհանուր բնույթ չի կրում: Նա համոզված է, որ Շուշին մեծ ներուժ ունի: ՙԵս պատկերացնում եմ, որ Շուշին կարող է մի շատ հետաքրքիր քաղաք դառնալ՝ հայկական միջավայրում եվրոպական քաղաք լինել: Այո, 19-րդ դարավերջում և 20-րդ դարասկզբում Շուշին եղել է եվրոպական քաղաք,- նկատում է նա:- Իսկ ի՞նչն է մեզ խանգարում կրկին հասցնել քաղաքն այդ մակարդակին: Հատկապես որ հին քաղաքն ինչ-որ չափ պահպանվել է: Կարելի է այն ամբողջությամբ վերականգնել և արվեստին տալ, որպեսզի արվեստի շունչն ապրի վերականգնված հին քաղաքում, ու դրանով զարկ տալ ամբողջ քաղաքի զարգացմանը՚: