ԻՄ ՄԱՆԿՈՒԹՅԱՆ ԱՄԱՆՈՐԸ
Անի ՄԱՆԳԱՍԱՐՅԱՆ
Մանկությունը հեքիաթ է։ Եղել է, չի եղել… Տարիներ անց հուշերը նոր գույներով են մեզ մատուցում այդ հեքիաթը։ Երբ անտեսանելի Ձմեռ պապի և ամանորյա հրաշքի հավատն ու սպասումն իրական էր առավել քան… երբևէ։ Զրուցակիցներս տարիների բարձունքից փորձել են վերհիշել իրենց մանկության անկրկնելի Ամանորը.
Սոֆյա ՍԱՐԳՍՅԱՆ (բանաստեղծուհի, արձակագիր, ՙՍտեփանակերտ՚ թերթի գլխավոր խմբագիր).-Ուրույն հեքիաթ էր իր մեջ պարունակում իմ մանկության Ամանորի սպասումը։ Մասնագիտությամբ մանկավարժ-մաթեմատիկ հայրիկիս անսպառ երևակայության շնորհիվ իմ յուրաքանչյուր Ամանոր անկրկնելի տոն էր դառնում։ Որպես կանոն, Ձմեռ պապը տարբեր դրսևորումներով էր միշտ ներկայանում ինձ, իհարկե, երբ ես քնած էի լինում, իսկ առավոտյան վայելում էի նրա այցելության բերկրանքը։ Ճերմակ բարձիս վրա հայտնաբերում էի, օրինակ, նրա գլխարկից պոկված մի աստղիկ, Ձյունանուշիկի ականջից պատահաբար ընկած ականջօղ։ Մի անգամ էլ արթնացա՝ քիթս էր ալ կարմիր։ Ասացին՝ Ձմեռ Պապն է քթիկիցդ քաշել։ Իսկ ամենաանմոռանալին այն էր, որ մի անգամ էլ Ձմեռ պապը բարձիս վրա մոռացել էր իր տաքուկ կարմիր ձեռնոցը՝ իրական հրաշք ինձ համար, ննջասենյակի, ճաշասենյակի հատակին էլ՝ մինչև տան մուտքը, տպված էին Ձմեռ պապի ձյունոտ ոտնահետքերը։ Ու, ամենակարևորը՝ Ձմեռ պապն ինձ համար բերել էր արևադարձային տարբեր մրգերով լի մի շողշողուն տոպրակ՝ ինձ համար մինչ այդ անծանոթ մրգերով։ Ես հայտնվել էի իրական հեքիաթում։
Հովիկ ԳԱՍՊԱՐՅԱՆ (գեղանկարիչ).– Ինչ ասեմ` Շուշիի մասին է լինելու։ Չնայած խորհրդային բանակում էլ եմ Նոր տարին դիմավորել, Երևանում ուսանելու տարիներին էլ, մեր գոյամարտի ժամանակ, Ստեփանակերտում... Բայց մանկությունն ուրիշ է... իսկ իմ մանկությունը Շուշին է՝ աշխարհի բոլոր քաղաքներից գեղեցկագույնը։
Այսօր ինչ խանութ մտնում ես, տոնածառ է ու խաղալիք։ Այն տարիներին չկար այսպիսի առատություն։ Իսկ տոնածառ մենք բերում էինք Շուշիի ձորերից, Հոնուտի կիրճից։ Ավելի ճիշտ կլիներ ասել՝ մենք տուն էինք հասցնում ինչ-որ ճյուղեր ու տանը՝ դրանք միացնելով ստանում էինք բավականին գեղեցիկ ու մեծ տոնածառ։ Ճիշտ է, խաղալիքները քիչ էին, բայց այնքա՛ն փայլփլուն էին, այնքա՛ն գունավոր, որ մենք այդ քչությունը համարյա չէինք նկատում։ Շողշողուն թղթերով կոնֆետներն եմ հիշում մեր տոնածառի ճյուղերին, փոքրիկ խնձորներ, մորս պատրաստած թխվածքաբլիթները ...
Մի անգամ էլ եղբայրս գնաց բերելու մեր տոնածառը՝ ընկերների հետ, առանց ինձ։ Ես հազիվ 7-8 տարեկան էի։ Սկսեց մթնել, բայց եղբայրս չկար։ Նման բան երբեք չէր եղել։ Ես անընդհատ նայում էի պատուհանից։ Ես վախենում էի։ Իսկ երբ հայրս ասաց, որ հնարավոր է գայլերը կերել են, սկսեցի հոնգուր-հոնգուր լաց լինել։
Հետո մենք հորս ու եղբորս հետ ճյուղ առ ճյուղ հավաքեցինք մեր տոնածառը, կախեցինք ունեցած խաղալիքներն ու կոնֆետները ... Ասեմ, որ նման տոնածառ մենք երբեք չէինք ունեցել, շատ գեղեցիկ էր, Շուշիում երևի ամենալավը։ Բայց ... տխուր բան պիտի ասեմ, մեր այդ գեղեցկուհին դեկտեմբերի 31-ին, Ամանորին հաշված ժամեր մնացած, փլվեց հատակին, փշուր-փշուր եղան բոլոր խաղալիքները ... ավարտվեց մեր հեքիաթը ... Եվ մենք Նոր տարին դիմավորեցինք առանց տոնածառի, արցունքոտ աչքերով...
Գոհար ԳԱՍՊԱՐՅԱՆ (Ստեփանակերտի հ. 10 հիմն. դպրոցի մանկավարժ).- Հորեղբայրս լայն ու ընդարձակ տուն ուներ, մեծ ու շքեղ տոնածառ։ Երկար տարիներ նրա ցանկությամբ բարեկամներով նոր տարին դիամվորում էինք մի հարկի տակ։ Ուրախ տոնախմբությունից հետո փոքրերով նստում և անհամբեր հաշվում էինք ժամացույցի սլաքների ձայնը՝ թիկ-թակ, թիկ-թակ... Ուր որ է մեզ հյուր կգա Ձմեռ պապը...
Երբ մի քիչ էլ մեծացանք, ես և հորեղբորս աղջիկը` Սուսաննան, գուցեև ժամանակից շուտ, բացահայտեցինք Ձմեռ պապի հեքիաթը, և մեզ վստահվեց արդեն իսկ ավանդույթ դարձած ամանորյա տոնախմբության ծրագիրը։ Կազմակերպիչը ես էի, երեխաների սպասված կախարդական պապիկը՝ քույրս։ Այնքա՛ն մանրակրկիտ ու սիրով էինք պատրաստվում... Եվ մեր քույր-եղբայրները դեռ երկար տարիներ հավատում էին Ձմեռ պապի գոյությանը...
Զինաիդա ԲԱԼԱՅԱՆ (ԱրՊՀ դասախոս, բ.գ.թ., դոցենտ).- Քիրսի պարի ու նրա հարևանությամբ սփռված թավ անտառների հետ է կապված իմ մանկության Ամանորների խորհրդաշատ հեքիաթ-վարքամատյանը՝ մանկութ հիշողությունների հրաշաթև պատառիկներով լի։ Ամենակարևոր խորհուրդը կապված էր զրումխտաթև տոնածառ ունենալու իղձի հետ։ Դա նշանակում էր, որ դպրոցի տնօրեն, մեզ բոլորիս շատ սիրելի ընկ. Աթայանի հրահանգով, Քիրսի անտառներից, նրա փեշերին քամիների շրթերին օրորվող եղևնի-եղրևանիներից ամենագրավիչն իր փոքրիկ քույրիկով պետք է գտնվեին ու մեծ դժվարությամբ հասցվեին գյուղ։ Հրահանգավորվածները դպրոցի բարձր դասարանի աշակերտներից էին, որոնց մեջ էր եղբայրս։ Ձմռան սառը բքին, անտառներից վերադարձող, եղրևանիներով ծանրաբեռ խմբին դիմավորում էինք մեծ անհամբերությամբ և անափ սիրով... Եվ այսպես, ամանորյա ամենախորհրդավոր հերոսն ու հրաշքն ինձ համար թավ անտառներից բերված եղևնին էր, որին զուգում էինք կենդանակերպ խաղալիք-պատկերներով, մրգերով, կոնֆետներով, ձեռքով պատրաստած շղթաներով, բամբակե ձյուն մաղելով զարդարված տոնածառին՝ տարեմուտի ժամը հնչելուն պես՝ երգով, պարով, ասմունքով նրանից խնդրելու մեր երազամոտ ցանկությունները... Իսկ Ձմեռ պապիկից մենք ստանում էինք արցախյան նշխարագործեր՝ տատիկների ձեռամբ հյուսված...
Նվարդ ԱԼԵՔՍԱՆՅԱՆ (լրագրող, արձակագիր).- Ամենից առաջ իմ մանկության Ամանորը հառնում է ճերմակ շքեղությամբ. ծնկահաս ձյունը շուրջբոլորը դարձրել է մաքրամաքուր և այդ դյութիչ տեսարանի համապատկերին լեռնային փոքրիկ գյուղի՝ իրար բակ մտած տներից՝ խաղաղ, շատ խաղաղ ծուխ է բարձրանում։ Առանց երդիկներից ելնող ծխաքուլաների՝ հարազատ տեսարանը կիսատ կլիներ...Իմ մանկության տարիներին անձյուն տարեմուտը վատ նշան էր, իսկ հիմա փոշեթաթախ ամանորներ ունենք և դրանից էլ մանկության հուշերն ավելի գունեղ են երևում։ Ձմեռ պապի գոյությանն, անշուշտ, հավատում էինք անվերապահորեն, սակայն չէր ստացվում արթուն դիմավորել նոր տարվա գալուստն ու տեսնել նրան։ Մանկան միամտությամբ շատ էինք մորմոքվում՝ ինքներս մեզ խոստանալով հաջորդ տարի ավելի աչքաբաց լինել։ Նվերները շատ հետաքրքիր էին, ու զարմանում էինք, թե յոթ սարի ետև ապրող Ձմեռ պապին ինչպես է հաջողվում տեղյակ լինել մեր ցանկություններին։ Եվ հրաշքի զգացումը մեզ տրամադրում էր Կաղանդ պապի խորհրդավոր ներկայությունը զգալ՝ տատ ու պապի, ծնողների բազմանշանակ հայացքի ներքո։ Թանկ մասունքի պես պահում եմ մանկության տոնածառի՝ մեր չարաճճի ու ավերիչ խաղերից փրկված խաղալիքներից, որոնց նմանը ցայսօր ես ոչ մի տեղ չեմ տեսել... Հետաքրքիր էր նաև տոնական սեղանի պատրաստությունը. կորկոտն ու թոնրի գաթան, կաթնահունցն անպակաս էին։ Պարտադիր այդ ուտեստներից պետք էր հարևաններին բաժին հանել՝ շնորհավորանքով ու բարեմաղթանքով։ Եվ միայն այսպես էին իմ մանկության մոլորակի բնակիչները գոհանում հին տարուց և Ամանորը դիմավորում միշտ նոր հաջողությունների ակնկալիքով ...