ՀԵՌԱՆԿԱՐՆԵՐ ԳՅՈՒՂԱՏՆՏԵՍՈՒԹՅԱՆ ԲՆԱԳԱՎԱՌՈՒՄ
Լուսինե ՇԱԴՅԱՆ
Ավարտված գյուղատնտեսական տարին Մեծ Թաղեր համայնքում բարեհաջող էր: Ինչպես տեղեկացանք Հադրութի շրջվարչակազմի աշխատակազմի գյուղատնտեսության, հողաշինարարության և հողօգտագործման բաժնի տարածքը սպասարկող գյուղատնտես Գարեգին Բադասյանից, տարին խոստումնալից էր ու հեռանկարային: Գյուղատնտեսական մշակաբույսերի ցանքատարածությունների ընդհանուր մակերեսը համայնքում կազմել է շուրջ 1400 հա՝ այդ թվում 644 հա սեփական վարելահող, 183 հա համայնքի վարձակալական հողեր, 520 հա պետպահուստ:
Շրջանում սովորաբար իրականացվում են գարնանացան և աշնանացան մշակաբույսերի ցանքսեր: Չորային եղանակներով պայմանավորված՝ ներկայում շրջանում շարունակվում է աշնանացան մշակաբույսերի ցանքսը: Գ. Բադասյանի ենթակայության տակ են գտնվում նաև հարակից Տող և Տումի համայնքները: Ինչպես նշում է գյուղատնտեսը, բոլոր աշխատանքները համակարգված են: Հարկ է նաև նշել, որ վերջին տարիներին գյուղատնտեսության ոլորտում իրականացվել են ծրագրեր, որոնք իրենց դրական ազդեցությունն են ունեցել ոլորտում: Արդեն 4 տարի է, շրջանում իրականացվում է գարնանացան մշակաբույսերի անհատույց տրամադրման ծրագիրը: Տրամադրվում են գարնանացան այնպիսի կուլտուրաներ, ինչպիսիք են արևածաղիկը, եգիպտացորենը, սիսեռը, սոյան, կորնգանը, առվույտը, հնդկացորենն ու կտավատը: Գյուղատնտեսի հավաստմամբ` առաջիկայում մշակության մեջ կդրվեն արևածաղկի, եգիպտացորենի, սիսեռի, սոյայի, կորնգայի սերմերը: Ի դեպ, շրջանում գարնանացան մշակաբույսերի ցանքսի համար հայտերն արդեն ներկայացված են համապատասխան մարմիններ: Գյուղատնտեսն ընդհանուր առմամբ գոհ է բարեփոխումներից, բայց նաև անկեղծանում է, ինչու չէ, նաև առաջարկում, հողն առավել պարարտ դարձնելու նպատակով նորից ծրագրի մեջ մտցնել սև ցելի գաղափարը, ինչին այսօր փոխարինելու է եկել գարնանացանը: Գյուղատնտեսը չի հերքում՝ գարնանացանն էլ գերազանց գաղափար է, բայց առավել լավ արդյունքների համար առաջարկում է այն համատեղել սև ցելի հետ:
Գ. Բադասյանի տեղեկատվությամբ` գյուղում հողագործությանն ու անասնապահությանը զուգահեռ զարգանում է նաև խաղողագործությունը: Համագյուղացի բարերար, մոսկվայաբնակ Պավել Քալաշյանի հովանավորությամբ 3 տարի առաջ Մեծ Թաղեր համայնքի տարածքում 35-40 հա խաղողի այգի է հիմնադրվել: Առաջին բերքահավաքը եղել է անցած սեպտեմբեր-հոկտեմբեր ամիսներին: Խաղողայգին ձգվում է նաև դեպի Տող գյուղ՝ Ջրաշխարհի տարածք: Մոտ 50 հա խաղողայգի կա արդեն հիմնադրված: Ըստ գյուղատնտեսի՝ խաղողագործությունն աշխատատար, սակայն եկամտաբեր ճյուղ է, և բարերարը նախատեսում է այն զարգացնել նաև շրջանի Ցոր գյուղում: Հատկանշական է նաև այն, որ այգեգործության զարգացման ծրագրով շրջանում մասամբ լուծվել է գործազրկության խնդիրը: Կին թե տղամարդ, ահել թե ջահել, բոլոր նրանք, ովքեր աշխատունակ են, կցված են այս աշխատանքին. հողի փխրեցում, տնկիների տնկում, ծերատում, ձևավորման աշխատանքներ....Գյուղացիները հաճույքով ու պատասխանատվությամբ շրջանում զարգացնում են այգեգործության այս ճյուղը: Շուտով այգիների հարակից տարածքում նույն բարերարի միջոցներով Մեծ Թաղեր համայնքում կբացվի նաև գինեգործարան: Շինարարական աշխատանքներն ընթացքի մեջ են: Այնպես որ, հադրութցիներն առաջիկայում կունենան տեղական արտադրության նորանմուշ գինի և հնարավորություն կունենան այն առաքել նաև արտերկիր: