ՊԵՏՆԱԽԱՐԱՐ Գ. ՄԱՐՏԻՐՈՍՅԱՆԻ ԳԼԽԱՎՈՐԱԾ ՊԱՏՎԻՐԱԿՈՒԹՅՈՒՆԸ ԵՐԵՎԱՆՈՒՄ ՀԱՆԴԻՊԵԼ Է ՀՀ ՓՈԽՎԱՐՉԱՊԵՏԻ ՊԱՇՏՈՆԱԿԱՏԱՐ ՄՀԵՐ ԳՐԻԳՈՐՅԱՆԻ ՀԵՏ
Արցախի Հանրապետության պետական նախարար Գրիգորի Մարտիրոսյանի գլխավորած պատվիրակությունը հոկտեմբերի 17-ին Երևանում հանդիպել է ՀՀ փոխվարչապետի պաշտոնակատար Մհեր Գրիգորյանի հետ։
Հանդիպման ընթացքում զրուցակիցները քննարկել են մի շարք ոլորտներում հայկական երկու պետությունների համագործակցությանը վերաբերող հարցեր։
Գրիգորի Մարտիրոսյանը, շնորհակալություն հայտնելով ընդունելության համար, կարևորել է հայկական երկու պետությունների միջև փորձի փոխանակումն ու նշել, որ Հայաստանում իրականացվող բարեփոխումները լավ օրինակ են ծառայում Արցախի համար։
Փոխվարչապետ Մհեր Գրիգորյանը ներկայացրել է իր համակարգման շրջանակներում գտնվող` սոցիալական և ֆինանսական ոլորտների բարեփոխումները և դրանց իրականացման ուղղությամբ տարվող քայլերը։
Հանդիպմանը Արցախից մասնակցում էին ֆինանսների նախարար Արթուր Հարությունյանը և աշխատանքի ու սոցիալական հարցերի նախարար Սամվել Ավանեսյանը։
ԱՀ պետական նախարարի աշխատակազմի տեղեկատվության
և հասարակայնության հետ կապերի բաժին