ԱԴՐԲԵՋԱՆԸ ԽՆԴՐՈՒՄ Է ՄԽԻԹԱՐՅԱՆԻՆ
Վահրամ ԱԹԱՆԵՍՅԱՆ
Մայիսի 29-ին Բաքվում ֆուտբոլի Եվրոպայի լիգայի եզրափակիչ՝ ՙՉելսի՚- ՙԱրսենալ՚ մրցախաղին ընդառաջ չեն դադարում խոսակցություններն այն մասին, թե կմասնակցի՞ այդ մարզական միջոցառմանն ՙԱրսենալի՚ կիսապաշտպան Հենրիխ Մխիթարյանը։
Բրիտանական ֆուտբոլային ակումբին մոտ կանգնած աղբյուրները տեղեկացրել են, որ Մխիթարյանը, անվտանգության նկատառումներից ելնելով, կմնա Լոնդոնում։ Հնարավոր է, նման որոշում կայացվել է՝ հաշվի առնելով այն հանգամանքը, որ Մխիթարյանի ներկայությունը կարող է բացասական մթնոլորտ ստեղծել ՙԱրսենալի՚ նկատմամբ առհասարակ՝ այդկերպ դժվարացնելով ակումբի խաղը։ Խնդիրը, երեւում է, Ադրբեջանի համար ձեռք է բերել խիստ սկզբունքային նշանակություն։ ՙՉելսի՚- ՙԱրսենալ՚ եզրափակիչ խաղի կապակցությամբ Բաքու են մեկնելու ոչ միայն մեծ թվով բրիտանացի մարզասերներ, այլեւ լրագրողներ եւ մեկնաբաններ։ Եւ եթե Մխիթարյանը չմասնակցի խաղին, ապա տեղեկատվական բոլոր հոսքերում այդ փաստն, անկասկած, ընդգծվելու է, դրա շուրջ արվելու են տարաբնույթ մեկնաբանություններ։ Եվրոպական մարզական աշխարհում, այդպիսով, ձեւավորվելու է Ադրբեջանի՝ որպես անհանդուրժողական եւ այլատյացությամբ վարակված երկրի կայուն վարկանիշ։
Մինչդեռ Բաքուն ֆուտբոլի Եվրոպայի լիգայի եզրափակիչ խաղը հյուրընկալելու համար ահռելի ջանքեր եւ միջոցներ է ծախսել հենց հակառակն ապացուցելու համար։ Մխիթարյանի Բաքու մեկնել-չմեկնելու խնդիրն այս իմաստով Ադրբեջանի համար ստանում է քաղաքական մեծ նշանակություն։ Իրավիճակը շտկելու համար Ալիեւի ռեժիմը գործի է դրել բոլոր հնարավորությունները։ Ադրբեջանցի դիվանագետները հետեւողական աշխատանք են տանում ՙԱրսենալի՚ պատասխանատուների հետ։ Երեւում է, հարցի կարգավորման հանձնարարություն է ստացել Մեծ Բրիտանիայում Ադրբեջանի դեսպանատունը։ Օրերս բրիտանական մամուլին հարցազրույց է տվել Մեծ Բրիտանիայում Ադրբեջանի արտակարգ եւ լիազոր դեսպան Թաիր Թաղիզադեն։ Նա Հենրիխ Մխիթարյանին բաց տեքստով խնդրել է կապ հաստատել իր հետ եւ ՙպաշտոնական երաշխիքներ ստանալ, որ Բաքվում նրա անվտանգությունը կապահովվի ամենաբարձր մակարդակով՚։
Ադրբեջանցի դիվանագետը ստիպված է եղել խոստովանել, որ Մխիթարյանին մուտքի արտոնագիր տալու որոշումը բավական ծանր է եղել։ Խնդիրն այն է, որ Մխիթարյանը ժամանակ առաջ այցելել է Արցախ։ Ադրբեջանում հաստատված ավանդույթի համաձայն՝ նրա անունն ընդգրկվել է ԱԳՆ ՙսեւ ցուցակում՚։ Դա նշանակում է, որ նրա համար սկզբունքայնորեն փակ է Ադրբեջան մուտքի հնարավորությունը։ Բայց ֆուտբոլի Եվրոպայի լիգայի եզրափակիչ խաղն այնքան կարեւոր մարզական իրադարձություն է, որ Ադրբեջանը հարկադրված է եղել մի կողմ թողնել քաղաքական որոշումը եւ արտոնել Մխիթարյանի մուտքը։
Մեծ Բրիտանիայում Ադրբեջանի դեսպանը, դիմելով Մխիթարյանին, ասել է, որ նրան վարձատրում են որպես ֆուտբոլիստի, այլ ոչ թե քաղաքական գործչի, հետեւաբար, նա պետք է ներկա գտնվի ՙՉելսի՚-ՙԱրսենալ՚ խաղին։ Ստացվում է, որ Ադրբեջանը Մխիթարյանին արդեն խնդրում է, որպեսզի նա մեկնի Բաքու եւ ՙԱրսենալի՚ կազմում մասնակցի այդ խաղին։ Հակառակ պարագայում Ադրբեջանի ակնկալած տոնը չի ստացվի՝ անկախ եզրափակիչ խաղի կազմակերպման մակարդակից եւ վերջնարդյունքից։ Մխիթարյանի բացակայությունը կդառնա առիթ, որպեսզի եվրոպական մարզաշխարհում Ադրբեջանը վարկանիշային կորուստներ ունենա։ Մանավանդ որ խաղին ընդառաջ՝ բրիտանական ԱԳՆ-ն արդեն իսկ որոշակի բացասական երանգներով հայտարարություններ է տարածել։ Խնդիրը ստացել է քաղաքական երանգավորում։
Մեծ Բրիտանիայում Ադրբեջանի դեսպան Թաղիզադեն տարակուսում է` ասելով, թե նման հիմքեր չկան։ Նրան զարմացրել է տեղեկությունը, որ ՙԱրսենալը՚ պահանջել է Բաքվում մեծացնել անվտանգության աշխատակիցների թիվը եւ շուրջօրյա վերահսկողություն հաստատել հյուրանոցի նկատմամբ։ Ավելի վաղ հայտնի էր դարձել, որ բրիտանական կողմը պատրաստվում է Բաքու գործուղել անվտանգության եւ ոստիկանական ուժեր, որպեսզի ավելի երաշխավորված լինի բրիտանացի ֆուտբոլիստների եւ մարզասերների անվտանգությունը։ Այս իրավիճակից միակ եզրակացությունն այն է, որ ՙՉելսի՚-ՙԱրսենալ՚ մրցախաղը Բաքվում անցկացնելու որոշումը հիմնավորված չէ։
Եւ եվրոպական մարզական կառույցները դրանից պետք է լրջագույն հետեւություններ անեն։ Ադրբեջանը դեռեւս չափազանց հեռու է հանդուրժողականությունից։ Այդ երկրում կարող են այլատյացության հողի վրա անակնկալներ մատուցել։ Եւ միանգամայն արդարացված կլինի ՙԱրսենալի՚ վերջնական որոշումը՝ Հենրիկ Մխիթարյանին Բաքու չտանելու մասին։ Ոչ ոք չի կարող երաշխավորել, որ Մխիթարյանի ներկայությունը չի վերածվի ՙԱրսենալի՚ դեմ տոտալ թշնամական վերաբերմունքի՝ կանխորոշելով մրցախաղի արդյունքը։ Թեեւ բացառված չէ, որ առանց Մխիթարյանի էլ ՙԱրսենալի՚ համար Բաքվում հանդես գալը ծանր կլինի։
;