ՎՐԱՑ-ԱԴՐԲԵՋԱՆԱԿԱՆ ՆՈՐ ՀԵՌԱՆԿԱ՞Ր
Վահրամ ԱԹԱՆԵՍՅԱՆ
Արտասահմանյան առաջին ուղեւորությունը Վրաստանի նորանշանակ վարչապետ Գախարիան կատարեց Ադրբեջան։ Այդ այցի շուրջ մամուլի տեղեկությունները չափազանց սուղ էին։ Զգացվում էր, որ Ադրբեջանի նախագահի հետ բանակցությունները դյուրին չէին, սկզբունքային բանավեճը մնում է օրակարգային։ Սահակաշվիլիի նախագահության շրջանում Թուրքիան եւ Ադրբեջանը Վրաստանում տնտեսական մեծ ներդրումներ են կատարել։ Իր հերթին Վրաստանը դեպի Արեւմուտք ադրբեջանական նավթի եւ գազի տարանցման հնարավորություններ է ընձեռել։
Բայց թուրք-ադրբեջանական ներդրումների սոցիալ-տնտեսական ազդեցության բումն անցել է, Վրաստանում այդպես էլ հրաշք տեղի չի ունեցել, իսկ քաղաքակրթական խնդիրներ առաջացել են։ Երկրի արեւմուտքում՝ Աջարիայում, մեծացել է թուրքական ներկայությունը, որը ենթամշակութային իրողություն դառնալու միտումներ ունի, իսկ հարավ-արեւելքում ծագել է այսպես կոչված` Բորչալուի համախտանիշը, որն սպառնում է առաջիկայում վերածվելու պարզ անջատողականության՝ այդ տեղաշրջանն Ադրբեջանին կցելու ծրագրավորմամբ։ ՙԲորչալուն կամուրջ է Բաքվի եւ Անկարայի միջեւ՚- բացահայտ գրում են Մառնեուլիում Բաքվի հրահանգավորմամբ եւ ֆինանսավորմամբ գործող էլեկտրոնային լրատվամիջոցները։
Հակասությունների կիզակետում է Դավիթ Գարեջի վանական համալիրի խնդիրը։ Իլհամ Ալիեւի հետ բանակցություններից հետո Վրաստանի վարչապետը լրագրողներին ասել է, որ այդ հարցում ՙձեռք են բերվել պայմանավորվածություններ, որոնք կիրականացվեն քայլ առ քայլ՚։ Առաջին արձագանքն այն էր, որ ադրբեջանցի սահմանապահներն արտոնել էին վրացի հոգեւորականների, հավատացյալների եւ զբոսաշրջիկների մուտքը երկու եկեղեցի, որոնք գտնվում են Ադրբեջանի վերահսկողության տարածքում։ Վրացական կողմում, սակայն, խնդիը դիտարկվում է ամբողջության մեջ՝ Դավիթ Գարեջին վրացական ինքնության նմուշ է եւ պետք է ամբողջովին գտնվի Վրաստանի իրավազորության ներքո։
Անցած շաբաթ հարցը դրվել է խորհրդարանական փակ լսումների, որին հրավիրվել է Վրաստանի արտաքին գործերի առաջին փոխնախարարը։ Նա է վանական համալիրի եւ սահմանազատման հարցերով ադրբեջանական կողմի հետ գլխավոր բանագնացը։ Ի՞նչ եզրակացության են եկել խորհրդարանականները՝ տեղեկություններ չկան։ Դատելով ադրբեջանական կողմի արձագանքներից, Բաքվում վրացի խորհրդարանականների մոտեցումը համարում են ՙոչ կառուցողական՚։ Իրավիճակին հավելյալ ինտրիգայնություն է հաղորդել Վրաց եկեղեցու կաթողիկոս-պատրիարքի դիմումն Ադրբեջանի հոգեւոր առաջնորդին։ Վրաց-ադրբեջանական սահմանազատման հարցերով բանավեճի ամբողջ ընթացքում առաջին անգամ է, որ Վրաց Ուղղափառ եկեղին խառնվում է քաղաքական հարցերի եւ հստակ պահանջ դնում, որ Դավիթ Գարեջի վանական համալիրն ամբողջովին անցնի Վրաստանի իրավազորության ներքո։ Ի՞նչ ընթացքի մեջ է հարցը, այդ մասին դիվանագիտական աղբյուրները երկդիմի պատասխան են տալիս այն իմաստով, որ քննարկումները շարունակվում են, կա փոխընդունելի լուծման հասնելու նպատակադրվածություն եւ այլն, բայց դրանից լարվածությունը չի թուլանում։
Կարելի է զգուշորեն ենթադրել, որ Ադրբեջանը նախնական կոշտ դիրքորոշումից փորձում է անցնել հանդուրժողականության մթնոլորտում քննարկումների եւ նախաձեռնել է հանրային կարծիքի ուսումնասիրություն։ Մասնավորապես՝ ՙԹուրան՚ գործակալությունն իր կայքէջում կազմակերպել է հարցում՝ առաջադրելով հետեւյալ տարբերակները՝ Ադրբեջանը վանական համալիրը հանձնում է Վրաստանին, սակայն կողմերը որոշում են իրականացնել համատեղ կառավարում։ Ամենաշատ ձայներ ստացել է վերջին տարբերակը։ Նման լուծում առաջարկել է Ադրբեջանի նախկին արտգործնախարար Զուլֆուգարովը, որը պաշտպանել է Ադրբեջանի նախագահին առընթեր ռազմավարական հետազոտությունների կենտրոնի ղեկավար Նամազովը։ Վստահաբար կարելի է ասել, որ գաղափարը նախապես հղացել են նախագահի աշխատակազմում կամ ԱԳՆ-ում, ապա փորձագետների միջոցով հանրայնացրել։ Առերեւույթ խիստ խաղաղասիրական թվացող այդ տարբերակը խորքում վրացական ինքնության նկատմամբ մարտահրավերներ է պարունակում։ Ադրբեջանը փաստացի առաջարկում է Դավիթ Գարեջի վանական համալիրը ճանաչել վրաց-ադրբեջանական միասնական պատմա-մշակութային ժառանգություն։
Միջազգային պրակտիկայում, երեւի, նման նախադեպ չկա, որովհետեւ մշակույթի հուշարձանը չի կարող միաժամանակ երկու քաղաքակրթության արդյունք լինել։ Մանավանդ որ Վրաստանը քրիստոնեական, Ադրբեջանը՝ մուսուլմանական երկիր է։ Բայց, որքան հնարավոր է դատել, Վրաստանը կարող է ընդառաջել այդ գաղափարին։ Դա թույլ կտա մի կողմից հանել հարաբերությունների սրությունը, մյուս կողմից` բավարարել հանրության սպասելիքները։ Իսկ թե վանական համալիրի համատեղ կառավարումը վրաց-ադրբեջանական ապագայի ինչ հեռանկար կհուշի՝ պարզ կդառնա սահմանազատման հարցը վերջնականապես կարգավորելուց հետո։