ՆՈՐ ՇԵՆՔ` ՀԱՅԿԱԶՅԱՆԻ ԴՊՐՈՑԻՆ
Զոհրաբ ԸՌՔՈՅԱՆ
ք. Բերձոր
Նոր ուսումնական տարում մեծ նվեր ստացան Քաշաթաղի շրջանի հարավային թևի Հայկազյան համայնքի Հայկազ Խաչատրյանի անվան միջնակարգ դպրոցի ուսուցիչներն ու աշակերտները։
Որոտան գետի ափին գտնվող գյուղական այս համայնքը կազմված է 3 բնակավայրից։ Համայնքային կրթօջախը գործում է 1999 թվականի փետրվարից և տեղակայված էր ոչ հարմար շենքում։ Այստեղ են սովորում նաև հարևան Որոտանի քաղաքային համայնքի դպրոցականները, ովքեր հիմնականում զինվորականների երեխաներ են։ ԱՀ կառավարության ֆինանսավորմամբ մի քանի տարի է, ինչ դպրոցական նոր շենք էր կառուցվում, ս.թ. օգոստոսի 31-ին էլ տեղի ունեցավ բացումը։
Նույն օրը տոնվեց նաև Որոտան քաղաքի և տարածքի բնակավայրերի ազատագրման 26-ամյակը։ Որոտան քաղաքում տոնական միջոցառումից հետո մասնակիցներն այցելեցին Հայկազյան և ներկա եղան դպրոցական շենքի բացման արարողությանը։ Դպրոցի աշակերտները երգ ու ասմունքով ողջունեցին ներկաներին։ Հիմնադիր տնօրեն Գևորգ Մարտիրոսյանն իր ելույթում անդրադարձավ կրթօջախի պատմությանը, շնորհակալություն հայտնեց Արցախի իշխանություններին նման նվեր իրենց մատուցելու համար։ Առանձնակի շնորհակալություն հայտնեց շինարարներին, ովքեր Ա. Քյարունցի ղեկավարությամբ գեղեցիկ ու լուսավոր դպրոց կառուցեցին։
Այնուհետև Որոտանի քաղաքային և Հայկազյան գյուղական համայնքների ղեկավարներ Վրույր Ասրյանն ու Արմեն Չոմոյանը կտրեցին մուտքի կարմիր ժապավենը։ Եռահարկ և ճարտարապետական յուրահատուկ ոճով կառուցված դպրոցն իր դռները բացեց աշակերտների, ուսուցիչների առջև։ Բացման արարողությանը ներկա էին Քաշաթաղի շրջվարչակազմի ղեկավարի տեղակալ Հովհաննես Սահակյանը, հարևան համայնքների ղեկավարներ, հյուրեր։ Ներկաները շրջեցին դպրոցում, ծանոթացան պայմաններին։ Գեղեցիկ ու լուսավոր սենյակներ, դահլիճ, նոր գույք. այս ամենը հնարավորություն կտա ուսումնական գործընթացը կատարել առավել արդյունավետ: Տնօրեն Գ. Մարտիրոսյանը տեղեկացրեց, որ այս ուստարում դպրոց կհաճախի 135 աշակերտ, որից 21-ը՝ առաջին դասարանցիներ։ 18 ուսուցիչներն ունեն մասնագիտական կրթություն։ Աշակերտներից մոտ 80-ը, այդ թվում նաև 20 առաջինդասարանցիները, գալիս են Որոտան քաղաքից՝ համայնքին հատկացված ավտոբուսով։