ԿԱՐԵՎՈՐ ՈՒ ՊԱՏԱՍԽԱՆԱՏՈՒ ԱՌԱՔԵԼՈՒԹՅՈՒՆ
Լաուրա ԳՐԻԳՈՐՅԱՆ
Հարցազրույց ԱՀ գլխավոր հարկադիր կատարող Սերգեյ ՄԱՄՈՒՆՑԻ հետ
- Պարոն Մամունց, Սեպտեմբերի 10-ին Արցախում նշվել է Հարկադիր կատարողի մասնագիտական օրը։ Ինչո՞ւ հատկապես այդ օրն ընտրվեց՝ որպես այդպիսին։ Տոնի կապակցությամբ ինչ-որ միջոցառումներ եղե՞լ են։
-Համաձայն ԼՂՀ կառավարության որոշման՝ 1999թ. օգոստոսի 13-ին արդարադատության պետական վարչության համակարգում ստեղծվել է դատական ակտերի հարկադիր կատարումն ապահովող վարչություն՝ նախկինում քաղաքային և շրջանային դատարաններին կից դատական կատարածուների փոխարեն, իսկ 2011թ.՝ կառավարության մարտի 21-ի որոշմամբ Սեպտեմբերի 10-ը նշվում է որպես հարկադիր կատարողի օր։
Մասնագիտական տոնի առթիվ տեղի է ունեցել հանդիսավոր միջոցառում, որին մասնակցել է նաև ԱՀ արդարադատության նախարար Ա.Դանիելյանը: Արդարադատության նախարարի և գլխավոր հարկադիր կատարողի հրամաններով ծառայողական պարտականություններն ու առաջադրանքները բարձր պատասխանատվությամբ ու բարեխղճորեն կատարելու համար ծառայության մի խումբ աշխատողներ արժանացել են հուշանվերների և շնորհակալագրերի:
- Իսկ որո՞նք են ԼՂՀ ԴԱՀԿ ծառայության նպատակներն ու գործառույթները։
-Դատական ակտերի հարկադիր կատարման ծառայությունն Արդարադատության նախարարության համակարգում գործող՝ նախարարության առանձնացված ստորաբաժանում է, որն ապահովում է ՙԴատական ակտերի հարկադիր կատարման մասին՚ ԼՂՀ օրենքով նախատեսված դատական ակտերի հարկադիր կատարումը։ Ծառայության նպատակը դատարանի կողմից քաղաքացիական, վարչական և քրեական գործերով կայացրած հարկադիր կատարման ենթակա վճիռների, դատավճիռների ու որոշումների ի կատար ածելն է՝ ՙԴԱՀԿ-ի մասին՚ ԼՂՀ օրենքով սահմանված կարգով, այն կամովին չկատարելու դեպքում:
Հարկադիր կատարման միջոցներն են՝ պարտապանի գույքի վրա բռնագանձում տարածելը՝ արգելանք դնելու և այն իրացնելու միջոցով, պարտապանի աշխատավարձի, կենսաթոշակի, կրթաթոշակի և այլ տեսակի եկամուտների վրա բռնագանձում տարածելը, այլ անձանց մոտ գտնվող պարտապանի դրամական գումարների և այլ գույքի վրա բռնագանձում տարածելը, կատարողական թերթում նշված որոշակի առարկաները պարտապանից առգրավելը և պահանջատիրոջը հանձնելը, նաև` կատարողական թերթի կատարումն ապահովող այլ միջոցներ:
Այսինքն՝ հարկադիր կատարումը պետական ծառայության հատուկ տեսակ է, որի գործունեության հիմքում ընկած են օրինականության, մարդու և քաղաքացու իրավունքներն ու ազատությունները, պատիվն ու արժանապատվությունը հարգելու, մարդասիրության ու հրապարակայնության սկզբունքների պահպանումը։ Նշված սկզբունքներից էլ բխում է քաղաքացիներին, պարտապաններին պարտավորեցնելը, որպեսզի դատարանի որոշման հիման վրա ի կատար ածեն դրանք՝ անկախ այն բանից` գույքայի՞ն, թե՞ ոչ գույքային բնույթի են այդ որոշումները։
-Վերջին 8 ամիսներին կատարողական վարույթներով ինչքա՞ն գումար է բռնագանձվել ԴԱՀԿ կողմից։ Ի՞նչ արդյունքներ են արձանագրվել նախորդ տարվա նույն ժամանակահատվածի համեմատությամբ։
- 2019թ. ութ ամիսների կտրվածքով կատարողական վարույթներով բռնագանձվել է մոտ 701,8 մլն դրամ, որը բաշխվել է ըստ , պետության, իրավաբանական անձանց և ֆիզիկական անձանց օգտին։ Ընդ որում՝ պետության օգտին՝ 40,9 մլն դրամ, ֆիզիկական անձանց ՝ 145,9 մլն դրամ, իրավաբանական անձանց օգտին՝ 515,1 մլն դրամ։ Նախորդ տարվա նույն ժամանակահատվածի համեմատ ընդհանուր բռնագանձումների թիվը նվազել է 3,7 տոկոսով, պետության օգտին բռնագանձված գումարներն աճել են 14,9 տոկոսով, ֆիզիկական անձանց օգտին՝ ավելի քան 4,5 անգամ՝ կազմելով 145,9 մլն դրամ։ Իրավաբանական անձանց օգտին բռնագանձված գումարը նվազել է 22,1 տոկոսով։ Նկատելի է այն փաստը, որ տարեցտարի ավելանում է կատարողական թերթերի քանակը. ութ ամսվա կտրվածքով ԴԱՀԿ-ն ստացել է շուրջ 6693 կատարողական թերթ։ Դրանցից յուրաքանչյուրում, պատկերացրեք, կա՜ պարտապան և կա՜ պահանջատեր, ինչը նշանակում է, որ ութ ամսվա ընթացքում մենք առնչվել ենք մի քանի հազար քաղաքացու հետ։ Սա ահռելի գործ է, հատկապես եթե նկատենք, որ այդ քաղաքացիների շարքում կան տարբեր բնավորությամբ ու տարբեր մակարդակի մարդիկ, ինչպես՝ կիրթ, համեստ, այնպես էլ օրենքը չըմբռնող անձինք։ Մենք փորձում ենք լեզու գտնել յուրաքանչյուրի հետ, տանել համապատասխան բացատրական աշխատանք։ Հիմնականում դժգոհություններ պահանջատերերի կողմից լինում են այն դեպքում, երբ տվյալ պարտապանը չունի ո՜չ գույք, ո՜չ եկամուտ, որպեսզի հնարավոր լինի մեր կողմից բռնագանձում տարածել։ Նման դեպքերում մենք ոչինչ անել չենք կարող։ Ամեն ինչ կատարվում է օրենքի սահմաններում։
- Իրականացվող աշխատանքի արդյունավետությունն ու որակը բարձրացնելու նպատակով ի՞նչ միջոցներ են ձեռնարկվում ծառայության աշխատողների կողմից։
- Ինչպես վերը նշեցի՝ տարեցտարի ավելանում է կատարողական թերթերի քանակը։ Դրանց կտրուկ աճի հետ կապված՝ բնականաբար աճել է նաև փաստաթղթաշրջանառությունը։ Եթե 2016թ. ծառայություն մուտք է գործել 5660 կատարողական թերթ, իսկ 2017թ.՝ 7989, ապա 2018թ. կատարողական թերթերի քանակը կազմել է 10149։ Մեր աշխատողները հետևողական աշխատանք են տանում անգամ այն դեպքում, երբ հարկադիր կատարողն առնչվում է խրթին հարցերի կամ խոչընդոտների հետ. անմիջապես վերադասը միջամտում է և տվյալ հարցը գտնում է իր լուծումը՝ օրենքով սահմանված կարգով։
Աշխատանքների որակն ու արդյունավետությունը համապատասխան մակարդակի վրա պահելու նպատակով անհրաժեշտ է լրացուցիչ միջոցներ ձեռնարկել։ Այսօր աշխատանքների մի մասն իրականացվում է էլեկտրոնային ծրագրերի օգտագործմամբ։ Բանակցություններ են տարվում փաստաթղթաշրջանառության մի մասը էլեկտրոնային եղանակով իրականացնելու համար։ Հնարավորությունների սահմանում զարգացվում է ծառայության տեխնիկական հագեցվածությունը։
- Ինչպիսի՞ն է համագործակցությունը հայաստանյան համանուն կառույցի հետ, հատկապես՝ մասնագիտական փորձի փոխանակման, ֆինանսատնտեսական և այլ առումներով։
- Շատ ջերմ հարաբերությունների մեջ ենք հայաստանյան մեր գործընկեր կառույցի հետ։ 2010թ. մարտի 26-ին ԼՂՀ և ՀՀ դատական ակտերի հարկադիր կատարումն ապահովող ծառայությունների միջև ստորագրվել է փոխըմբռնման հուշագիր՝ նպատակ ունենալով ստեղծել կողմերի միջև հիմքեր, համակարգել և իրականացնել համատեղ աշխատանքները։ 2011թ. հունիսի 29-ին նույն կառույցների միջև ստորագրվել է համաձայնագիր, որով կարգավորվում է փոխադարձ իրավական օգնությունը։ Իսկ 2018թ. սեպտեմբերի 11-ին ստորագրվել է լրացուցիչ համաձայնագիր, որի նպատակն է բարձրացնել դատական ակտերի հարկադիր կատարման օրենսդրական և իրավակիրառ մեխանիզմների արդյունավետությունը, պարբերաբար իրականացնել փոխադարձ հետաքրքրություն ներկայացնող տեղեկատվության քննարկում, իրականացնել փորձի փոխանակում և համագործակցության այլ ձևեր։ Լինում են դեպքեր, երբ կատարողական թերթը ՀՀ քաղաքացու է վերաբերում, ուստի նման դեպքերում գործն ուղարկում ենք հայաստանյան մեր գործընկեր կառույցին։ Նույնն էլ նրանց կողմից է կատարվում։ Բացի այդ, փոխադարձ այցելություններ ենք կատարում՝ փորձի փոխանակման, տարբեր միջոցառումների մասնակցելու նպատակով։
- Պարոն Մամունց, ԴԱՀԿ-ն ունի՞ անհրաժեշտ ներուժ՝ իր գործառույթները պատշաճ մակարդակով իրականացնելու համար։ Կարո՞ղ եք վստահաբար ասել՝ ԴԱՀԿ ինստիտուտը կայացել է Արցախում։
- Կադրերով ապահովված ենք. այսօրվա դրությամբ ծառայության հաստիքացուցակով նախատեսված է 48 աշխատող, Արցախի բոլոր շրջաններում գործում են բաժանմունքներ։ Աշխատակազմն ունի համապատասխան գիտելիքներ, մշտապես աշխատանքներ են տարվում նրանց մասնագիտական ունակությունները կատարելագործելու ուղղությամբ։ Հաշվի առնելով վերջին տարիներին գրանցված ցուցանիշներն ու արձանագրված դրական դինամիկան, միանշանակ կարելի է փաստել, որ դատական ակտերի հարկադիր կատարման ինստիտուտն Արցախում այլևս կայացած կառույց է, և որ ԴԱՀԿ ծառայությունն ի զորու է իրականացնել իր առջև դրված բոլոր խնդիրները։