ՙՀԵՌԱՆԿԱՐ՚-Ի ՀԵՌԱՆԿԱՐԱՅԻՆ ԾՐԱԳՐԵՐԸ
Անի ՄԱՆԳԱՍԱՐՅԱՆ
ՙՀեռանկար՚ հասարակական կազմակերպության գրասենյակը Ստեփանակերտում գործում է ս.թ. հոկտեմբերի 1-ից։ Նորաստեղծ կազմակերպությունը հավակնում է համախմբել Արցախի ստեղծարար ու նախաձեռնող երիտասարդությանը՝ նպաստելով նրանց շարունակական կրթությանը, մտահղացումների ու նախագծերի իրագործմանը։
Կազմակերպության գործավար Էրիկ Լալայանի հաղորդմամբ ՝ ակտիվ երիտասարդությանը համախմբող նման կառույց ստեղծելու մտահղացումն առաջացել է ընթացիկ տարվա ապրիլին, Դիլիջանում կազմակերպված թրեյնինգների ժամանակ։ Այս ընթացքում ՙՀեռանկար՚-ը հասցրել է մի շարք պահանջված ծրագրեր կյանքի կոչել: Կազմակերպության նախաձեռնությամբ արցախցի երիտասարդները մասնակցել են միջազգային, տնտեսագիտական կոնֆերանս-թրեյնինգի, համահայկական և տեղական ճամբարների, աջակցություն է ցուցաբերվել առաջադեմ ուսանողների, կազմակերպել երիտասարդական ծրագիր ՙԵրիտդուզ՚ և այլն։
-Այս ամենը լավ մեկնակետ է նոր մտահղացումների և առաջիկա ծրագրերի համար։ Իր ծրագրերի շրջանակում ՙՀեռանկար՚-ը մասնավորապես ձգտում է Արցախում նպաստել նաև ոչ ֆորմալ կրթության տարածմանը, քաղաքացիների իրավագիտակցության բարձրացմանն ու նախաձեռնողականության խթանմանը, ինչպես նաև այդ շրջանակներում աջակցություն ցուցաբերել երիտասարդության գաղափարներին ու նախագծերին,-մանրամասնել է Է. Լալայանը, հավելելով, որ կազմակերպությունն իր ծրագրում բավականին ընդգրկուն տեղ է հատկացրել կրթական նախագծերի աջակցմանը և ոչ միայն. ՙԸստ կանոնադրության` մեր գործունեությունն ընդգրկում է շուրջ 18 ոլորտ, որպեսզի կարողանանք աջակցել մեզ դիմողների մեծամասնությանը՚։
Խոսելով առաջիկա գործնական ծրագրերի մասին` ՀԿ գործավարը մասնավորապես տեղեկացրեց, որ նախատեսվում են անգլերենի ուսուցման անվճար դասընթացներ, քաղաքացիների իրավագիտակցության բարձրացմանը միտված թրեյնինգներ և հասարակական կազմակերպությունների աջակցության ծրագրերին դիմելու արդյունավետ ձևերի, ինչպես նաև ինքնակենսագրականը (CV) ճիշտ կազմելու վերաբերյալ դասընթաց։
-Բացի այդ, ձեռնամուխ կլինենք Մ. Մաշտոցի անվան հանրապետական գրադարանի գրքային ֆոնդի ցանկի էլեկտրոնային տարբերակի ստեղծմանը, որի շնորհիվ հնարավորություն կընձեռվի օնլայն տարբերակով ծանոթանալ այս կամ այն գրքի առկայությանը գրադարանում,- հավելեց Է. Լալայանը։
Խոսելով կազմակերպության ծրագրերի պահանջվածության մասին, մեր զրուցակիցը որպես օրինակ մասնավորապես, նշեց, որ ՙՀեռանկար՚-ի նախաձեռնած անգլերենի անվճար դասընթացներին մասնակցելու հայտադիմումների թվաքանակը գերազանցել է նախատեսվածը, ինչը հիմք է հանդիսացել դրանք ըստ փուլերի կազմակերպելու համար: