ՎԵՐՍԿՍՎԵԼ ԵՆ ԳՐԻՊԻ ԵՎ ՍՈՒՐ ՇՆՉԱՌԱԿԱՆ ՎԱՐԱԿՆԵՐԻ ՄՇՏԱԴԻՏԱՐԿՈՒՄՆԵՐԸ
Զարինե ՄԱՅԻԼՅԱՆ
Գրիպի և սուր շնչառական վարակների շրջանին ընդառաջ նոյեմբերի 1-ից ՀՀ-ում և ԱՀ-ում վերսկսվել են դիտարկումները։ Հետևողական և կանխարգելիչ աշխատանքներ կատարելու նպատակով գրիպի և վերին շնչուղիների հիվանդությունների հերթական մշտադիտարկման տվյալները հանրապետության բուժհիմնարկները հաղորդում են ԱՀ առողջապահության նախարարության համաճարակաբանության և հիգիենայի կենտրոն, իսկ վերջինս՝ պետական հիգիենիկ և հակահամաճարակային տեսչություն։
ՀՀ առողջապահության նախարարության հիվանդությունների վերահսկման և կանխարգելման կենտրոնի և ԱՀ վերոնշյալ կառույցների մասնագետների մշտադիտարկումներով՝ 2019 թվականի հոկտեմբեր ամսին և նոյեմբերի առաջին կեսին արձանագրված սուր շնչառական վարակների հիվանդացության ցուցանիշը 2018 թվականի այդ ժամանակահատվածի համեմատ գտնվում է նույն մակարդակի վրա։
ԱՀ ԱՆ պետական հիգիենիկ և հակահամաճարակային տեսչության պետ Օֆելյա Հարությունյանի տեղեկատվությամբ՝ հանրապետությունում համաճարակաբանական իրավիճակը լարված չէ, սակայն Արցախի Հանրապետության առողջապահության նախարարի մի շարք հրահանգներով հանրապետությունում սեզոնային գրիպի և սուր շնչառական վարակիչ հիվանդությունների առումով կազմակերպվում են վերահսկողական և կանխարգելիչ միջոցառումներ։
Մեր զրուցակցի պարզաբանմամբ՝ նախադպրոցական և հանրակրթական հաստատությունների պատասխանատուներին հրահանգվել է տեղերում պահպանել անհրաժեշտ ջերմային ռեժիմ և սահմանել վերահսկողություն գրիպի և սուր շնչառական վարակների կանխարգելման առումով: Մասնագետները փաստում են, որ չնայած հիվանդացության ընդհանուր մակարդակը ցածր է, այնուամենայնիվ, հիվանդացողների գերակշիռ մասը մինչև 4 տարեկան երեխաներն են, ուստի հատկապես նախադպրոցական հաստատություններում պետք է խստորեն հետևեն կանխարգելիչ միջոցառումներին։ Ախտահանման ռեժիմը պահպանելու նպատակով նախադպրոցական, հանրակրթական բոլոր հաստատությունները, բուժհիմնարկներն ապահովված են անհրաժեշտ դեղորայքով և ախտահանիչ նյութերով։
Լաբորատոր հետազոտության արդյունքների համաձայն, ներկայումս շրջանառվում են շնչառական վիրուսների հարուցիչներ՝ պարագրիպ, ռինովիրուս, բոկավիրուս և այլն։ Սուր շնչառական վարակներով և գրիպով չհիվանդանալու, ինչպես նաև հետգրիպային բարդություններից խուսափելու նպատակով՝ ՀՀ և ԱՀ առողջապահության նախարարությունները հորդորում են պահպանել հիգիենայի տարրական կանոնները, պահել հազալու և փռշտալու վարվելակարգերը, հնարավորինս չշփվել գրիպանման ախտանշաններ ունեցող անձանց հետ։ Անհրաժեշտ է հագնվել եղանակին համապատասխան, սնվել ու քնել լիարժեք, հաճախակի օդափոխել փակ տարածքները։
Հաշվի առնելով գրիպի և սուր շնչառական վարակների փոխանցման օդակաթիլային մեխանիզմը՝ ԱՀ առողջապահության նախարարության պետական հիգիենիկ և հակահամաճարակային տեսչության պետը հորդորում է, որ բարձր ջերմության, հազի, մկանացավի, գլխացավի, հոդացավի, հարբուխի և այլ նշանների դեպքում պետք է մնալ տանը և պահպանել անկողնային ռեժիմ, չզբաղվել ինքնաբուժմամբ, խմել հնարավորինս շատ հեղուկներ, անհարկի չօգտագործել հակաբիոտիկներ, որովհետև դրանք ցուցված չեն գրիպի բուժման համար, այլ դիմել բժշկի, հետևել նրա խորհուրդներին։ Հատկապես տարեցները, ովքեր տառապում են քրոնիկ հիվանդություններով, հղի կանայք և երեխաները հիվանդության առաջին իսկ նշանների դեպքում պետք է դիմեն բժշկի, քանի որ հետգրիպային բարդություններ կարող են լինել գրիպի ցանկացած տեսակի և ենթատեսակի դեպքում։ Մասնագետները զգուշացնում են, որ հիվանդ վիճակում չի թույլատրվում այցելել ուսումնական հաստատություններ, աշխատանքի, հասարակական վայրեր, զանգվածային միջոցառումների, որպեսզի հիվանդության տարածում ու նոր դեպքեր չլինեն։
ԱՀ առողջապահության նախարարությունը կշարունակի դիտարկումն ու վերահսկողությունը։
;