ՅԱԼԹԱՅԻ Ս. ՀՌԻՓՍԻՄԵ ԵԿԵՂԵՑԻՆ՝ ՃԱՐՏԱՐԱՊԵՏԱԿԱՆ ԳԼՈՒԽԳՈՐԾՈՑ
Հայ մեծանուն նկարիչ Վարդգես Սուրենյանցի կյանքն անքակտելիորեն կապված էր Ղրիմի հետ։ Առաջին անգամ թերակղզում նա եղել էր դեռ մանկության տարիներին։ Այս երկրամասն էլ հանդիսացավ նկարչի կյանքի վերջին հանգրվանը։
Վարդգես Հակոբի Սուրենյանցը ծնվել է 1860թ. Ախալցխայում՝ հոգևորականի ընտանիքում, ով կրոնի պատմություն էր դասավանդում։ Երբ ապագա նկարիչը յոթ տարեկան էր, հայրը հոգևոր ծառայության նշանակվեց Սիմֆերոպոլում։ Այստեղ Սուրենյանցները ծանոթություն են հաստատում Հովհաննես Այվազովսկու հետ: Մի առիթով նրանք միասին այցելում են Բախչիսարայ՝ Ղրիմի խանության նախկին մայրաքաղաքը։ Հետագայում Սուրենյանցը 1896-1899թթ. նկարազարդում է Ալեքսանդր Պուշկինի ՙԲախչիսարայի շատրվանը՚ պոեմը։ Նկարների հիմնական մասը կատարվել է բնօրինակից` Բախչիսարայում, որտեղ նկարիչը մի քանի ամիս է անցկացրել։
Վարդգես Սուրենյանցի ստեղծագործական ուղին ավարտվում է իր համար կարևոր՝ Յալթայում ապրած շրջանով։ 1909-1917թթ. Յալթայում կառուցվում է իր վեհաշուք գեղեցկությամբ ապշեցնող Ս. Հռիփսիմե եկեղեցին` հայտնի որպես Ղրիմի հայ ճարտարապետության գլուխգործոցներից ու թերակղզու հարավային ափում գտնվող ճարտարապետական կոթողներից մեկը։ Ս. Հռիփսիմե եկեղեցին կառուցվել է հայազգի նավթային մագնատ Պողոս Տեր-Ղուկասյանի միջոցներով՝ ճարտարապետ Գաբրիել Տեր-Միքայելյանի նախագծով, ով սերտորեն համագործակցում էր Վարդգես Սուրենյանցի հետ։ Սուրենյանցն զբաղվել է եկեղեցու ներքին հարդարանքի ձևավորմամբ, եկեղեցին զարդարող որմնանկարները պատկանում են նրա վրձնին:
Յալթայի հայոց եկեղեցին հիմնադրվել է Տեր-Ղուկասյանի՝ կյանքից անժամանակ հեռացած դստեր` Հռիփսիմեի հիշատակին։ Նա թաղված է եկեղեցուն կից ընտանեական դամբարանում:
Գլխավոր մուտքի ճակատային մասում կա գրառում. ՙԻ հիշատակ այս եկեղեցու բարերար Պողոս Տեր-Ղուկասյանի, որը կառուցեց այս հոյակերտ տաճարը վաղաժամ հեռացած աղջկա հիշատակին՝ 1909-1917թթ.՚։ Որոշ ժամանակ անց այստեղ թաղվում են բարերարի երկու որդիները ևս։
Եկեղեցու համար որպես նախատիպ է ընտրվել Էջմիածնի Ս. Հռիփսիմե եկեղեցին (7-րդ դար), իսկ որպես շինանյութ ծառայել է ֆորոսյան հրաբխային տուֆը։ Եկեղեցական համալիրը, որը համահունչ կերպով ներգծվում է շրջակա միջավայրի հետ, գտնվում է բարձրադիր բլրի վրա։
Ուղիղ հարյուր աստիճաններից կազմված հոյակերտ ու լայն շքամուտքը տանում է դեպի եկեղեցու հարավային ճակատամաս։ Աստիճանների երկայնքով սլացիկ շարքերով վեր են խոյանում նոճիները։ Աստիճաններով բարձրանալիս հետզհետե բացվում է գմբեթավոր եկեղեցու տեսարանն իր ողջ հմայքով՝ վեցանիստ կոնաձև գմբեթը՝ շքեղ գմբեթակիր թմբուկի վրա, բաց դահլիճը` երեք կամարակապ սրահներով, նրբագեղ պատշգամբը, գմբեթավոր զանգակատունը։
Էսքիզների վրա մի քանի տարի աշխատելուց հետո 1917թ. նկարիչ Տարագրոս Տեր-Վարդանյանի հետ Սուրենյանցը գալիս է Յալթա և, բնակվելով եկեղեցուն հարակից տներից մեկում, անցնում է եկեղեցու հարդարման աշխատանքներին։ Սուրենյանցի մտահղացումների իրագործմանը խանգարում են երկրում սկիզբ առած տնտեսական ցնցումները։ Նկարիչը զրկվում է գլխավոր պատվիրատուի նյութական աջակցությունից, ով տեղափոխվում է Ֆրանսիա։
1918թ. ձմռանը Վարդգես Սուրենյանցը ծանր հիվանդանում է։ Նկարիչը ձևավորում էր եկեղեցու գմբեթը և ղեկավարում հարդարման աշխատանքները՝ ընդհուպ մինչև 1920 թվականը, իսկ 1921-ին նա մահանում է։ Բարեբախտաբար, պահպանվում են մնացած նկարների էսքիզները, և 2007թ. նկարիչ Աշոտ Ներսեսյանը հաջողությամբ ավարտին է հասցնում այդ աշխատանքները։ Եկեղեցու գմբեթն ու պատերը ծածկված են բուսանախշերով՝ սպիտակ ու կապույտ ոճավորված ծաղիկներով, ոսկեզօծ դետալներով։ Վարդգես Սուրենյանցը թաղված է Ս. Հռփսիմե եկեղեցու պատերի մոտ։ Հարավային ճակատի առաջ գտնվող հրապարակում են նրա գերեզմանն ու դիմաքանդակը։
www.armmuseum. ru