ԳՅՈՒՂԸ ՁՅԱՆ ՏԱԿ ՈՒ ՁՅԱՆ ՎՐԱ…
ՆՈՐԵԿ ԳԱՍՊԱՐՅԱՆ
Կարծեմ 1971-ին էր։ Տարեմուտին։ Ծնողներս որոշեցին Շուշիից ինձ ուղարկել գյուղ, որպեսզի գունավորեմ պապիս ու տատիս Ամանորը։ Ես ցնծում էի։ Հիշում եմ մորս ասածը՝ մարդիկ կուրախանան։
Գյուղը ձյան տակ էր։ Ամեն ինչ ճերմակ-ճերմա՛կ էր։ Նույնիսկ՝ ծխնելույզներից բարձրացող, տանիքներին ծուլորեն տարածվող կապտավուն ծուխը։ Հիշում եմ նաև գյուղամիջում հավաքված ծերունիներին։ Այնքա՛ն հարազատ էին, այնքա՛ն անհոգ։ Մեկի արտաբերած մի քանի բառն էլ պինդ-պինդ փաթաթվեց ինձ.
-Մատաղ ինիմ, հինչ լավըս ըրալ, վեր եկալս, դեդոն-բաբոն կուրխանան…
Իհարկե, ես համարյա ոչինչ չէի հասկանում, թեպետ ամեն անգամ, երբ գյուղ էի գնում, տատս մրմնջում էր՝ մատաղինիմ, մին քանե օր էլ ավիլ կապրիմ…
Ճիշտ է, Շուշին էլ էր ձյան տակ, բայց գյուղում այդ ձյունը մի տեսակ ուրիշ էր, ավելի ճերմակ, ավելի շատ: Շուշիում, օրինակի համար, այն կապտավուն էր, խանգարող, մրսեցնող…
-Աշոտ, էն վերցակը մորթե…,-տատս էլի խառնվել էր, -մատաղինիմ, պեր, պեր էդ ղաշանգ ճըկատադ մեհետ էլ պաչիմ… Գոնե մին էրկու խաղալիք կախ տայինք…
Իսկական իրարանցում էր։ Պապս անիմաստ ներսուդուրս էր անում։
-Ա՛յ մարդ, առանց տենակ էդ շտե՞ղս քինում…
Ինչքան հիշում եմ, երբ պատրաստվում էինք վայելել մեր տոնական ընթրիքը, պապս ասաց.
-Ծունա կյամ… անդարըդ թուղլականչի էքուց պատառ գործ անիմ…
Իսկ սեղանի շուրջ, վառարանի կողքին, պապս էր, տատս ու ես… Եվ պապիս կարճ, մի քանի բառից կազմված բաժակաճառը.
-Աշխարհս խաղաղ ինի… մնացածը՝ հեչ…
Արթնացա, պատկերացնո՞ւմ եք, հեռախոսազանգից։ Մայրս էր, զանգել էր շնորհավորելու մեր Նոր տարին։ Հետո էլ հայրս մի քանի բառ ուղարկեց Շուշիից՝ էս անդարը կտրում չի, թա տեսնամ հինչում անում… Ու տատիս պատասխանը.
-Էնա քու հար էլ տի… խոխին անա քաշվումա, թա չէ ուշունց էլ կտա…
Իսկ ձյունը շարունակում էր փորձության ենթարկել պապիս համբերությունը։ Ճերմակի վրա միայն երկրագույն ծուխ էր, ձյան տակ՝ ուշունց տվող մի ամբողջ գյուղ` համեստ, չզարդարված սեղաններով, անխաղալիք տներով… կարծես, անհոգ, առանց ավելորդ շտապողականության…
-Հիսուս Քրիստոս… Հայր մեր, որ երկնքում ես…
Հետո… իմ նոր տարիները Շուշիում էին, Ստեփանակերտում, Սովետերկրի տարբեր քաղաքներում, կրկին Ստեփանակերտում, Երևանում… պատերազմի տարիներին, թվացյալ խաղաղ ժամանակներում, տխուր և ուրախ…
Ծնողներիս, հարազատներիս, զավակներիս, ընկերներիս ու մտերիմներիս հետ… անկեղծ մաղթանքով, գեղեցիկ խոսքով ու անընդհատ ծանրացող սեղաններով, հաճախ՝ անիմաստ նվերներով ու հյուրընկալությամբ… վազում էին բոլորը՝ բանվոր, գյուղացի, ինտելիգենտ… ունևոր ու չունևոր… Ամբողջ ժողովրդով վազքի մեջ էինք… Բայց էլի ինչ-որ բան պակաս էր, ինչ-որ բան չէր հերիքում… Պարապ օրերի շարանը ոչ մեկին չէր մտահոգում… Անընդհատ թափվող ձյանը ոչ մեկն ուշունց չէր տալիս…
Տարին ինչպես դիմավորես, այնպես էլ… և բոլորը հավատում էին այդ հորինվածքին, այդ ստին… Նոր տարվա այդ չեղած, մոգոնած հրաշքին… և Ձմեռ պապն էլ արդեն մեկը չէր, ոչ էլ՝ երկուսը կամ՝ երեքը… ամբողջ քաղաքը Ձմեռ պապ էր, կարմիր, կապույտ… նիհար, չաղլիկ, հազիվ շարժվող, ցատկոտող… ամենուր այդ անհասկանալի, փնթի, աննվեր Ձմեռ պապիկներն էին…
Ամեն տարի հեքիաթն ավելի ու ավելի էր հեռանում… Հեքիաթը ավարտվում էր, իսկ նորը հորինող չկար… ձյան տակ ապրող գյուղ, ձյան վրա՝ երկնագույն ծուխ…
…Պռատ երկիր… պռատ միտք… պռատ տարիներ… պռատ մարդ… որտե՛ղ է ավարտվում հինը և որտեղից է սկիզբ առնում նորը… Հնի ու նորի այս ճակատամարտում հաղթողը, հաստատ, ես չեմ… Բոլորը տանուլ են տալիս, կորցնում են, բոլորը մնում են մենակ… Թվում է, դա մեր վերջին օրն է… ամենավերջինը… և ոչ մեկը զրկված չէ այն վայելելու իրավունքից… Ինչքան մտածում եմ, մի տեսակ աբստրակտ բան է ստացվում, գուցե նաև՝ անհասկանալի… չէ, անբացատրելի… և՝ ինչո՞ւ…
-Աստված ինձ իր ծննդյանն առանձին կերպով է հրավիրում տոնելու, և մեր ժողովուրդն այդպես է հրավիրված,-Բագրատ եպիսկոպոս Գալստանյան…
Ինձ էլ, Սրբազան, բայց բառ չեմ գտնում ասելու, ամաչում եմ… Ընդհանրապես, միշտ էլ ամաչել եմ Տիրոջից, թեպետ շատ կցանկանայի հանդիպել ու ներողություն խնդրել իրեն հաճախ մենակ թողնելու համար…
Եվ ինչքան շուտ, այնքան լավ։ Հետաձգելը անթույլատրելի է, եթե, իհարկե, արդեն չեմ ուշացել…
-Լոխ Ըստծու ծերքինա,-1971-ին մրմնջացել է տատս, բնականաբար, պապիս տարեմուտի միակ մաղթանքից հետո՝ աշխարքս խաղաղ ինի…
Պատկերացնո՞ւմ եք, էլ ես միայն վերջերս եմ հասկացել, որ 71-ին պապիս ու տատիս ուրախության պատճառը ամենևին նոր տարին չէր, և չաղլիկ աքլորն էլ ամանորի սեղանի համար չէր մորթվել։ Դա կարող էր տեղի ունենալ նաև, ասենք, մի 20 օր առաջ կամ` հետո, եթե, իհարկե, ծնողներս ինձ ուղարկեին գյուղ։
Իսկ եթե այդ ձյունոտ օրը ես չգնայի գյուղ, ոչ մի աքլոր էլ չէր մորթվի, և դեկտեմբերի 31-ին աննկատ կփոխարիներ, չէ, կհաջորդեր հունվարի մեկը, երկուսը, երեքը… Եվ էն անտեր ձյունը կշարունակեր թափվել ու թափվել։