ՄԵՆՔ ՈՒ` ԷԼԻ ՄԵՆՔ …
Էլի չասեմ ծանրաշարժ օրեր են։ Արդեն մի հազար անգամ ասել ենք։ Է՜լ օրհասական, է՜լ ճակատագրական, է՜լ անորոշ… է՜լ… Կարծում եմ՝ հերիք է, չի կարելի, հոգնեցնում ենք, վախեցնում էլ։ Լավ, ենթադրենք, օրը հարյուր անգամ ասացինք դժվար է, վերջը տեսնես ի՞նչ կլինի, ո՞վ պիտի մեզ օգնի, այսպես չի կարելի, վիճակը անկանխատեսելի է, հետո՞… ո՞ւմ ենք վնաս տալիս, ո՞ւմ ենք ցավ պատճառում։ Երևի պատասխանը գիտեք։ Եթե չգիտեք, ասեմ՝ ինքներս մեզ։ Միայն ու միայն։ Օրինակի համար, մարդ կա, ում հետ ընդամենը մեկ-երկու րոպե խոսելուց հետո, թաքցնելու բան չկա, էս մեծ աշխարհը լքելու ցանկության ձեռքը կրակն ես ընկնում։ Այդպես ամեն օր, ամեն ժամ։ Բանվոր, գյուղացի, լրագրող, արվեստագետ, ուսուցիչ… Հետո էլ հաջորդում են մեկը մյուսից իմաստուն առաջարկություններն ու խորհուրդները, Երկիրը փրկելու ճանապարհային եզակի քարտեզը… Բան չունեմ ասելու, բոլորն էլ իրավունք ունեն խոսելու, կարծիք հայտնելու, իրենց առաջնորդի դերում պատկերացնելու… մտքի ճառագայթները Նահանգներ կամ Մոսկվա ուղղելու… Խանգարողը միամիտների թագավորն է։ Մեզ մոտ կան, չէ ՞, մարդիկ, ովքեր հազար տոկոս գիտեն, օրինակ, ինչպես կարելի է հաղթել Ուկրաինայում, կամ՝ ո՞վ է բոլոր գունավոր ու անգույն, թավշյա ու ոչ թավշյա հեղափոխությունների հեղինակը, ովքե՞ր են աշխարհը տանում կործանարար պատերազմի։ Մեկը չկա ասի՝ հավաքեք ձեզ, կարգի հրավիրվեք, մի քիչ խորհեք խոսելուց առաջ, ուղղակի նայեք ձեր շուրջը, ձեզ մի լավ թափ տվեք-ուսումնասիրեք… լռելու մասին չեմ խոսում, որովհետև բոլորը չէ, որ տիրապետում են լսելու արվեստին։ Դա, գիտե՞ք որն է, էն, էլի, երբ լռում ես, բայց ավելի շատ բան ես ասում։ Կարճ։ Կոնկրետ։ Ուզում եմ ասել, երբ լռելով սաստում ես, հրամայում, առաջնորդում։ Իսկ եթե պետք է՝ նաև ոչնչացնում…
Էլի հիշեցնե՞մ, որ ամեն մարդ իր գործը պիտի անի։ Թե չէ վարորդը ուսուցիչ է, ուսուցիչը՝ վարորդ, երբեմնի քաղաքական գործիչը խանութպան է, խանութպանը՝ քաղաքական գործիչ, պատմաբանը շինարար է (լավագույն դեպքում, իհարկե), շինարարը՝ պատմաբան… այդպես խառնվել են պոետները, նկարիչները, լրագրողները, երգիչներն ու պատմաբանները… Է՛լ վարսահարդար, է՛լ դիմահարդար, է՛լ… շփոթ է…
Մի՞թե ծիծաղելի չէ, կարևորը մասնակցությունն է, իսկ հաղթելը՝ հեչ, այնքան էլ կարևոր չէ։ Ուզում եմ հարցնել՝ իսկապե՞ս…
Հիմա էլ՝ վերջը ի՞նչ է լինելու… վիճակը օրհասական է… Էլի ուզում ես հարցնել՝ իսկապե՞ս… Իսկ եթե ինձնից ես հարցնում, խնդիր չկա, կարող եմ հանգիստ պատասխանել։ Եթե տարիներ առաջ որոշել էիր վերանորոգել տունդ, վերանորոգիր, եթե տնկած ծառդ էլ պտուղ չի տալիս, նորը տնկիր, եթե ուզում ես տուն շինել ու կասկածում ես, մի՜ կասկածիր… Եթե ցանկություն ունես վերադառնալ հեռուներից ու երկմտում ես, մի երկմտիր, հենց այսօր էլ վերադարձիր… Գիտե՞ս ինչու եմ այսպես խոսում, ասեմ, որովհետև միշտ էլ այդպես գնալով, մեր բաժինը չպաշտպանելով, մեր ծառը չտնկելով հսկայական երկիրը դարձրել ենք մի բուռ, մի ափ, մի պտղունց…
Պիտի ապրենք և՝ վերջ։ Դժվար, պակաս, վտանգված… կորցրած… Սովոր ենք։ Նորություն չկա։ Միակ ճանապարհը մնալն ու ապրելն է։ Խորհուրդ չեմ տալիս խանգարել նվնվոցով, հավերժական լացուկոծով, անընդհատ դժգոհելով ու մեղադրելով։ Մի բան էլ՝ եթե մտածում եք, որ թուրքը փոխվել է, չարաչար սխալվում եք… նման անակնկալ ո՜չ եղել է, ո՜չ էլ կարող է լինել։ Նույն վախկոտն է, նույն վազանը… ինքն իրենից զարմացած… Մեծից փոքր, սուլթանից մինչև շարքային՝ այդպես են… Դրա համար էլ մենակ չեկան մեր դեմ, եկան 90 միլիոնով, վարձկաններով, ուրիշի զենք ու զրահով… օտարի հովանավորությամբ… մնացածը չասեմ, մնացածը մեր ներքին գործն է, մեր թուլությունը, անմիաբանությունը, մեր վախը…
Բայց ամեն արածի մասին չէ, որ պետք է բարձրաձայնել, նկարահանել, գրել, ամենուր պատմել-հաղորդել։ Պապս ասում էր՝ տունն էլ պիտի լուռ ու մունջ շինես, ծառ տնկելիս էլ` լուռ աղոթես… Աշխարհը հավաքեցիր գլխիդ, բան չի ստացվի։
Իսկ մեր առաջ գործը կուտակ-կուտակ է, անսպառ։ Ո՜չ օրն է հերիք, ո՜չ ամիսը, ո՜չ էլ տարին։ Ե՜վ մենակ պիտի արվի, և՜ ազգովի… Ուզում եմ ասել՝ մենակ չես հասցնի, իսկ առանց մենակի ազգովի չի լինի…
Տեսաք, չէ ՞, ինչքան մարդ է եկել Վերածննդի հրապարակ և ինչ կրակ կար նրանց աչքերում։ Ո՞վ է, որ կհամարձակվի տեր չկանգնել այդ ուժին, ո՞վ կհամարձակվի չտեսնել այդ ամբողջականությունը, այդ հզորագույն զինատեսակը։ Ամեն մեկը եկել է ասելու, որ մեր գործը մեր փոխարեն ուրիշը չի անելու, որ մեզ մեզնից լավ ոչ մեկը չի կարող ճանաչել, որ մենք նույն գաղափարի տերն ենք, գիտենք ով է մեր թշնամին, հակառակորդը, դաշնակիցը, բարեկամն ու ընկերը։ Եկել ենք համոզելու, որ մեզ խաբել չի կարելի։ Եկել ենք ասելու, որ չենք եկել, մենք ներկայացել ենք, օտարին անհասկանալի մեր հավատով, տեսանելի շքեղությամբ ու… ընտանյոք հանդերձ։
Ահա Արցախի Հանրապետությունը, ահա մենք, նայեք ու որոշում կայացրեք, եթե կարող եք։ Եթե… Սենեկան է, չէ՞, ասել, հայրենիքը սիրում են ոչ թե նրա համար, որ մեծ է, այլ նրա համար, որ քոնն է…
Պապս էլ ասում էր՝ մեր էս տունը, գիտե՞ս ինչու եմ այսքան սիրում, որովհետև հայրս է շինել… Գյուղում ինչքան տուն կա, մեր շինածն է… 200 տարի առաջ, հարյուր, հիսուն, քսան, մեկ… Եկեղեցին էլ՝ կենտրոնում… դպրոցը՝ կողքին… Ամեն քարի տակ քրտինքի, հազարավոր բյուրեղացած կաթիլներ կան… և աղոթք… Բայց չես պատկերացնի՝ ինչ դժվար, տանջված, անհույս օրեր էին…
Ուզում եմ ասել, ինձ էլ ավելորդ հարցերով չծանրաբեռնեք, ինձ նվնվոցով չչարչարեք, էլ անորոշ ու օրհասական ժամանակներից չխոսենք, ես այդ տարածքը վաղուց եմ լքել և վերադառնալու ցանկություն բացարձակապես չունեմ։ Եվ, ամենակարևորը, ես մենակ չեմ…
Նորեկ ԳԱՍՊԱՐՅԱՆ