ՀԻՇՈՒՄ ԵՎ ՄԵԾԱՐՈՒՄ ԵՆՔ
Էմմա ԲԱԼԱՅԱՆ
Վերջին տարիներին հաճախ են նշվում զոհված ազատամարտիկների հոբելյանական տարելիցները: Տղաների, որոնց ուժն ու եռանդը, մտավոր կարողությունները շատ հարկավոր կլինեին մեր երկրի կայացման գործում:
Հունիսի 2-ին կլրանար Արցախյան պատերազմի լավագույն հրամանատարներից մեկի` ՙԽաչեն՚ գումարտակի հիմնադիր-հրամանատար, ՙՄարտական խաչ՚ 1-ին աստիճանի շքանշանակիր Կարեն Առաքելյանի ծննդյան 55 տարին: ԱՀ ՊՆ-ի, կրթության, գիտության և սպորտի նախարարության, ՀՀ ԵԿՄ-ի կողմից Մարտակերտում կազմակերպվել են մի շարք միջոցառումներ՝ նվիրված նրա ծննդյան տարելիցին:
Հունիսի 1-2-ը մեկնարկել է ազատ ոճի ըմբշամարտի պատանիների ամենամյա հուշամրցաշարը: Միջոցառումը կազմակերպվել էր ԱՀ ազատ ոճի ըմբշամարտի ֆեդերացիայի, ՀՀ մենապայքարային մարզաձեւերի ասոցիացիայի, Կարեն Առաքելյանի եղբոր` Արմեն Առաքելյանի, Մարտակերտի շրջվարչակազմի եւ ՊԲ-ի կողմից: Մասնակցել են ըմբիշներ Ստեփանակերտ քաղաքից, Մարտակերտի եւ Մարտունու շրջաններից, նաեւ ՀՀ մարզերից ու 2 թիմ` Երեւան քաղաքից: Հուշամրցաշարին ներկա էին Մարտակերտի շրջվարչակազմի աշխատակազմի ղեկավար Սասուն Հարությունյանը, ըմբշամարտի մարզիչներ, զինվորականներ, հյուրեր:
Բացման խոսքով հանդես է եկել Մարտակերտի շրջվարչակազմի աշխատակազմի կրթության եւ սպորտի բաժնի սպորտի գծով գլխավոր մասնագետ Նիկոլայ Ավագիմյանը: Կարեն Առաքելյանի մարտական ուղին ներկայացրել է N զորամասի զինվոր Նարեկ Մեհրաբյանը:
Ապա երաժշտական կատարումներով հանդես են եկել զինվորական նվագախումբն ու Մարտակերտի մշակույթի եւ երիտասարդության կենտրոնի սաները:
Հաղթող թիմ է ճանաչվել Երևանի թիվ 1 թիմը, 2-րդ տեղում՝ Լոռու մարզի հավաքական թիմը, 3-րդ` Արարատի մարզի հավաքականը:
Հունիսի 2-ին Մարտակերտի մշակույթի եւ երիտասարդության կենտրոնում տեղի է ունեցել հուշ-ցերեկույթ, զորամասում էլ՝ մեծարման արարողություն Կարեն Առաքելյանի կիսանդրու առջև:
Հուշ-ցերեկույթին ցուցադրվել է Ցվետանա Պասկալևայի ՙՆվիրյալները՚ շարքից ֆիլմ՝ նվիրված սիրված հրամանատարին: Հայրենիքի նվիրյալի մասին հիշատակի խոսք են ասել Կիչանի եւ Նոր Ղազանչիի կրթօջախի դպրոցական աշխատանքների կազմակերպիչ Զորայր Աբրահամյանը, նրա մարտական ընկեր, Նոր Ղազանչի համայնքի ղեկավար Թեմուր Առուստամյանը:
Միջոցառմանը ներկա էին նաև ԱԱՄ Մարտակերտի տարածքային կազմակերպության նախագահ Գրիգորի Միրզոյանը, Ստեփանակերտից` պատգամավոր Ռուսլան Իսրայելյանը, Ինքնապաշտպանական ջոկատների առաջին հրամանատար Արկադի Կարապետյանը, ՀՀ ԵԿՄ նախագահի խորհրդական Օհան Գևորգյանը, ազատամարտիկներ, Կարեն Առաքելյանի հարազատներ: Օհան Գևորգյանը կարդացել է ԵԿՄ նախագահ Սասուն Միքայելյանի ուղերձը` նվիրված Կարեն Առաքելյանի հիշատակին, ու նրա անունից ՙՀայրենիքի պաշտպան՚ հուշամեդալով պարգեւատրել Կարեն Առաքելյանին, որը հանձնվել է հրամանատարի եղբոր որդուն` նրա անունը կրող Կարեն Առաքելյանին:
Երաժշտական կատարումներով հանդես է եկել ԱՀ ՊԲ ՙԱսպետ՚ համույթը: Ասմունքով հանդես են եկել նաեւ Կիչանի եւ Նոր Ղազանչիի միջնակարգ դպրոցի աշակերտները: