ՆԱԵՎ ԹԵՎ ՈՒ ԹԻԿՈՒՆՔ՝ ՄԵՐ ՊԵՏՈՒԹՅԱՆՆ ՈՒ ԲԱՆԱԿԻՆ...
Լաուրա ԳՐԻԳՈՐՅԱՆ
ԱԿԱՀՄ 7-րդ համագումարը
Հուլիսի 13-ին Ստեփանակերտում տեղի ունեցավ Արցախի Հանրապետության անհայտ կորած ազատամարտիկների հարազատների միության (ԱԿԱՀՄ) 7-րդ համագումարը, որին ներկա էին ինչպես ԱԿԱՀՄ, այնպես էլ հանրապետությունում գործող մյուս հասարակական կազմակերպությունների ներկայացուցիչներ, մտավորականներ, հրավիրվածներ։
Միության 2014-2019թթ. կատարած աշխատանքների հաշվետվությամբ հանդես եկավ ԱԿԱՀՄ նախագահ Վերա Գրիգորյանը։ ՙՀամագումարի թիվն ինքնին հուշում է մեր Միության անցած երկար ճանապարհի մասին, այդուհանդերձ, պետք է նշեմ, որ կազմակերպությունն իր գոյության 21 տարիների ընթացքում, հաղթահարելով բազում դժվարություններ, հասել է որոշակի հաջողությունների։ Միության կազմում հաշվառված է 773 անհայտ կորած, որոնցից 250-ը՝ ազատամարտիկներ են։ Կազմակերպության անդամների թիվը գերազանցում է 3200-ի սահմանը՚,- ասաց Վ. Գրիգորյանը։
Ստեղծման օրից Միությունը համագործակցում է Անհայտ կորածների գծով հանրապետական հանձնաժողովի, Կարմիր խաչի միջազգային կոմիտեի Ստեփանակերտի գրասենյակի, տարբեր հասարակական կազմակերպությունների, կառավարության տարբեր օղակների, ինչպես նաև բարերարների հետ, որոնց օժանդակությամբ էլ միջոցներ է հայթայթել անհայտ կորած ազատամարտիկների ընտանիքներին աջակցելու համար։ ԱԿԱՀՄ վարչության անդամները, ինչպես նշեց զեկուցողը, հաճախ են լինում հանրապետության շրջաններում և տեղում հասարակական հիմունքներով աշխատող մասնաճյուղերի ներկայացուցիչների հետ այցելում են անհայտ կորածների սակավակարող ընտանիքներին, իրազեկ լինում նրանց հոգսերին, բարոյապես նեցուկ կանգնում և հնարավորության սահմաններում նաև նյութական օգնություն տրամադրում։
Կազմակերպության գործունեության ուղղություններից մեկն էլ Պաշտպանության բանակի հետ կապի սերտացումն է։ Միության վարչության անդամները պարբերաբար այցելում են զորամասեր, հանդես գալիս զինվորների ոգին բարձրացնող ելույթներով, խրախուսում մեդալներով, պատվոգրերով ու հուշանվերներով։
Վ. Գրիգորյանի հավաստմամբ՝ հնգամյա ժամանակահատվածում Միությանը հաջողվել է կյանքի կոչել որոշակի ծրագրեր, սակայն վերջին ժամանակներս այն հայտնվել է ֆինանսական սուղ վիճակում, ինչի հետևանքով նախատեսված ծրագրերի մի մասն մնացել է անկատար։
Կազմակերպության տեսադաշտից դուրս չեն մնում անհայտ կորած ազատամարտիկների երեխաներն ու թոռները։ Տոն և հիշարժան օրերին նրանց համար միջոցառումներ են կազմակերպվում, նվերներ մատուցվում։ Հանդիսավորությամբ նշվել է նաև Միության կազմավորման 20-րդ տարին։ ՙԵս ու իմ բախտակիցները չենք հանձնվում մեր կորստին ու վշտին, սատարում ենք միմյանց՝ հուսալով, թե գուցե մի հրաշքով տղաներից տուն վերադարձողներ լինեն՚,- ելույթն ասպես ավարտեց Միության նախագահը։
Իրենց ելույթներում կազմակերպության գործունեությունը կարևորեցին և հաշվետու ժամանակահատվածում կատարած աշխատանքը բավարար գնահատեցին զոհված ազատամարտիկի հայր Յուրի Ավանեսյանը, Ստեփանակերտի հ.12 դպրոցի տնօրեն Էլմիրա Գաբրիելյանը, ԱՀ զոհված ազատամարտիկների հարազատների միության նախագահ Արթուր Առստամյանը, ՙՈրոշում քաղաքացիական նախաձեռնություն՚ ՀԿ նախագահ Արթուր Հայրապետյանը, ուրիշներ։
ՙԵս հպարտանում եմ իմ երկրի ձեռքբերումներով ու այսօրվա սերնդով, ովքեր ամեն րոպե պատրաստ են սրբորեն պաշտպանել անշիրիմ ու անհայտ ճակատագրի տեր քաջ տղաների արյամբ սրբացած հողի ամեն մի թիզը՚,- ասաց Էլմիրա Գաբրիելյանը։
Կազմակերպության հետ ակտիվ համագործակցության և նրա ծրագրերի իրագործմանը շարունակաբար նպաստող մի խումբ անհատներ արժանացան ԱԿԱՀՄ ՙՀայրենիք և հավատ՚, ՀՀ ՙԶինվոր հայրենյաց՚ մեդալների և պատվոգրերի, իսկ անհայտ կորած ազատամարտիկի այրի Էվելինա Աղաջանյանը՝ ՀՀ ՙՖիդայիններ՚ շքանշանի, զոհված ազատամարտիկի մայր Լորա Ազրյանն էլ՝ ՙՄենք ենք, մեր սարերը՚ հուշամեդալի։ Ի դեպ, Լորա Ազրյանը մեկ անգամ չէ բարեգործությամբ սատարել Անհայտ կորած ազատամարտիկների հարազատների միությանը։ Այս անգամ էլ նա դատարկաձեռն չէր եկել և 100 հազար դրամ՝ որպես նվիրատվություն, հանձնեց կազմակերպության վարչությանը։
Պարգևատրվածներից ԱՀ Նախագահի աշխատակազմի տեղեկատվության գլխավոր վարչության պետ Դավիթ Բաբայանը (ՙՀայրենիք և հավատ՚ մեդալ) շնորհակալական իր խոսքում կարևորեց Միության գործունեությունն ու նրա անդամների հայրենանվեր աշխատանքը։ ՙՀամոզված ենք, որ ձեր որդիների անհայտ ճակատագրերի համար դուք լացող մայրեր ու հարազատներ չեք միայն, այլ նաև թև ու թիկունք եք մեր պետությանն ու բանակին։ Եվ ներկա ու ապագա սերունդները ձեր աղոթքների զորությամբ ու ձեր զորակցությամբ կշարունակեն մեր ազատամարտի նվիրյալների հերոսական պայքարն ու կհասցնեն վերջնահանգրվանին՚,- ասաց Դավիթ Բաբայանը։ Նա նաև Երկրի իշխանությունների ողջույնի խոսքը փոխանցեց ԱԿԱՀՄ նախագահ Վերա Գրիգորյանին։
Կանոնադրության համաձայն՝ համագումարն ընտրեց 9 հոգուց բաղկացած միության վարչության նոր կազմ, ինչպես նաև՝ վերստուգիչ հանձնաժողով։ Վարչության նախագահ վերընտրվեց Վերա Գրիգորյանը։