ԿԱՏԱՐՎԱԾ ԱՇԽԱՏԱՆՔՆԵՐԸ ՏԵՍԱՆԵԼԻ ԵՆ

 Օրերս Հադրութի շրջանում էր Հիմնադրամի  կողմից Արցախում  իրականացվող ծրագրերը համակարգող  Վալերի Ղազարյանը, այցի ընթացքում  նպատակ էր հետապնդվում ավելի մոտիկից ծանոթանալ Հադրութի շրջանում Հիմնադրամի միջոցներով կառուցվող 3 համայնքային կենտրոնների և 2 բազմազավակ ընտանիքների համար բնակելի տների կառուցապատման  աշխատանքներին: Զրույցի ընթացքում Վ. Ղազարյանն անդրադարձավ  Հիմնադրամի անցած ուղուն, ինչը  բնութագրվում է միմյանց  հաջորդող տարաբնույթ,   հագեցած ծրագրերով, որոնք կենսական կարևորություն ունեն մեր երկրի  համար: Ճանապարհների, դպրոցների, մանկապարտեզների, հիվանդանոցների, ջրագծերի, գազատարների կառուցմանը զուգահեռ օժանդակություն են  ստանում սոցիալապես խոցելի խմբեր, այդ թվում՝ ազատամարտիկների, անապահով ընտանիքներ, ուսանողներ: Ըստ նրա՝ աշխարհասփյուռ հայության նվիրատվություններով այսօր մեր հարյուրավոր հայրենակիցներ ունեն տուն, ջուր, գազ, ջեռուցում, բարեկեցիկ կյանքի պայմաններ: 

Մեր այն հարցին,  թե  այդ ընթացքում Հադրութի շրջանում ինչ աշխատանքներ են իրականացվել  Հիմնադրամի կողմից, Վ.  Ղազարյանը նշեց, որ 1992-2017 թվականներին  Հիմնադրամի հանգանակված միջոցներն ուղղված  էին ժողովրդի համար օրախնդիր դարձած սոցիալական հարցերի լուծմանը: Արցախյան գոյամարտի տարիներին  շրջանի բնակավայրերը զգալիորեն տուժել են: Միայն այն հանգամանքը, որ շրջանի հարավային թևի 14 գյուղեր բռնագաղթվել և հիմնահատակ ավերվել էին, ուստի խիստ անհրաժեշտություն կար  վերականգնման ու գյուղերի վերաբնակեցման համար խոշոր ներդրումներ կատարել: Հիմնադրամը ձեռնամուխ  եղավ շրջանի համար մի շարք կարևոր օբյեկտների շինարարությանը և վերանորոգմանը: Կառուցվեց շրջանի համար շատ կարևոր ՙՀյուսիս-Հարավ՚ մայրուղու Հադրութ- Կարմիր Շուկա  32 կմ հատվածը: Հիմնովին վերանորոգվեցին ՙՀադրութի բուժմիավորում՚ ՓԲԸ մասնաշենքերը,  Տողի միջնակարգ դպրոցի շենքը, որտեղ տեղակայված է նաև ՙՏողի արվեստի դպրոց՚ ՊՈԱԿ¬ը: Համայնքային կենտրոններ են կառուցվել Դրախտիկ և Ակնաղբյուր համայնքներում, ընդ որում, Ակնաղբյուր համայնքում կառուցվել է նաև հանդիսությունների տուն:  Մանկապարտեզի շենք է կառուցվել Դրախտիկ համայնքում: 2017թվականին շարունակվում է Տումու, Քյուրաթաղի և Թաղասերի համայնքներում համայնքային կենտրոնների և հանդիսությունների տների շինարարությունը: Մեծ Թաղեր համայնքում բազմազավակ ընտանիքի համար կառուցվել է բնակելի տուն, նման բնակելի տուն է կառուցվում նաև Խանձաձոր համայնքում: Կառուցվել է Տող-Հադրութ  25 կմ երկարության  գազատարը: Զգալի աշխատանքներ են   կատարվել  ջրամատակարարման ուղղությամբ: Կառուցվել է  Արջ աղբյուր-Հադրութ 21 կմ երկարության ջրատարը, ինչպես նաև Հադրութ քաղաքի ներքին ջրատար ցանցը, կառուցվել են ջրամբարներ: Մեծ Թաղեր, Ազոխ, Դրախտիկ համայնքների ջրամատակարարման նպատակով կառուցվեցին  Իշխանագետ-Մեծ Թաղեր-Ազոխ- Դրախտիկ  21 կմ երկարության ջրատարը, ինչպես նաև այդ գյուղերի ներքին ջրատար ցանցերը և ջրամբարները: Ջրատարներ են կառուցվել Ակնաղբյուր, Հարթաշեն, Ուխտաձոր համայնքներում։

Առաջիկա տարիներին բազում ծրագրեր  կան, որոնք կիրականացվեն Հիմնադրամի միջոցներով:  Դրանց մի մասն  արդեն  իսկ ընթացքի մեջ է։

Էդիկ  ԴԱՎԹՅԱՆ

ք. Հադրութ