ԱՄԱՆՈՐՆ ԱՌԻԹ Է, ՈՐ ՈՉ ՈՔ ՄԵՆԱԿ ՉՄՆԱ
Անկախ տարիքից բոլորիս սրտում ապրում է մի երեխա, որ Ամանորի նախաշեմին միշտ արթուն է՝ հրաշքների սպասումով։ Նոր տարին մեզ միշտ թվում է խաղին ավելացված մեկ րոպե, մեկ պահ, մեկ հնարավորություն՝ անկատար թողած ցանկություններն ու նպատակներն իրագործելու համար։
Նոր տարին առիթ է ոչ միայն առաջ նայելու, այլև հին վիրավորանքները մոռանալու համար։ Այն իր հետ միշտ բերում է բարի ու անկեղծ տրամադրություն, հեքիաթային մթնոլորտ, թվում է` անգամ օդն է հագեցած ամանորյա կախարդանքներով ու հրաշքներով։ Երևի չեմ սխալվի, երբ ասեմ, որ Ամանորը լավագույնի սպասումի ժամանակն է։
Անշուշտ, շատերի կյանքում կատարվել են ամանորյա հրաշքները, իսկ շատերի մոտ՝ ոչ։ Իհարկե, տխուր է։ Բայց ինչը՞։ Այն, որ հրաշք չի՞ լինում։ Ո՜չ, դա նկատի չունեմ։ Ասածս այն է, որ մարդիկ մինչև հիմա չեն ընկալել Ամանորի ճիշտ ու իրական հրաշքի էությունը։ Գիտեմ, տարօրինակ է, բայց կփորձեմ ասածս հիմնավորել վերջերս դիտած շատ զվարճալի, բայց խորը հոգեբանություն արծարծող «Թե ինչպես Ոզնին ու Արջուկը դիմավորեցին Նոր Տարին» խորհրդային շրջանի մուլտֆիլմով։
Ոզնին ու Արջուկը որոշում են Նոր Տարին նշել միասին, սակայն տանը բացակայում էր տոնածառը։ Նրանք երկուսով գնում են անտառ՝ տոնածառ փնտրելու։ Երկար փնտրտուքից հետո՝ ձեռնունայն վերադառնում են տուն։ Ոզնին նկատում էր, որ առանց տոնածառի Արջուկը շատ տխուր է և որոշում է ինքը դառնալ տոնածառ։ Կանգնում է տան մի անկյունում և արջուկին խնդրում, որ խաղալիքներով իրեն զարդարի։ Նրանք վերջապես լիարժեք ուրախ են։ Երկար տոնելուց հետո՝ Արջուկը հարցնում է. «Ոզնի՜, իսկ դու վաղը նույնպե՞ս տոնածառ կլինես»։ Դրական պատասխան ստանալով՝ Արջուկը հանգիստ սրտով պառկում է քնելու, իսկ Ոզնին (որ արդեն տոնածառ էր) շարունակում է երգել նրա համար։
Կարծում եմ, մուլտֆիլմը մեզ սովորեցրեց Ամանորի բարի խորհուրդը։ Նա ցույց տվեց, որ բոլորն էլ արժանի են մի փոքրիկ հրաշքի, մի գդալ սիրո։ Անկախ նրանից, թե ինչպես ենք վերաբերվում Ամանորին, այն տոն է, որը մեկ սեղանի շուրջ է հավաքում հարազատներին ու ընկերներին, ովքեր չէին կարողացել տեսնել միմյանց մեկ ամբողջ տարի, նույնիսկ ավելի։ Տոն, երբ և՛ մեծերը, և՛ երեխաները բերկրանքով նվերներ են պատրաստում միմյանց համար։ Օր, որի համար մեր մայրերը պատրաստվում են շաբաթներ շարունակ: Ամանորը միասնություն և անձնվիրություն պարգևող տոն է։ Եւ մի՞թե քիչ է, երբ Ամանորին դու մենակ չես...
Նանիկ ԱՂԱՍՅԱՆ