[ARM]     [RUS]     [ENG]

ՄԵՐ ՄԱԵՍՏՐՈՆ

Արցախի  պետական կամերային  նվագախմբի գեղարվեստական ղեկավար  և գլխավոր դիրիժոր  Գևորգ  ՄՈՒՐԱԴՅԱՆԻ 70-ամյակի առթիվ

 2004  թվականն  էր:  ՈՒրախառիթ  լուր  տարածվեց.  դիրիժոր  Գևորգ  Մուրադյանն  իր  համախոհներով   ժամանել  է  Ստեփանակերտ`  Արցախում հիմնադրելու պետական  կամերային  նվագախումբ:

Դուք, Մաեստրո,  հայաստանյան  և  միջազգային  փորձով  հմտացած  ու  վարպետացած, կյանքի  բովում  թրծված  արվեստագետ, քաջ  գիտակցում  էիք, որ յուրաքանչյուր  գաղափար,  իղձ  իրականություն  է  դառնում, երբ  մեկտեղվում  են  տաղանդը,  նվիրումը,  անձնազոհությունը,  ջանադիր  աշխատանքն  ու  համառությունը:  Եվ…  մեկտեղվեցին:

Արցախցիները  նվագախմբի   անդրանիկ   համերգը  ողջունեցին  ցնծությամբ  և   հպարտության  անթաքույց    զգացումով,  իսկ  Ձեր  բաց, անկեղծ,  անմիջական     խոսքը  և  ուրախությունից  փայլող  աչքերը  գերեցին  բոլորին,  ու  հասկանալի  դարձավ`  ամեն  ինչ  լավ  է  լինելու:

Ապա  իրար  հաջորդեցին  համերգներ`   իրարից  տարբեր, ինքնատիպ   ու  յուրօրինակ: Տարիների  ընթացքում  արցախցի   հանդիսատեսն   ունկնդրեց  հայ  և  համաշխարհային   դասական, նաև`  ժամանակակից   կոմպոզիտորների  բազմազան  ստեղծագործություններ,  սովորեց ոչ միայն լսել, այլև ըմբոշխնել  դասական  երաժշտությունը, ընդ  որում,  նվագախումբն անընդհատ բարձրացնում էր իր նշաձողը երաժշտական ստեղծագործությունների  ընտրության և որակի առումով, իսկ Դուք, Ձեզ հատուկ ներշնչանքով  ու  զգացմունքայնությամբ,  նվագավարի  կախարդական   ձողիկը  ձեռքին,  նվագախումբ - երաժշտություն -դահլիճ  եռամիասնության գլուխ  անցած,  առաջնորդում  էիք  ունկնդիրներին    դեպի   գեղեցիկի, վեհի  աշխարհը`  հոգու  տոն  պարգևելով   պատերազմի  արհավիրքներն  ու  կորստյան  ցավը  դեռևս  չթոթափած  արցախցիներիս:

Լինելով կյանքի  փորձով   իմաստնացած  արվեստագետ,  Դուք   ՙէն  գլխից՚  որդեգրեցիք  տեղի   ստեղծագործ  ուժերի  զարգացման  ճիշտ  ռազմավարություն: Ձեր  նախանձախնդիր  հորդորներով մայրաքաղաքի  երաժշտական ուսումնական հաստատություններում    բացվեցին  լարային  նվագարանների   դասարաններ,  ապա  նվագախմբին   կից  ստեղծվեց  պատանի  ջութակահարների   անսամբլը: Եվ  մենք   այսօր   հպարտությամբ  արձանագրում  ենք,  որ  Արցախի  պետական կամերային  նվագախումբն   ունի  երաժիշտների  և  երկրպագուների   նոր  սերունդ`   հերթափոխ,  որը  Ձեր  նոր,   գեղեցիկ  մտահղացումների  իրականացնողը   պետք  է  դառնա: Շնորհիվ  Ձեզ  արցախցիները  հյուրընկալեցին,  ծանոթացան  և  ունկնդրեցին  բազմաթիվ  նշանավոր    երգիչների, երաժիշտների,  ասմունքի  վարպետների, ովքեր համերգից  հետո,  հաճելիորեն  զարմացած,  ընդգծում  էին, որ  Արցախի  հանդիսատեսն   ունի  դասական  երաժշտություն   լսելու  հազվագյուտ  մշակույթ,  բարեկիրթ  է  ու  ջերմ: Իսկ  մենք  հո գիտե՛նք, որ  այդ   ամենը  Կամերային  նվագախմբի  և  անձամբ  Ձեր  տարիների  տքնաջան  աշխատանքի  արգասիքն է: Ինչու  չէ,  նաև  Արցախի   հանրային  հեռուստատեսությամբ  Ձեր   հեղինակած ՙԴասական  ալիք՚   հաղորդաշարի  բարեբեր  ազդեցությունը:

Արցախցին նաև հրճվանք  ապրեց, երբ  իմացավ, որ  իր  Կամերայինը  հյուրախաղերով  հաջողությամբ   հանդես  է  եկել  Նորվեգիայում,  ՌԴ-ում, ԱՄՆ-ում`  դառնալով   Արցախի  Հանրապետության  մշակութային   դեսպանն  արտերկրում:

Այսօր,  առաջին  համերգից   13 տարի  անց, կարող  ենք  վստահությամբ   արձանագրել,  որ  Արցախի  պետական  կամերային  նվագախումբը  նոր  շունչ  ու   բովանդակություն  է   հաղորդել   մեր  մշակութային  կյանքին`  դառնալով  նրա  ոսկե  պսակը: Սակայն  ակնհայտ  է  նաև,  որ  նվագախմբի   կայացումն   անկարելի  կլիներ   առանց    Հայ բարեգործական   ընդհանուր   միության  գործուն  աջակցության   և  Արցախի    իշխանությունների  բարեխնամ  վերաբերմունքի:

Անժխտելի  ճշմարտություն  է,  որ  յուրաքանչյուր  բարեկիրթ   հասարակության  հոգևոր  առողջության   առաջին  պայմանն  առողջ  մշակույթն  ու  արվեստն  է, իսկ   երկրի   գեղագիտական   պաշտպանական   օղակը  նրա  լավագույն  մտավորականներն  են: Դուք   Արցախի  այն  մտավորականներից  եք,  ովքեր  իրենց   գործունեությամբ   նպաստում են  արցախցու  Հոգևոր  հայրենիքի  կերտմանը,  քանզի   երկիրը  պաշտպանվում  է  ոչ  միայն  սահմանապահներով, այլև  մշակույթով   և  արվեստով`  Մաշտոց,  Նարեկացի,  Սարյան, Իսահակյան, Չարենց, Կոմիտաս,  Սպենդիարյան, Խաչատուրյան,  Բաբաջանյան… Ահա   բոլոր  ժամանակների  մեր  մշտարթուն   սահմանապահները…

Մաեստրո,  գիտցեք  նաև,  որ  ապրելով  ու  ստեղծագործելով  Արցախում,   Դուք   ևս   զինվոր  եք   ու  Ձեր  պապերի  կորցրած  Խարբերդի  կռիվն  եք  տալիս  մեր  սրբացած հողում  և  հաղթանակում  եք`  արարելով ,  ավերումի  դեմ`   ստեղծելով: Արցախ  աշխարհը   Ձեզ   վաղուց   իր  զավակն  է  համարում,   արցախցին`   իր  Մաեստրոն: Կարծում  ենք`   դեմ  չեք  լինի, եթե  ասենք, որ  Արցախը   նաև   Ձեր  հայրենիքն  է:

Դե,  ուրեմն,  ապրեք  երկար   և  շարունակեք  հոգևոր    մաքրագործման  ու  ազնվացման   Ձեր  առաքելությունը: Կերտեք   մեր  ապագան`  երիտասարդ  երաժիշտների   հերթափոխը,  գուցե   թե  օրերից   մի  օր  նրանց  շարքերում   մի  նոր   Գևորգ  Մուրադյան  ծնվի,  և  դա  կլինի   Ձեր  և մեր  ամենամեծ  հաղթանակը:

Հուսանք  և  տոկանք: 

Շնորհավոր ծնունդդ, Մաեստրո:

 

ՙԱզատ Արցախը՚ սիրով միանում է շնորհավորանքին: 

Կարինե  ԱԼԱՎԵՐԴՅԱՆ

 ԼՂՀ  մշակույթի  վաստակավոր  գործիչ