[ARM]     [RUS]     [ENG]

ԱԶԳԱՅԻՆ ԺՈՂՈՎԻ ԳԱՎԱԹԸ ՓՈԽԱՆՑՎԵՑ ՄԱՐՏՈՒՆՈՒ ՀԱՎԱՔԱԿԱՆԻՆ

Մայիսի 30-ին Ստեփանակերտի Ստեփան Շահումյանի անվան հանրապետական մարզադաշտում  տեղի ունեցավ  Ազգային ժողովի գավաթի հերթական  խաղարկության եզրափակիչ փուլի բացման արարողությունը, որին ներկա էին ԱՀ Աժ նախագահ Աշոտ Ղուլյանը,  ԱԺ գիտության, կրթության, մշակույթի, երիտասարդության և սպորտի հարցերի մշտական հանձնաժողովի նախագահ Արմեն Սարգսյանը, պատգամավորներ ու ԱՀ կրթության, գիտության և սպորտի նախարար Սլավա Ասրյանը։ 

 Խաղարկությունը  տևել է երկու օր: Եզրափակիչ փուլին մասնակցել  է թեթև աթլետիկա մարզաձևից լավագույն արդյունքները ցուցաբերած 8 թիմ՝ Ստեփանակերտի և շրջանների դպրոցականներից։ Ավանդության համաձայն` մրցումներն անց են կացվում ուսումնական տարվա ավարտին,  երեխաների պաշտպանության օրվա  նախօրյակին:  Ինչպես ելույթում նշեց  ԿԳՍ նախարարության  ԿԳ վարչության ռազմահայրենասիրական, ֆիզդաստիարակության և հասարակական կազմակերպությունների  հետ կապերի   բաժնի վարիչ Ստեփան  Օհանջանյանը,  նման միջոցառումները կարևոր են աշակերտների մեջ սպորտի հանդեպ սեր սերմանելու,  առողջ ապրելակերպի վարժեցնելու առումով: ԱՀ իշխանություններն էլ ուշադրության կենտրոնում են պահում մատաղ սերնդի ուսուցման և դաստիարակության  հարցերը, ինչի ապացույցն էլ  ԱԺ հովանու ներքո անցկացվող այս միջոցառումն է:

Ողջունելով մարզիկներին՝ ԱԺ նախագահ Աշոտ Ղուլյանը հաջողություն է մաղթել մրցակցային  պայքարում և նշել, որ այդպիսի մրցումներում շահած հաղթանակներով է ձևավորվում այն  սերունդը, որը շարունակելու է 1988թ. Արցախի ինքնիշխանության  նվիրյալների ստեղծած ավանդույթները։

ՙԱզգային ժողովի գավաթի խաղարկությունը միջոցառումներից միայն մեկն է. նման  նախաձեռնություններով պետությունը փորձում է  մատաղ սերնդի համար հնարավորություն ստեղծել ինքնադրսևորվելու, ցուցադրելու իր հմտություններն ու կարողությունները, ինքնահաստատվելու:  Ուզում եմ, որ դուք միշտ հիշեք ու գիտակցեք, որ կոչված եք հերթափոխը լինելու այն սերնդի, որն ազատագրել է Շուշին, և այն քաջազունների, ովքեր անցած տարի ապրիլին հերոսաբար պաշտպանել են մեր երկրի սահմանները՚,- նշել է ԱԺ նախագահը։  Ա. Ղուլյանը խորհրդանշական է համարել, որ այս խաղարկությունը կազմակերպվում է երկրի համար կարևոր իրադարձությունների հոբելյանական՝ ՊԲ ստեղծման, Շուշիի ազատագրման  և 25-ամյակի տարում:

Ամփոփելով նախնական արդյունքները, Ս. Օհանջանյանը նշեց, որ Մարտունու շրջանի հավաքական թիմը գրավել է առաջին, Հադրութի հավաքական թիմը՝ երկրորդ, Ասկերանի հավաքականը՝ երրորդ  մրցանակային տեղերը:  Անհատական հաշվարկով մրցանակային տեղեր գրաված աշակերտներն են Լուսինե Գասպարյանը,  Նորա Մելքումյանը՝ Մարտունու շրջանի  Սոս գյուղից ՝ առաջին և երկրորդ տեղեր,  Վիոլետա  Շահրամանյանը՝ Ասկերանից: Մրցանակային տեղեր շահած թիմերը կպարգևատրվեն  ԿԳՍ նախարարության կողմից հուշանվերներով և դրամական պարգևով, ԱԺ-ի կողմից՝ դիպլոմներով և պատվոգրերով,  իսկ ԱԺ փոխանցիկ գավաթը կհանձնվի առաջին մրցանակային տեղ զբաղեցրած  Մարտունու թիմին:

Սրբուհի ՎԱՆՅԱՆ