ԹԵՄԱՆ` ԲԻԶՆԵՍԸ
Կրթություն նոր ձևաչափով
Արցախի մայր բուհը շարունակում է համալսարանի զարգացման համար շատ կարևոր ոչ ֆորմալ կրթության ծրագիրը, որի շրջանակում տարբեր երկրներից դասախոսություններով հանդես են գալիս հայ և օտարազգի նշանավոր դեմքեր: Նոր ուսումնական տարում կայացավ նման ձևաչափով առաջին հանդիպումը: Հյուրերը երկուսն էին, ոլորտը` բիզնեսը:
Բացելով հանդիպումը ` ԱրՊՀ ռեկտոր Մանուշ Մինասյանը նշեց, որ ոչ ֆորմալ կրթության ծրագիրը բարերար ազդեցություն է գործում ուսանողների մտահորիզոնի ընդլայնման, մասնագիտական գիտելիքների և ընդհանուր զարգացման ու աշխարհում կատարվող իրադարձությունների վերաբերյալ պատկերացումների վրա:
Ներկայացնելով բանախոսներին` ռեկտորը նշեց, որ նրանցից Վահե Այվազյանը երկրորդ անգամ է հանդես գալիս ԱրՊՀ-ում: Նա մասնագիտությամբ տնտեսագետ է, ավարտել է Հայաստանի պետական տնտեսագիտական համալսարանը, բիզնեսի վերաբերյալ տարբեր դասընթացներ է անցել արտասահմանյան հեղինակավոր ուսումնական հաստատություններում և այսօր ամենաթանկ վճարվող բիզնես-թրեյներներից է:
Մայք (Մկրտիչ) Լազիևն ավարտել է ԵՊՀ-ն` ֆիզիկայի տեսություն մասնագիտությամբ, նաև հասցրել է սովորել Երևանի ֆիզիկայի ինստիտուտի ասպիրանտուրայում, բայց գործունեություն է ծավալել բիզնեսի բնագավառում: 20 տարի է` ապրում է Լոնդոնում, որից 16 տարին զբաղվում է թվային մարքեթինգով:
Մայք Լազիևի դասախոսությունը վերաբերում էր թվային մարքեթինգին: Նա որոշակի մանրամասներ ներկայացրեց այդ համակարգից (ինչպես է աշխատում այն): Բացատրեց, թե որն է թվային և մյուս մարքեթինգների միջև առկա տարբերությունները: Արդյո՞ք թվային մարքեթինգի առավելությունն այն է, որ այն համացանցի հետ է կապված: Նրա պարզաբանմամբ` թվային մարքեթինգն այն է, որը հնարավորություն է տալիս հենց տեղում գործողություն` վաճառք կատարել: Հայաստանում գործող մի շարք ընկերությունների օրինակով, որոնք մեծ հաջողությունների են հասել այդ բնագավառում, նա ցույց տվեց այն կարևոր բաղադրիչները, որոնք անհրաժեշտ են բիզնես-ոլորտը զարգացնելու համար: Դրանց մեջ նա կարևորեց վաճառքը, արդյունքը և հաճախորդներին մշտական դարձնելը:
Թվային մարքեթինգի կարևոր կարգախոսն է` հատկությունները չեն վաճառվում, վաճառվում է միայն օգուտը:
Հանրահայտ Բիլ Գեյթսն ասել է` մի քանի տարի հետո ձեր բիզնեսը կամ կլինի համացանցում, կամ` ընդհանրապես չի լինի: Ինչո՞վ է մեզ օգնում համացանցը: ՙDigitalin հանում է սահմանները, կապ չունի, թե դուք որտեղ եք, ինչ որ դուք անում եք այստեղ, կարող եք վաճառել Ամերիկայում: Դա համացանցն է. ձեզ կգտնեն, կտեսնեն, բայց եթե դուք այս ամենը ճիշտ ձևով կազմակերպեք և հասկանաք` ինչքան կրեատիվ մաս կա այս ամենի մեջ, ինչքան հետաքրքիր բան է թվայինը և ինչ հսկայական հնարավորություններ է տալիս ցանկացած մարդու: Դուք կարող եք լավ տեքստեր գրել, գեղեցիկ դիզայն անել, ինչ-որ գեղեցիկ միտք, գաղափար ունեք` տարածել: Սահմաններն այլևս չկան: Դրանք վերջացել են, գլոբալացվել են՚,-պարզաբանեց բանախոսը` հավելելով, որ ապագան թվայինինն է: Առաջին անգամ համացանցը` հեռախոսով, իսկ դա անցյալ տարի էր, աշխարհով մեկ գերազանցել է համակարգչով համացանցին: Հայաստանում և Արցախում օգտատերերի 61 տոկոսն օգտվում է հեռախոսով համացանցից, դա այն դեպքում, երբ տարիքային որոշակի խմբերն են դա այստեղ օգտագործում, քան Ամերիկայում: Նա օրինակ բերեց Հայաստանի իր ուսանողներից մի քանիսին, որոնք մտել են այդ գործի մեջ և սկսել իրենց փոքր բիզնեսը ֆեյսբուքով, մեսենջերով և այլն: Եվ այդ բիզնեսը նրանք չեն անում իրենց հարևանի հետ. նրանք դուրս են եկել եվրոպական երկրներ: Ի դեպ, պարզվեց, որ Արցախում էլ անմասն չեն այդ գործընթացներից:
Մարքեթինգում ամենաթանկ ծառայություններից մեկը կարգախոս գրելն է: Ինչպես տեղեկացրեց բանախոսը` մարքեթինգի խորհրդատուների մեջ շատ են ֆիզիկոսները, մաթեմատիկոսները, հոգեբանները, քան բուն մարքեթինգի մասնագետները: Նրա խոսքով` մարքեթինգը ճշգրիտ գիտություն է` հաշվված, ձևված, չափած:
Վահե Այվազյանի դասախոսության թեման կոչվում էր ՙԷմոցիոնալ վաճառքներ՚: Նրա խոսքով` այդ թեման նոր է, դա նոր ճյուղ է: Այդ տեսության հիմքը մարդու վարքագիծն է և պրակտիկ տնտեսագիտությունը: Դրա հեղինակն ինքն է և ընդամենը 3 թրենինգ է անցկացրել Երևանում: Դասընթացի հիմնական նպատակն է փոխել պատկերացումներն իրական վաճառքների մասին, միաժամանակ օգնել բացահայտելու մարդու էմոցիաները: Գիտնականները պարզել են, որ գոյություն ունեն 500-ից ավելի զգացումներ` ուրախություն, հրճվանք, նվիրվածություն, խղճմտանք և այլն: Հետաքրքիրն այն է, որ վաճառքում բացասական զգացումները նույնպես շատ ուժեղ են ազդում:
Զբաղվել վաճառքով, մարքեթինգով և անտեսել մարդուն, նրա էմոցիաները, հաջողության չես հասնի` պարզաբանեց մասնագետը: ՙՊետք է կարողանալ ճիշտ աշխատել մարդու էմոցիաների վրա: Լավ ճանաչելով դրանք` կհասնենք մեծ արդյունքի վաճառքում՚,-ասաց նա:
Այնուհետև Վահե Այվազյանը բացատրեց, թե թվերը, բառերը, տեղեկատվությունը ինչպես գրավիչ դարձնել մարքեթինգում: Այսպես` փոխանակ գրելու ՙմեկ ժամ համակարգչով խաղը` 300 դրամ է՚, պետք է գրել` ՙ60 րոպեն` 300 դրամ՚ և այլն: Նա բացատրեց մարդկանց վրա ազդելու նաև այլ հնարքներ: Անկեղծ ասած` ներկաներից ոչ բոլորին դուր եկավ այդ մեթոդը:
Բանախոսները պատասխանեցին նաև ներկաների հարցերին:
Սվետլանա ԽԱՉԱՏՐՅԱՆ