ԲԵՐԴԱՔԱՂԱՔ. ՆԱԽԱՊԱՏՐԱՍՏՈՒԹՅՈՒՆ ԱՄԱՆՈՐՅԱ ՏՈՆԱԿԱՏԱՐՈՒԹՅՈՒՆՆԵՐԻՆ
Շրջանում ամանորյա տոնական միջոցառումները կազմակերպված անցկացնելու համար Շուշիի շրջվարչակազմի ղեկավարի կարգադրությամբ ստեղծվել է շրջանային հանձնաժողով, հաստատվել ամանորյա տոնական միջոցառումների անցկացման ծրագիրը:
Համաձայն ծրագրի` դեկտեմբերի սկզբից մեկնարկել են փողոցների, հրապարակների, զբոսայգիների ամանորյա ձևավորման, լուսային սարքերի տեղադրման, ինչպես նաև Վ. Սարգսյանի անվան հրապարակում և Շուշիի խաչմերուկին կից պուրակի տոնածառերի զարդարման աշխատանքները: Քաղաքապետարանի վերահսկողությամբ հիմնարկ-կազմակերպությունների տնօրեններն ու առևտրային կետեր ունեցող անհատ ձեռնարկատերերը մինչև դեկտեմբերի վերջը պետք է ավարտին հասցնեն նշված օբյեկտների սանմաքրման և տոնական ձևավորման աշխատանքները: Համայնքներում, մշակույթի օջախներում, կրթական հաստատություններում կկազմակերպվեն տոնական միջոցառումներ, համերգներ, ներկայացումներ, պարերեկո, գրական-գեղարվեստական ցերեկույթներ, կկատարվեն այցելություններ հաշմանդամ ազատամարտիկներին:
Բերդաքաղաքի Վ. Սարգսյանի անվան հրապարակում, Խաչմերուկին կից պուրակում դեկտեմբերի 30-ին ժամը 16:00-ին տեղի կունենա Ամանորյա տոնական միջոցառում-համերգ՝ Շուշիի մշակութային օջախների և ստեղծագործական խմբերի մասնակցությամբ: Ոստիկանության շրջանային բաժինը տոնակատարության ընթացքում հոգ կտանի հասարակական կարգուկանոնի պահպանման մասին, ՙԱրցախէներգո՚ ՓԲԸ-ն կապահովի կայուն էներգամատակարարում, Շուշիի հիվանդանոցը կսահմանի շտապօգնության շուրջօրյա հերթապահություն:
Շրջվարչակազմի ղեկավարի վերոնշյալ կարգադրությունը պարտավորեցնում է շրջվարչակազմի պատասխանատուներին, ենթակառույցների ղեկավարներին աջակցել շրջանային հանձնաժողովին` ամանորյա տոնական միջոցառումները պատշաճ մակարդակով անցկացնելու համար:
Անահիտ ԳԱԲՐԻԵԼՅԱՆ
ք. Շուշի