ԱՇԽԱՏԱԺՈՂՈՎ` ՆՎԻՐՎԱԾ ԲՈՒՀԵՐԻ ՀԱՎԱՏԱՐՄԱԳՐՄԱՆԸ

Դեկտեմբերի 24-25-ը Արցախում էր ՀՀ ՙՄասնագիտական կրթության որակի ապահովման ազգային կենտրոն՚ հիմնադրամի (ՈԱԱԿ) պատվիրակությունը` տնօրեն Ռուբեն Թոփչյանի գլխավորությամբ:

Արցախի պետական համալսարանում ՙՈրակի ապահովման համակարգ. ինստիտուցիոնալ հավատարմագրում՚ թեմայով տեղի ունեցավ աշխատաժողով, որին ներկա էին Արցախում գործող համալսարանների ռեկտորները, բուհերի ինքնավերլուծություն իրականացնող խմբերի ներկայացուցիչները: 

Նշենք, որ  ԱՀ կառավարության որոշմամբ` մինչև 2019թ. դեկտեմբերի 30-ը Արցախում գործող բոլոր բուհերը պարտադիր պետք է անկախ կառույցի կողմից անցնեն հավատարմագրման:  Նման կառույցը  Հայաստանում  ՈԱԱԿ-ն է, որը Բարձրագույն կրթության որակի ապահովման եվրոպական ասոցիացիայի անդամ է, գրանցված է Բարձրագույն կրթության որակի ապահովման գրանցամատյանում /EQAR/, և նրա կողմից հավատարմագրված բուհերը տեսանելի են եվրոպական կրթական տարածքում: 

ՀՀ  ՈԱԱԿ-ը  երկրորդ անգամ էր աշխատաժողով կազմակերպում Արցախում: Առաջինն այս տարվա հունիսին էր, որի ժամանակ Ռ. Թոփչյանի ղեկավարած պատվիրակությունը պարզաբանեց բուհերի հավատարմագրման էությունը, նշանակությունը, անհրաժեշտ քայլերը, անցկացրեց սեմինար բուհերի վերլուծություն իրականացնող խմբերի հետ: 

Աշխատաժողովի մասնակիցներին  ողջունեց և արդյունավետ աշխատանք մաղթեց ԱրՊՀ ռեկտոր Արմեն Սարգսյանը: Նա նշեց, որ հավատարմագրման գործընթացը մեծ ծավալի աշխատանք է բուհի ներսում պահանջում և շնորհակալություն հայտնեց ՀՀ ՈԱԱԿ-ի անձնակազմին` ցուցաբերած մասնագիտական աջակցության համար: Նախկինում Արցախի և ՀՀ պետական բուհերը հավատարմագրում չունեին, քանի որ ընդունված էր, որ եթե հիմնադիրը կառավարությունն է, դրա անհրաժեշտությունը չկա: Իսկ եթե այսօր բուհը  հավատարմագրված չէ, կորցնում է իր գործունեության լիցենզիան:

Ռ. Թոփչյանը նաև տեղեկացրեց, որ աշխարհում  հավատարմագրումը երկու գործընթացից է բաղկացած` ինստիտուցիոնալ  և ծրագրային: Ի տարբերություն այլ երկրների, Հայաստանի առանձնահատկությունները հաշվի առնելով,  սկսել են ինստիտուցիոնալ հավատարմագրումից: Ընդ որում, Հայաստանում  հավատարմագրման երկրորդ շրջափուլն  է արդեն սկսվել, իսկ  Արցախում այն առաջին անգամ պետք է իրականացվի: 

Ռ. Թոփչյանը ներկայացրեց ինստիտուցիոնալ հավատարմագրման մեխանիզմները, դրան ներկայացվող չափանիշներն ու չափորոշիչները:

Աշխատաժողովի առաջին մասում նա ներկայացրեց հավատարմագրմանն անհրաժեշտ հիմնական դրույթները: Այսօրվա մրցակցության պայմաններում յուրաքանչյուր բուհ ցանկանում է պահպանել իր տեղը, իսկ դրա համար նա պետք է իր առջև հստակ նպատակներ դնի և իրատեսական ռազմավարություն մշակի դրանց հասնելու համար` ելնելով երկրի պահանջներից և սեփական ռեսուրսներից: 

Ռ. Թոփչյանը պարզաբանեց, որ որակի ապահովումը  հենց այն մեխանիզմն է, որը հնարավորություն է տալիս քայլ առ քայլ  բարեփոխել կրթական համակարգը: Բուհի խնդիրը ոչ միայն մասնագիտական կրթություն տալու մեջ է, այլև  քննադատական-վերլուծական, նորարարական, ստեղծագործելու, մարդկանց կառավարելու, միմյանց հետ համաձայնեցված գործելու, դատողություններ անելու և որոշում կայացնելու, բանակցելու, ճկուն մտածողությամբ կարողություններ ձևավորելու մեջ է: ՙԱյս կարողությունները պետք է ներառել ուսուցման ձևերի մեջ, և դա կլինի որակի բարելավման ձեր ռազմավարությունը: Որակն այն է, որ դուք պետք է դնեք նպատակ, և այդ նպատակին հասնելու համար համապատասխան  գործողության դիմեք՚,-ասաց Ռ. Թոփչյանը: 

Ռ. Թոփչյանը կարևորեց  բուհերում աշխատանքային պլաններ ունենալու հանգամանքը, անդրադարձավ դասախոսների վերապատրաստմանը, կրթական ծրագրերի ցանկի վերանայմանը և այլ խնդիրների, պատասխանեց տրված հարցերին: Օրվա երկրոդ կեսին պատվիրակության անդամներն աշխատեցին ԱրՊՀ-ում նախօրոք ստեղծված հանձնաժողովի հետ:Հաջորդ օրը նույն օրակարգով աշխատանքները շարունակվեցին ինչպես ԱրՊՀ-ում, այնպես էլ ՙԳրիգոր Նարեկացի՚ համալսարանում: ՙՄեսրոպ Մաշտոց՚ համալսարանը պատրաստվում է ՀՀ ՈԱԱԿ-ի ներկայացուցիչներին հրավիրել մի փոքր ավելի ուշ:

 Այն մասին, թե հաջորդ այցն երբ է նախատեսվում, Ռ. Թոփչյանը մեզ հետ զրույցում ասաց, որ, բուհերի համաձայնության դեպքում, մայիսին կանցկացնեն փորձնական հավատարմագրում: Առայժմ դեռ նախատեսված չէ ծրագրային հավատարմագրումը, քանի որ դա կամավոր է, և բուհերը դեռ չեն դիմել ՈԱԱԿ-ին: Իսկ թե ինչքան ժամանակով է կատարվում հավատարմագրումը,  պատասխանեց, որ հավատարմագրումը շնորհվում է որոշակի ժամկետով: Կան համալսարաններ, որոնք խնդիրներ ունեն,  երկու տարով են ստանում հավատարմագրումը, կան, որ ավելի շատ ժամանակով:  Բոլոր դեպքերում այդ ժամկետն ավարտվելուց հետո բուհերը պետք է նորից դիմեն ՈԱԱԿ-ին և վերահավատարմագրվեն: Դա շրջափուլային գործողություն է: 

Սվետլանա ԽԱՉԱՏՐՅԱՆ