ԹՈ՜Ղ 2019-Ը ՄԻԱՅՆ ՀԱՂԹԱՆԱԿՆԵՐԻ ՏԱՐԻ ԼԻՆԻ
Արցախի մարզական տարին ամփոփում է ԱՀ ԿԳՍՆ սպորտի վարչության պետ, սամբոյի Եվրոպայի չեմպիոն, աշխարհի կրկնակի չեմպիոն, աշխարհի գավաթակիր, սպորտի վաստակավոր վարպետ Աշոտ ԴԱՆԻԵԼՅԱՆԸ
-Պարոն Դանիելյան, ինչպիսի՞ն էր անցնող տարին Արցախի մարզաշխարհի համար:
-Եթե համեմատենք 2017-ի հետ, 2018-ն ավելի արդյունավետ տարի էր: Այդ մասին նաև տարեվերջին ԱՀ Նախագահի կողմից պարգևատրված մարզիկների քանակն է խոսում, հաղթանակներ բերած մարզաձևերի բազմազանությունը: Բերենք մի քանի տվյալներ. այս տարի Արցախի մարզիկները մասնակցել են աշխարհի շուրջ 20 առաջնության տարբեր տարիքային խմբերում: Մասնակիցների քանակը` 76, ունեցել ենք մեկ 1-ին, տասնմեկ` 3-րդ, երկու 5-րդ տեղ: 75 մարզիկ մասնակցել է Եվրոպայի 25 առաջնությունների. ունենք հինգ 1-ին, տասնմեկական` 2-րդ և 3-րդ տեղեր: 39 անգամ` 238 հոգի մասնակցել է միջազգային տարբեր մրցաշարերի, ունենք երեսուն 1-ին, քառասունմեկ` 2-րդ, քսանյոթ 3-րդ տեղ: Իսկ ՀՀ 125 առաջնություններին մասնակցել է 1438 հոգի: 1-ին տեղում ունեցել ենք 116 հոգի, 2-րդ` 87, 3-րդ` 97: Կարող եմ ասել, որ տարեցտարի ավելանում է մեր մարզիկների և սպորտով պարապողների թիվը: Եվ դա շատ ողջունելի է, որպեսզի մեր հանրապետությունում կարողանանք առողջ ապրելակերպ սերմանել: Առողջ ապրելակերպը մանուկ հասակից պետք է սովորեցնել երեխային, որպեսզի նա այդ տարիքից գիտակցի` ինչ է պայքարելը, դժվարությունները հաղթահարելը, հաղթանակի բերկրանքը:
- Նշեք ճանաչված մարզիկներից մի քանիսին:
- Այս տարի մենք ունեցանք մեծահասակների Եվրոպայի և աշխարհի չեմպիոն կիոկուշին կարատե մարզաձևից` Արթուր Առուշանյան, պատանիներից` Վարդան Ղալայան, երիտասարդներից Եվրոպայի չեմպիոն Միքայել Մխիթարյան` կարատե, իսկ ուշուից աշխարհի երիտասարդական առաջնությունում չեմպիոն` Արսեն Բաղրյան, սամբոյի գծով Եվրոպայի գավաթակիր Սերգեյ Կարապետյան: Տարին եզրափակեցինք չեմպիոններով: Նոյեմբեր-դեկտեմբեր ամիսներին ունեցանք աշխարհի և Եվրոպայի 3 չեմպիոն:
-Ամփոփենք. ո՞ր մարզաձևերից են մեր մարզիկները պարգևատրման արժանացել, ավելի շատ ո՞ր մարզաձևերն են տարածված Արցախում:
-Կարելի է ասել` գրեթե բոլոր մարզաձևերից ունենք արդյունքներ. կիոկուշին կարատե, ուշու, օլիմպիական կարատեից այս տարի ունեցանք Հայաստանի չեմպիոն: Սամբո մարզաձևից ամենից շատ արդյունքներն ունենք և՜ մեդալների, և՜ մարդկանց քանակով: Խառը /MMA/ մենամարտերից ունենք, մուայ թայից, ուժային եռամարտից, երկար տարիներից հետո այս տարի բռնցքամարտից ունեցանք Եվրոպայի մրցանակակիր (Քերթ գյուղից` Մանվել Պետրոսյան), շախմատից, ձյուդոյից ևս ունենք: Հայաստանի առաջնություններում էլ ապահովել ենք արդյունքներ` թաեքվոնդո, սեղանի թենիս, աթլետիկա: Տղամարդկանց վոլեյբոլի հավաքականը 1-ին տեղ գրավեց Հայաստանի առաջնությունում, նույնը և` բասկետբոլի թիմը: Հանդբոլի տղամարդկանց թիմը 2-րդ տեղը գրավեց, իսկ կանանց վոլեյբոլի թիմը` 3-րդ տեղը:
-Ի՞նչ կասեիք մարզադահլիճների, մարզահրապարակների մասին:
-Տարեցտարի դրանց քանակն ավելանում է: ՙՀայաստան՚ համահայկական հիմնադրամի միջոցներով Ստեփանակերտի Ազատամարտիկների փողոցին հարող բակերից մեկում այս տարի հանդբոլի դաշտ է կառուցվել: Առաջիկայում պիտի կառուցվեն նոր մարզադահլիճներ, կառուցվում է մարզամշակութային համալիրը ՙՏաշիր գրուպ՚-ի հովանավորությամբ: Շրջաններում ևս ունենք լավ մարզակառույցներ, ճիշտ է, ոչ ամեն տեղ, բայց ավելի լավ, քան կան մայրաքաղաքում: Ուղղակի մենք հիմա մասնագետների պակաս ունենք, հատկապես մարզիչների կարիք է զգացվում շրջաններում: Օրինակ, նախանցյալ տարի Ճարտար և Գիշի համայնքներում կառուցվել են մարզադահլիճներ, սակայն Ստեփանակերտից են մասնագետները գնում, պարապմունքներն անցկացնում: Հուսով ենք, որ արդյունքները շուտով կերևան, և այդ համայնքները սեփական մարզիչներ կունենան:
- Ֆեդերացիաների մասին:
-Ֆեդերացիաներն Արցախում 22-ն են, դրանք պետությունից ստանում են աջակցություն: Նոր ֆեդերացիաներ չեն ստեղծվել, ավելի շատ ուշադրությունն ուզում ենք ուղղել օլիմպիական մարզաձևերին, որովհետև ցանկացած երկրում ավելի շատ տեղ են տալիս դրանց, պետությունն ավելի շատ ճանաչվում է դրանցով: Ունենք մարզաձևեր, որոնք այս տարի ՄՕԿ-ի կողմից ժամանակավոր ճանաչում են ստացել: Մենապայքարային մարզաձևից ըմբշամարտը, ձյուդոն օլիմպիական մարզաձևեր են, իսկ մուայ թայը, սամբոն, քիք բոքսինգը ժամանակավոր ճանաչում են ստացել ՄՕԿ-ի կողմից, երևի 2020թ. կորոշվի դրանց ապագան:
- Օլիմպոսն անկասկած բոլորի երազանքն է …
- Ամեն տարի մեր մարզիկները պարգևատրվում են, բայց, ցավոք, օլիմպիական մարզաձևերից բարձր նվաճումներ դեռ չունենք: Մեր երազանքը դա է, և մեր աշխատանքները տանում ենք այդ ուղղությամբ:
Վստահ եմ` մեր երազանքն իրականանալու է. եթե ոչ օլիմպիական չեմպիոն, օլիմպիադային մասնակից ունենալու ենք: Պետությունն էլ աջակցում է: Դա տեսանելի է թեկուզ պարգևատրվողների քանակից. այս տարի ԱՀ Նախագահի և կառավարության կողմից պարգևատրվել է 136 հոգի: Նրանց մեջ նաև բարձր նվաճումներ արձանագրած մարզիկների մարզիչներն են: Դրամական այդ պարգևները մեծ խթան են: Տարիներ առաջ մարզիկներին հղված շնորհավորանքը միայն բարոյական էր, իսկ հիմա նաև նյութական բովանդակություն ունի: Մարզիկը հիմա գիտի, որ բարձր տեղ գրավելն իր համար նաև գումար վաստակելու միջոց է:
- Այս տարին հիշարժան էր նաև նրանով, որ ստեղծեցիք Արցախի մարզիկների միություն` ԱՄՄ:
- Դա նույնպես խթանելու է սպորտի զարգացմանը, մարզիկների սոցիալական խնդիրների լուծմանը: Մեր մարզիկներից ոմանք բանակում ծառայությունն ավարտելուց հետո չեն շարունակում սպորտը հենց այդ պատճառով. ընտանիք կազմելով` չեն հասցնում հոգալ կարիքները: ԱՄՄ հիմնական գործառույթը դա պետք է լինի:
- 2018 թվականը նաև Ձեր անձնական հաջողության տարի էր. երեք դստրիկներից հետո ունեցաք որդի…
- Իմ կարծիքով, արցախցու ընտանիքում պետք է առնվազն 4 երեխա լինի: Յուրաքանչյուր արցախցի պետք է նաև մտածի, որ երեխան միայն իրենը չէ, նաև Հայրենիքինն է:
-Ի՞նչ կմաղթեք մարզիկներին, մարզասերներին և ընդհանրապես` հանրությանը:
-Նոր տարում բոլորին մաղթում եմ նորանոր հաջողություններ, ամենակարևորը` առողջություն. մանավանդ մարզիկի համար դա ամենակարևորն է:
Թող 2019-ը լինի միայն հաղթանակների տարի: