ԱՌԱՎԵԼԱԳՈՒՅՆ ՈՒՇԱԴՐՈՒԹՅՈՒՆ՝ ԳՅՈՒՂԱԿԱՆ ԴՊՐՈՑՆԵՐԻՆ
Էմմա ԲԱԼԱՅԱՆ
Որ այսօրվա սերունդը պետության վաղվա դեմքն է, բոլորն են հասկանում: Բայց կրթական խնդիրները, հատկապես դպրոցի, այն էլ՝ գյուղական, մնում են չլուծված ու հրատապ: Անշուշտ, կան որոշ դրական միտումներ, բայց հիմնահարցերի անհրաժեշտ լուծումները տարեցտարի հետաձգվում են, ինչը պատասխանատվության խնդիր է բերում մի ամբողջ սերունդի առջև: Վերջերս, ներկա գտնվելով Թելման Հարությունյանի հիշատակին նվիրված միջոցառմանը, որը պատշաճ մակարդակով անցկացվեց Կարեն Առաքելյանի անվան դպրոցի ուժերով, հետաքրքրվեցինք նաև դպրոցի կյանքով: Ըստ Կիչանի և Նոր Ղազանչի գյուղերի միացյալ դպրոցի տնօրեն Կարինե Առաքելյանի, դպրոցը կառուցվել է 1997-ին, քանի որ Կիչանի հին դպրոցն ավերվել էր պատերազմի հետևանքով: Դպրոցը կոչեցին ՙԽաչեն՚` գումարտակի հրամանատար Կարեն Առաքելյանի անունով: Դպրոցում սովորում է 82 աշակերտ: Եթե սկզբնական փուլում, երբ բնակչության թիվը պակաս էր, շենքային պայմանները բավարարում էին, ապա հետո, վերաբնակեցման հետևանքով, աշակերտների թիվը շատացավ, և առաջ եկավ դասասենյակների անբավարարության խնդիր: Չկան առանձին առարկայական կաբինետներ, լաբորատորիաներ: Եղած փոքրիկ դահլիճն օգտագործվում է որպես դասարան: Չկա նաև մարզադահլիճ: Այս վերջին խնդիրներին արձագանքեց ՀՀ-ում գործող ՙՀայկական գվարդիա՚ հասարակական կազմակերպությունը, որի անդամն է Կարեն Առաքելյանի եղբայր Արմեն Առաքելյանը, ով մշտապես հետաքրքրվում է դպրոցի խնդիրներով: Նախնական պայմանավորվածությամբ՝ ամռանը կազմակերպության աջակցությամբ կսկսվի կցակառույցի շինարարությունը, արդյունքում դպրոցը կունենա լրացուցիչ ևս երկու դասարան, կկառուցվի նաև մարզադահլիճ:
Ինչ վերաբերում է մասնագետների խնդրին, տնօրենի տեղեկատվությամբ, դպրոցը համալրված է անհրաժեշտ մասնագետներով` բացառությամբ քիմիա առարկայի: 3-4 տարի դպրոցը չուներ քիմիայի ուսուցիչ, այս տարի ֆիզիկայի մասնագետին համապատասխան քննության արդյունքներով թուլատրվել է դասավանդել քիմիա մինչև տարվա վերջ՝ այն ակնկալիքով, որ դպրոց կգործուղվի քիմիայի մասնագետ: Նախարարությունը տեղյակ է խնդրին, սակայն, ինչպես պարզվեց, մի շարք դպրոցներում դա օրախնդիր է: Կարինե Առաքելյանի խոսքով, դպրոցում կան երեխաներ, ովքեր կցանկանային շարունակել բարձրագույն կրթությունը այդ մասնագիտությամբ, բայց ԱրՊՀ-ում բացակայում է այդ ֆակուլտետը:
Տնօրենը բարձրացրեց ևս մի հարց՝ կապված գործուղված մասնագետների հավելավճարի հետ: Գործող օրենքով գործուղված մասնագետին 3 տարվա ընթացքում հասնում է սահմանված հավելավճար, որից հետո կնքվում է 3 տարվա ժամկետով նոր պայմանագիր, ըստ որի` շարունակվում է հավելավճարի փոխանցումը: Դրանից հետո այդ ուսուցիչը հաշվառվում է որպես հիմնական կադր, և նրան այլևս չի տրվում հավելավճար: Բայց երիտասարդ այդ մանկավարժներն ապահովված չեն տնով, ապրում են վարձով և ստիպված են լինում հեռանալ, ինչի հետևանքով առաջ է գալիս նույն խնդիրը: Ըստ տնօրենի՝ դրան պետք է հիմնովին լուծում տալ` կա՜մ այդ 6 տարվա ընթացքում գործուղված մասնագետը ապահովվում է բնակտարածքով, կա՜մ շարունակվում է հավելավճարի փոխանցումը: Ներկա դրությամբ դպրոցը կանգնած է նման խնդրի առաջ. 3 մասնագետ՝ մաթեմատիկայի, ֆիզիկայի և ռազմագիտության ուսուցիչներն ապրում են վարձով, հավելավճար էլ չեն ստանում, և վաղը հնարավոր է կրկին բախվեն մասնագետների պակասի հետ:
Սակայն խնդիրները խոչընդոտ չեն, որպեսզի դպրոցը դաստիարակի հայրենիքի նվիրյալներ: Ըստ Կարինե Առաքելյանի՝ դպրոցի գործունեության առաջին իսկ օրերից սկսվեց հայրենասիրական մի գործընթաց, ինչն այն նվազագույնն էր, որ դպրոցը կարող էր մատուցել մեր քաջարի, անձնուրաց ազատամարտիկներին. բոլոր դասարաններն անվանակոչվեցին հերոսացած ազատամարտիկների անուններով: Ամեն սեպտեմբերի 1-ին տեղի է ունենում հայրենասիրության դաս. երեխաները երդվում են լինել արժանի մեր տղաների սխրագործությանը, բարձր պահել նրանց անունները: Որոշվում է տվյալ դասարանը կոչել զոհված ազատամարտիկների մեկի անունով, որի մասին դասարանը պետք է նյութեր հայթայթի, ներկայացնի հանդիսավոր միջոցառմանը՝ հրավիրելով հարազատներին, մերձավորներին: Եվ այդպես` մինչև 12-րդ դասարանը: Այդ ամենը կատարվում է Պատվո անկյունում, որտեղ տեղադրված են զոհվածների լուսանկարները, նրանց համառոտ կենսագրականը:
Այս տարի բացվել են ազգագրական երգ ու պարի, թատերական դասարաններ, որոնք գործում են Վանք գյուղի Արվեստի դպրոցի նշված բաժիններին կից: Թատերական խմբի դասատու Գենադի Առուշանյանը շատ ոգևորված է, նա համոզված է, որ այստեղ տաղանդներ կբացահայտվեն, քանզի շատ շնորհալի երեխաներ կան: Դպրոցի տնօրենը, տեղեկացված լինելով, որ ԱՀ կրթության, գիտության և սպորտի նախարարության կողմից պատրաստվում է բարեփոխումների նախագիծ, հուսով է, որ այս անգամ գյուղական դպրոցների ցավոտ հարցերը պատշաճ լուծում կստանան:
;