ԱՐԻՈՒԹՅԱՆ ԴԱՍՆ ԱՆՑԱՎ ԿԱՌՈՒՑՈՂԱԿԱՆ ՔՆՆԱՐԿՄԱՆ ՄԹՆՈԼՈՐՏՈՒՄ
Սվետլանա ԽԱՉԱՏՐՅԱՆ
Մայիսյան եռատոնի նախօրեին, ավանդույթի համաձայն, արիության դասեր անցկացվեցին հանրապետության բոլոր ուսումնական հաստատություններում` ՊԲ բարձրագույն հրամկազմի, բանակի ստորաբաժանումների հրամանատարների մասնակցությամբ:
Մայիսի 7-ին Արցախի պետական համալսարան այցելեցին ԱՀ պաշտպանության նախարար, ՊԲ հրամանատար, գեներալ-մայոր Կարեն Աբրահամյանը, կրթության, գիտության և սպորտի նախարար Նարինե Աղաբալյանը:
Ողջունելով հյուրերին` ռեկտոր Արմեն Սարգսյանն ասաց, որ նախարարի կարգավիճակով Կ. Աբրահամյանն առաջին անգամ է լինում ԱրՊՀ-ում, ով պետք է վարի արիության դասը:
Գեներալ-մայոր Կ. Աբրահամյանը դասախոսության ընթացքում անդրադարձավ հայ ժողովրդի կյանքում բախտորոշ նշանակություն ունեցած մայիսյան հաղթանակներին. 451թ.` Ավարայր, 1918թ.` Սարդարապատ, Հայաստանի առաջին հանրապետության հռչակում,1945թ. մայիսի 9` Հայրենական մեծ պատերազմում տարած հաղթանակ, 1992թ. հայոց հինավուրց Շուշիի ազատագրում և Պաշտպանության բանակի կազմավորում: Այդ բոլոր հաղթանակներն ազգային միասնության արդյունք են, ընդգծեց նախարարը. ՙԱյսօր մենք միասնական չլինելու իրավունքը չունենք: Առավել քան երբևէ պետք է պահպանենք ու վառ պահենք 88-ի միասնության ոգին: Սեփական ուժերով մարտահրավերներին դիմակայելու վստահություն պետք է ունենանք, որովհետև ոչ ոք մեր փոխարեն չի կարող լուծել մեր երկրի առաջ ծառացած խնդիրները: Ոչ ոք չի կարող մեզ պաշտպանել, զարգացնել մեր տնտեսությունը, ամրապնդել ժողովրդավարությունն ու Արցախը դարձնել առաջադեմ պետություն: Այդ ամենը պետք է անենք ինքներս: Սա է թերևս Մայիսյան եռատոնի ամենամեծ խորհուրդը՚:
Ներկայացնելով անկախ պետության կայացման ու զարգացման, երկրի ու ժողովրդի անվտանգության գործում Պաշտպանության բանակի ստեղծման, կայացման ու զարգացման առանցքային փուլերը, պաշտպանության նախարարն այնուհետև անդրադարձավ բանակաշինության մեջ ներկայումս ընթացող գործընթացներին և դրանում բանակ-հասարակություն հարաբերություններին: Ամբողջ դասի ընթացքում կարմիր թելի պես անցնում էր այն գաղափարը, որ Արցախի Հանրապետության երաշխավորը մեր բանակն է, և բանակաշինության հետագա գործընթացը պետք է մշտապես լինի համապետական, համազգային գործ:
Մայիսյան եռատոնի առթիվ շնորհավորեց ԱՀ կրթության, գիտության և սպորտի նախարար Նարինե Աղաբալյանը: Նախարարը նշեց, որ յուրաքանչյուր սերունդ իր բաժին պայքարն ունի, և այդ առումով այսօրվա ավագ սերունդը երջանիկ է, որ մասնակիցն ու ականատեսն է մեր ազգային-ազատագրական պայքարին և ապահովել է փառահեղ հաղթանակներ, աշխարհին ճանաչելի է դարձել` որպես հերոս, արժանապատիվ ազգ: Նա ընդգծեց, որ այս տարի լրանում է զինադադարի հաստատման 25 տարին, և այդ բոլոր տարիներին խաղաղությունը պաշտպանել է մեր բանակը: Պաշտպանության բանակը սնուցում են կրթական հաստատությունները, և խիստ կարևորվում է, թե երիտասարդներն ինչպիսի պատրաստությամբ և տրամադրությամբ են համալրում ՊԲ շարքերը: Այդ առումով ցանկալի է, որ նման հանդիպումները բուհերում հաճախակի լինեն: ՙՀաղթանակները, նվաճումները պահպանելն ու պաշտպանելը նույնպես շատ դժվար և պատվաբեր առաքելություն է: Ավելի քան վստահ եմ, որ յուրաքանչյուր նոր սերունդ ավելի մեծ պատասխանատվությամբ է կատարելու այդ առաքելությունը՚:
Արիության դասն անցավ կառուցողական քննարկման մթնոլորտում:
Հանդիպմանն ուսանողներն ու դասախոսները հարցեր ուղղեցին պաշտպանության նախարարին:
Ռեկտոր Ա. Սարգսյանի հարցին, թե ինչպիսին է այսօր իրավիճակը սահմանում և ինչի հետ են կապված վերջին սրացումները, պաշտպանության նախարարն իրադրությունը գնահատեց հարաբերական կայուն. հակառակորդը, ինչպես միշտ, իր բնորոշ ձեռագրով սադրանքներ է անում, բայց հայկական կողմը պատրաստ է ցանկացած լարվածության, և հավաստիացրեց, որ այն բոլոր աշխատանքները, որ իրականացվել և իրականացվում են առաջնագծում, հնարավորություն են տալիս լիարժեք գնահատել և վերահսկել հակառակորդի բոլոր գործողությունները: ՙՏեխնիկական հագեցվածությունը և ինժեներական միջոցները մեզ վստահություն են տալիս լիարժեք իրականացնել մեր ծառայությունը, մարտական հերթապահությունը, պետական սահմանի պահպանությունը: Մենք ի վիճակի ենք ոչ միայն պաշտպանվել, այլև ցանկացած պահի հարված հասցնել՚,-ասաց նա:
Բանակային ծառայությունն ավարտած ուսանողներին պաշտպանության նախարարը հրավիրեց լինել իրենց ծառայած դիրքերում և համեմատել 1-2 տարի առաջվա և ներկայիս պայմանները:
Հարցեր հնչեցին զինվորական համազգեստի որակի բարելավման, սպաների ընտանիքներին բնակարանով ապահովման վերաբերյալ: Նախարարի խոսքով՝ դրանք օրակարգում են: ԿԳՍ նախարար Ն. Աղաբալյանի առաջարկությանը՝ կամավորների ստորաբաժանում ստեղծել աղջիկների համար՝ դատելով տարբեր հանդիպումների ժամանակ արտահայտած նրանց ցանկությունից, պաշտպանության նախարարը պատասխանեց, որ կքննարկեն: Նա հորդորեց դասախոսներին խստապահանջություն ցուցաբերել հեռակա կարգով սովորող սպաների նկատմամբ, որպեսզի նրանք բավարար չափով գիտելիքներ ունենան և, ընդհանրապես, ցանկություն հայտնեց իրենց կողմից էլ վերահսկելի դարձնել նրանց կրթության գործընթացը: Պաշտպանեց բոլոր քաղաքացիների մարտական պատրաստության մակարդակը բարձրացնելու առաջարկը:
Հանդիպման վերջում ռեկտոր Ա. Սարգսյանն արժեքավոր գրքեր նվիրեց նախարարներին: Իր հերթին պաշտպանության նախարարը գրքեր հանձնեց համալսարանին, որոնց մի մասը կտրվի լավագույն ուսանողներին:
;