ԱՍՄՈՒՆՔԻ ՓԱՌԱՏՈՆՆ ԱՅՍ ԱՆԳԱՄ ՆՎԻՐՎԱԾ ԷՐ ՀՈՎՀԱՆՆԵՍ ԹՈՒՄԱՆՅԱՆԻՆ
Նվարդ ՍՈՂՈՄՈՆՅԱՆ
Հուլիսի 30-ին Շուշիի Խաչատուր Աբովյանի անվան միջնակարգ հոսքային դպրոցում մեկնարկեց Ասմունքի 8-րդ համահայկական փառատոնը, որն այս անգամ նվիրված էր հայ մեծանուն բանաստեղծ Հովհ. Թումանյանին, որի 150-ամյակը լրացել և նշում է համայն հայությունը։ Փառատոնը շարունակում է համահայկական դաշտում պահպանել հետաքրքրությունն իր նկատմամբ. Արցախ էին ժամանել 130 մասնակիցներ Իրանից, Վրաստանից, Ամերիկայի Միացյալ Նահանգներից, Ռուսաստանի Դաշնությունից, Հայաստանից։ Փառատոնին մասնակցում էին դպրոցականներ Արցախի բոլոր շրջաններից։
Ասմունքի փառատոնի հանձնախմբի կազմում են անվանի մտավորականներ՝ գիտնականներ, արվեստագետներ. ԵրՊՀ հայ գրականության պատմության ամբիոնի վարիչ, բանասիրական գիտությունների դոկտոր, պրոֆեսոր Սամվել Մուրադյանը, ԵրՊՀ դասախոս, պրոֆեսոր Գուրգեն Մելիքյանը, արվեստագետ Աղասի Թադևոսյանը, Երևանի կինոյի և թատրոնի պետական ինստիտուտի ավագ դասախոս, բեմական խոսքի վարպետ Մարինե Մխիթարյանը, Ստեփանակերտի Հովհ. Թումանյանի անվան մանկական գրադարանի տնօրեն Նաիրա Աղաջանյանը, Շուշիի Մկրտիչ Խանդամիրյանի անվան դրամատիկական թատրոնի գեղարվեստական ղեկավար, ժողովրդական արտիստ Լեոնիդ Հարությունյանը, լիբանանահայ դերասանուհի և նկարչուհի Սիրվարդ Ֆազլեյանը: Ասմունքի փառատոնի անփոփոխ նախագահն է ԵրՊՀ հայ բանասիրության ֆակուլտետի դեկան, բանասիրական գիտությունների դոկտոր, պրոֆեսոր, ՀՀ գիտության վաստակավոր գործիչ Արծրուն Ավագյանը։
Արդեն ավանդական դարձած համահայկական միջոցառման հովանավորն է Հայ կրթական հիմնարկությունը։
Փառատոնի մասնակիցները մեկ րոպե լռությամբ հարգեցին հայ մեծանուն բանաստեղծի հիշատակը։
Միջոցառումը բացեց, բարի երթ և հետաքրքիր առօրյա մաղթեց ՙՇուշի¬Ավան¬Պլազա՚ հյուրանոցի տնօրեն Սարգիս Գալստյանը՝ երախտագիտություն հայտնելով փառատոնի նախաձեռնող, ամերիկահայ բարերար Ալեք Բաղդասարյանին։
Հանձնախմբի նախագահ Արծրուն Ավագյանն իր խոսքում ուրախություն հայտնեց մեր հայրենիքի չքնաղ եզերքներից մեկում նորից գտնվելու առթիվ, ապա մաղթեց հետաքրքիր առօրյա, ուրախ պահեր պապենական հողում և վստահեցրեց, որ հանձնախումբը, ինչպես միշտ, այս անգամ ևս գնահատման մեջ կլինի անաչառ, արդար։ Նշվեց, որ փառատոնն անց է կացվելու երկու տարիքային խմբով՝ 9-13, 14-17 տարեկան, և գնահատվելու է 10-բալանոց նիշով, ամենացածրը՝ 3 նիշ։
Առաջին օրը հանդես եկավ մասնակիցների գրեթե կեսը։ Ընդգրկված էին Թումանյանից ամենատարբեր ժանրերով ստեղծագործություններ։ Կար ոչ միայն ասմունք, այլև երգ և Թումանյանի պոեմներից բեմականացված փոքրիկ տեսարաններ, որոնք առավել հետաքրքիր էին դարձնում միջոցառումը։
Չմոռանանք նշել, որ միջոցառումը կտևի մինչև օգոստոսի 1-ը ներառյալ։
Երկրորդ օրվա առաջին կեսում հանդես եկան ասմունքի փառատոնի մնացյալ մասնակիցները, իսկ 2-րդ կեսում այցելեցին հանրապետության տեսարժան վայրեր, եղան Գանձասարում, Տիգրանակերտում, այլուր։