ՆԵՐԿԱՅԱՑՈՒՄ ՊԱՏԵՐԱԶՄԻ ԵՎ ՀԱՂԹԱՆԱԿԻ ՄԱՍԻՆ
Նվարդ ՍՈՂՈՄՈՆՅԱՆ
Ստեփանակերտի մշակույթի և երիտասարդության պալատի մեծ դահլիճում երկու օր` նոյեմբերի 24-25-ին, անշլագով անցավ Երևանի Սոս Սարգսյանի անվան համազգային թատրոնի վավերագրական ներկայացումը, որը կրում է ՙՀաղթանակի գենեզիա՚ անունը։ Բեմադրությունը կատարել է ՀՀ վաստակավոր արտիստ, Համազգայինի գեղարվեստական ղեկավար Նարինե Գրիգորյանը, ով անվանի տնտեսվար Արշավիր Գալստյանի թոռնուհին է: Բեմի ձևավորումը կատարել է Վիկտորյա Հովհաննիսյանը։ Բեմադրության առաջնախաղը կայացել է Երևանում` այս տարվա հունվարի 28-ին։ Արցախյան առաջնախաղին ներկա էր ՀՀ վաստակավոր արտիստ, ճանաչված երգչուհի Շուշան Պետրոսյանը, ով բեմից հայտարարեց, որ ներկայացումը նվիրվում է Արցախյան ազգային-ազատագրական պայքարի լեգենդար հերոս Մոնթե Մելքոնյանին, հավելելով, որ ներկայացվող պատմությունը բոլորիս մասին է։
Դերակատարները երեքն են՝ Նարինե Գրիգորյանը, Վարշամ Գևորգյանը, Արման Նավասարդյանը, որոնց պատմությունները միահյուսվելով` կազմում են սյուժետային գիծ։ Նրանց մանկական հուշերը տարբերվում են, քանի որ ներկայացնում են տարբեր վայրեր՝ Երևանը, Տավուշի սահմանամերձ մի գյուղ և Արցախը։ Հուշերում ընդհանուրն այն է, որ ամեն տեղ պատերազմի դեմքը նույնն է՝ մութ ու ցուրտ գիշերներ, գյուղական ծանր պայմաններ, ավեր-արյուն, հրետակոծություն։
Ժամանակային առումով ներկայացումն ավելի ընդգրկուն է՝ խորհրդային շրջան, կեղծ կուռքեր և գաղափարախոսություններ, որ փշրվում են 1988-ի Ղարաբաղյան շարժման հուժկու ալիքից, շտրիխներով ներկայացրած ցույցեր ու հանրահավաքներ, ապա` Սումգայիթ ու Բաքու, ֆիդայական պայքար ու պարտադրված պատերազմ, որ ավարտվեց հաղթանակով։ Հաղթանակ, որ ինչպես լավագույնս ներկայացված է բեմադրության մեջ, փոխեց ազգի հոգեկերտվածքը։ Դերերից յուրաքանչյուրն իր մեջ կրում է ազգի գենետիկ կոդը՝ հույս, հավատ, սեր, ոգի։
Ներկայացումից հետո մեր զրույցը դերակատարների հետ։
Նարինե Գրիգորյան.- Մենք երեքով ներկայացնում ենք մեր մանկության հուշերը, որոնց մեջ հնարովի ոչինչ չկա։ Երբ Շարժումն սկսվեց, Հրազդանից ընտանիքով տեղափոխվեցինք Նորագյուղ՝ պապիկիս մոտ, հետո ազերիները հայրիկիս գերի տարան, հետո պատերազմ սկսվեց և ինչպես իմ հասակակիցներից շատերը, ես ևս օրագիր էի պահում, օրվա կատարվածը գրի առնում։ Ներկայացման հիմքում ընկած են իմ մանկական միամիտ օրագրային գրառումները։ Ամեն ինչ գնալով վատանում էր, բայց ես հավատում էի, որ հայրս վերադառնալու է։ Այն տարիներին դիմակայում էի. ջուր բերելն էլ էր հաղթանակ, փայտ գտնելն էլ, հացի կտորով բավարարվելն էլ։ Այս բոլորից է ստեղծվել մեծ հաղթանակը, և մեզ` երեխաներիս մեջ ամրացել է հերոսականության ու հաղթանակի գաղափարը։ Տեքստում այսպիսի խոսքեր կան, երբ Վարշամի հերոսն ասում է՝ հայ ժողովրդի պատմության մեջ անընդհատ պարտվում ենք, այ, երբ որ հաղթենք, այդ դասը կսովորեմ։ Ներկայացման գերխնդիրը հաղթանակի դասի սերտումն է։
Արման Նավասարդյան, Համազգայինի տնօրեն և դերասան.-ներկայացումը վավերագրական է՝ հիմնված դերակատար-անձերի հուշերի հիման վրա։ Մեր ապրած օրերն են, մեր հիշողությունները, պատմություններ պատերազմի և հաղթանակի մասին, թե ինչպես ենք պայքարել, դիմացել, երազել, և այսօր տարիների հեռվից խոսում ենք այն երեխաների, այն սերնդի անունից, որ մենք ենք եղել։ Մեր պատմությունները պիեսի է վերածել Սառա Նալբանդյանը, բայց հիմքում իրական դեպքեր են, հորինված ոչինչ չկա։
Վարշամ Գևորգյան.- Այս ներկայացումն ինձ համար շատ սիրելի է, ասելիքը հաղթանակն է և հավատը հաղթանակի նկատմամբ։ Ներկայացումը մեր ազնիվ պայքարի մասին է, որի արդյունքում ունեցանք հաղթանակ։ Մենք ազգովին անսասան եղանք, հաղթեցինք, հետդարձի ճանապարհ չկա. երազում էինք, և մեր երազանքն իրականացավ։ Ամեն սերունդ պիտի ունենա հաղթանակի իր տեսլականը։
;