ԱՐՏԱՍԱՀՄԱՆՅԱՆ ԵԼՈՒՅԹՆԵՐԸ ՅՈՒՐԱՏԵՍԱԿ ՔՆՆՈՒԹՅՈՒՆ ԷԻՆ
Անի ՄԱՆԳԱՍԱՐՅԱՆ
Արցախի մշակութային դաշտում, սկսած 2000 թվականից , իր ուրույն տեղն ունի ՙՄռակած՚ պետական կամերային երգչախումբը, որը ստեղծվեց՝ հիմքում ունենալով Ստեփանակերտի մանկապատանեկան ստեղծագործության կենտրոնի երգչախումբը (հիմնադիր ու գլխավոր դիրիժոր` ԱՀ արվեստի վասատակավոր գործիչ Մարինե Մեսրոպյան)։ Իր ինքնատիպ կատարումներով ՙՄռակած՚-ը հանդիսատեսին հաղորդակից է դարձնում դասական երգարվեստին։
Համերգային հարուստ ծրագրերով երգչախումբը բացմիցս հանդես է եկել Արցախի բնակավայրերում, Երևանում և արտերկրում։ Պարբերաբար մասնակցելով միջազգային մի շարք փառատոների և մրցույթների, բացի մրցանակներից, մշտապես արժանացել է հանդիսատեսի ջերմ ընդունելությանը։ Հերթական միջազգային փառատոնը, որին մասնակցել է նաև մեր երգչախումբը, կայացել է Ավստրիայի մայրաքաղաք Վիեննայի ՙKonzerthaus՚ նշանավոր համերգային համալիրի՝ Մոցարտի անունը կրող դահլիճում։ Արտասահմանյան համերգային ուղևորության, փառատոնային տպավորությունների շուրջ զրուցել ենք երգչախմբի երգիչ-երգչուհիների հետ.
Անուշ ՄԻՆԱՍՅԱՆ- Տեղեկանալով Վիեննայում կայանալիք փառատոնի մասին, մեր երգչախմբի դիրիժոր Մարինե Մեսրոպյանը, ում վաղեմի երազանքն էր Մոցարտի` իր սիրած ստեղծագործություններից ՙՌեքվիեմ՚-ի համատեղ կատարումն այլ երգչախմբի հետ, որոշեց հայտ ներկայացնել։ Այնուհետև փառատոնի կազմակերպիչներին ուղարկեցինք կատարման մեր տեսաձայնագրությունը, որին անմիջապես հետևեց նրանց հրավերը։ Փառատոնին մեր մասնակցությունը ապահովելու գործում համակողմանի աջակցություն են ցուցաբերել հանրապետության նախագահ Բակո Սահակյանը և Մշակույթի, երիտասարդության հարցերի և զբոսաշրջության նախարարությունը։ Վիեննայի փառատոնը, որը կրում էր ՙSing Along Concert՚ խորագիրը, նվիրված էր Մոցարտին ։ Մասնակցում էին աշխարհի տարբեր երկրներ ներկայացնող երգչախմբերի շուրջ 450 երգիչ։ Մինչ համատեղ ելույթը, երկու օր շարունակ փորձեր ենք անցկացրել հայտնի նվագախմբերի՝ դաշնակահարների, ինչպես նաև դիրիժորների հետ ։ Արդյունքում, բազմազգ 450-հոգանոց մեր համատեղ երգչախումբը և Վիեննայի հեղինակավոր նվագախումբը ներդաշնակ կատարեցին Մոցարտի ՙՌեքվիեմ՚-ը։ Մենք առիթ ունեցանք ներկայացնելու նաև մեր ազգագրական երգերից մի քանիսը, բոլորի հիացմունքին արժանանալուց բացի, իտալացի գործընկերների կողմից առաջարկ ստացանք մասնակցելու Միլանում կայանալիք երաժշտական համանման փառատոնի։
Դավիթ ՀԱՐՈՒԹՅՈՒՆՅԱՆ – Վիեննայում Արցախի ներկայացուցիչ Կարեն Կոստանդյանի նախաձեռնությամբ, Հայաստանի դեսպանատանը համերգ ենք ունեցել նաև մեր հայրենակիցների համար։ Ներկայացրել ենք Կարա Մուրզա, Կոմիտաս և հայ այլ կոմպոզիտորների ստեղծագործություններ։ Հանդիսատեսը ոգեշնչված էր մեր կատարմամբ? Զգալի էր նրանց մեծ կարոտն առ հայ երաժշտությունը։ Նույնիսկ համերգի ավարտից հետո տևական ժամանակ չէին հեռանում սրահից։ Նրանք մոտեցան մեզ, ծանոթացանք , կապեր հաստատեցինք հետագա համագործակցության հեռանկարներով ։
Թամարա ՍԱՐԳՍՅԱՆ- Ընդհանրապես, հոգևոր երաժշտությունը մեծ տեղ ունի մեր մշտական երգացանկում։ Վիեննայի պատմական տեսարժան վայրերով շրջայցի ժամանակ, Հոֆբուրգում՝ բազմաթիվ զբոսաշրջիկներով հարուստ մի վայր, կատարեցինք Մ. Եկմալյանի, Կոմիտասի, Կ. Մուրզայի ստեղծագործություններից։ Հանպատրաստից ներկայացրած մեր համերգին հանդիսատեսի շարքում գտնվեցին նաև սփյուռքահայեր, ովքեր հուզված ձայնակցում էին մեզ։ Ոգեշնչվել էին նաև օտարազգի ունկնդիրները, ովքեր տևական ծափահարություներով ողջունեցին մեզ` միաժամանակ խնդրելով ևս մի կատարում Կոմիտասից։
Մարթա ԱՄԻՐԽԱՆՅԱՆ – Վիեննայից մենք վերադարձանք անչափ տպավորված։ Անվանի նվագախմբերի և դիրիժորների հետ մեր փորձերը նաև յուրօրինակ վարպետաց դասեր էին։ Փառատոնին մասնակցությունը բավականին հղկեց և կատարելագործեց մեր կատարման ունակությունները։ Առաջիկայում պատրաստվում ենք ներկայանալ նոր համերգային ծրագրով։
Մոտենում է ՙՄռակած՚ երգչախմբի գործունեության 20-ամյակը: Ինչպես տեղեկացրեց գեղարվեստական ղեկավար Մարգարիտա Աղաջանյանը, նախապատրաստվում են գալիք տարում մեծ շուքով նշելու հոբելյանը: Տոնական համերգային ծրագրում ընդգրկվելու են հայ և արտասահմանյան կոմպոզիտորների ստեղծագործություններ, հատվածներ հայտնի օպերաներից, ժողովրդական և հոգևոր երգեր: ՙԱյդ համերգը, ընդհանուր առմամբ, մեր 20 –ամյա գործունեության յուրօրինակ հանրագումարն ու ամփոփումը կլինի՚,-հավելել է Մ. Աղաջանյանը։