ՆՈՐՈՒՅԹ՝ ՄՇԱԿՈՒԹԱՅԻՆ ԿՅԱՆՔՈՒՄ
Անի ՄԱՆԳԱՍԱՐՅԱՆ
Զրուցակիցս արցախցի երիտասարդ օպերային երգիչ Գուրգեն Բաղդասարյանն է, ով վերջերս Արցախում հիմնել է ՙՇունչ՚ ձայնի պահպանման կենտրոն:
-Ողջույն, Գուրգեն։
-Ողջույն, Անի։
- Մի փոքր կպատմե՞ք Ձեր մասին։
-Ես օպերային երգիչ եմ։ Մանկուց զբաղվել եմ երգով, սակայն դպրոցն ավարտելուց հետո ընդունվել եմ Արցախի պետական համալսարանի իրավաբանական բաժինը։ Այդ տարիներին արդեն որոշել էի ուսումս ավարտելուց հետո մեկնել Երևան՝ ընդունվելու Կոմիտասի անվան պետական կոնսերվատորիան։ Այսպես, 2014-2019 թվականներին ուսանեցի կոնսերվատորիայում՝ սկզբում Հայաստանի վաստակավոր արտիստ, պրոֆեսոր Վալերի Հարությունյանի դասարանում, այնուհետև շարունակել եմ պրոֆեսոր Սվետլանա Կոլոսարյանի դասարանում։ Կոնսերվատորիան ավարտելուց հետո վերադարձել եմ Արցախ և այժմ դասավանդում եմ Սայաթ-Նովայի անվան երաժշտական ուսումնարանում։
-Ինպե՞ս մտահղացաք ՙՇունչ՚ ձայնի պահպանման կենտրոնի ստեղծումը։
-Վերադառնալով հայրենիք` ցանկություն է առաջացել պարապել տաղանդաշատ երիտասարդների հետ։ Սկզբնական շրջանում փորձեցի շրջել գյուղերով, քաղաքներով և վարպետաց դասեր անցկացնել ցանկացողների հետ, սակայն հասկացա, որ ֆիզիկապես անհնար է։ Միտք հղացավ հիմնել համապատասխան կենտրոն, ուր կարող են այցելել բոլոր հետաքրքրվողները։
-Ինչո՞ւ Շունչ։
-Աստվածաշնչում ասվում է . ՙԱստված շունչ փչեց մարդու մեջ և նա կյանք առավ՚։ Թերևս նույնն էլ կարելի է վերագրել երգեցողությանը՝ եթե բացակայում է ճիշտ, կանոնավորված շունչը, ապա լավ երգելու մասին խոսք լինել չի կարող։
-Ո՞ր տարիքից է ընդունելությունը և ինչպիսի՞ սկզբունքներով։
-Սկսած 6 տարեկանից բոլորը կարող են այցելել կենտրոն։ Պարապմունքներն անհատական են, շաբաթական 2 անգամ՝ 50 րոպե տևողությամբ։ Պետք է նաև ավելացնեմ, որ ձայնի պահպանման մեր կենտրոնում կազմակերպվում են նաև խոսքարվեստի դասընթացներ, որը նախատեսված է լրագրողների, քաղաքագետների և բոլոր նրանց համար, ում աշխատանքում անհրաժեշտություն է հղկված ձայն ունենալը։
-Որքա՞ն ժամանակ է, որ գործում է կենտրոնը, և Արցախում հետաքրքրություն նկատվում է Ձեր առաջարկած ծրագրերի նկատմամբ։
-Դեռ մեկ ամիս է, ինչ կենտրոնը գործում է։ Այժմ սրահի հարցն ենք փորձում լուծել։ Անկեղծ ասած, այսպիսի արձագանքն անսպասելի էր ինձ համար։ Դիմորդներ ենք ունեցել անգամ Արցախի հեռավոր գյուղերից? օրինակ Սոսից, Սարգսաշենից, Բերդաշենից և այլն։ Շատերը հետաքրքրվում են նաև մեր՝ Երևանում մասնաճյուղ ունենալու հանգամանքով։
-Ինչպիսի՞ չափանիշներով եք առաջնորդվում ուսուցման գործընթացում և եթե կա այդպիսին, ապա ի՞նչ նմուշի վկայագիր է տրամադրվում շրջանավարտներին։
-Դասավադման մեթոդիկան հիմնված է եվրոպական երգեցողության՝ մասնավորապես իտալական երգեցողության հին դպրոցի վրա։ Ուսման տարիներին ինձ բախտ է վիճակվել վարպետաց դասերի մասնակցել եվրոպական մի շարք երկրներում՝ հանրաճանաչ օպերային երգիչների մոտ։ Դրա շնորհիվ ես կարողացա բացահայտել եվրոպական երգեցողության գաղտնիքը։ Վկայագիր տրամադրելու հարցը ևս մշակման փուլում է։
-Ի՞նչ կարող է ակնկալել կենտրոնի դիմորդը և ինչպիսի՞ մասնագիտական որակների կարող է տիրապետել շրջանավարտը։
-Կենտրոնի շրջանավարտը կկարողանա հետագայում երգել իր նախընտրած ոճում և շարունակել ուսումը կոնսերվատորիայում։
-Արցախում, կարծես, նմանօրինակ ուսուցում տարվում է երաժշտական ուսումնական համապատասխան հաստատություններում. ո՞րն է Ձեր կենտրոնի առանձնահատկությունը։
-Նմանատիպ կենտրոններ Արցախում չկան։ Նախ կենտրոնի ուսումնական ծրագիրը հիմնված է եվրոպական կրթական համակարգի վրա։ ՙՁայնի պահպանման կենտրոն՚ անվանումից ինքնին երևում է դպրոցի յուրահատկությունը։ Մեր նպատակը ձայնի պահպանումն է, ճիշտ զարգացումը, նպատակահարմար ծրագրի ընտությունը։
-Ի՞նչ ծրագրեր ունեք առաջիկայում։
-Այժմ պլանավորում եմ ՙՀանուն մշակույթի՚ խորագրով համերգային շրջագայությամբ հանդես գալ Արցախի մի շարք գյուղերում և շրջաններում։ Երազանք ունեմ Արցախում հիմնել կոնսերվատորիա և օպերային թատրոն։ Առաջ Աստված։