ԱՀ ԿԳՍ ՆԱԽԱՐԱՐՆ ԱՄՓՈՓԵՑ ՏԱՐՎԱ ԱՇԽԱՏԱՆՔՆԵՐԸ
Սվետլանա ԽԱՉԱՏՐՅԱՆ
Փետրվարի 27-ին ԱՀ կրթության, գիտության և սպորտի նախարար Նարինե Աղաբալյանը հրավիրել էր մամուլի ասուլիս և ըստ ոլորտների ներկայացրել 2019թ. կատարված աշխատանքները, 2020թ. նախատեսված ծրագրերը:
Նախարարի տեղեկատվությամբ` հաշվետու տարում իրականացված աշխատանքներն ուղղված են եղել կրթության, գիտության և սպորտի ոլորտներում հիմնախնդիրների լուծմանը և զարգացման ծրագրերի իրականացմանը:
Նախադպրոցական կրթությություն: Աշխատանքներն ընթացել են ցանցի ընդլայնման և որակի բարձրացման ուղղությամբ: Նախադպրոցական կրթության մատչելիության և հասանելիության ապահովման նպատակով շահագործման է հանձնվել մեկ նոր մանկապարտեզ Ասկերանի շրջանի Շոշ համայնքում, Մարտունու շրջանի Բերդաշեն համայնքի մանկապարտեզում ավելացել է մեկ խումբ: 6 նոր նախադպրոցական խմբեր են բացվել Շուշիի շրջանի Հին Շեն և Քաշաթաղի շրջանի Սոնասար, Այգեհովիտ և Իշխանաձոր համայնքներում, Ստեփանակերտի հ. 8 դպրոցում ավելացել է մանկապարտեզային պայմաններով մեկ խումբ, իսկ հ. 4 դպրոցում գործող խումբը և հ. 6 դպրոցի խմբերից մեկը վերափոխվել ու անցել են մանկապարտեզային ռեժիմով գործունեության: Ընդհանուր առմամբ նախադպրոցական կրթությունը 2019թ. հասանելի է դարձել շուրջ 250 նոր երեխաների համար: Առաջիկա օրերին շահագործման կհանձնվի նաև Աստղաշենի նորակառույց մանկապարտեզը: Կսկսեն գործի Թալիշում, Ստեփանակերտում և Մարտակերտի շրջանի Վաղուհաս գյուղում կառուցված նոր մանկապարտեզները: Նախադպրոցական կրթության պայմաններ են ստեղծվել Աջափնյակի դպրոցում: Տարվա ընթացքում նախադպրոցական կրթությունը հասանելի կլինի ևս 500 երեխայի համար: Կարևորվել է նաև մանկապարտեզների և նախադպրոցական խմբերի գործունեության վերահսկողությունն ու մեթոդական աջակցությունը: Կազմակերպվել և առաջիկայում էլ նախատեսված են վերապատրաստման դասընթացներ նախադպրոցական խմբերի աշխատողների համար: Աշխատանքներ են կատարվել ոլորտում նոր ներդրումների խթանման ուղղությամբ:
Հանրակրթության ոլորտ: Նախարարության աշխատանքները ուղղված են եղել կրթության նոր տեսլականի սահմանմանը, կրթական նոր տեխնոլոգիաների ներդրմանը: Կրթության ոլորտի խնդիրների շուրջ հանրային և փորձագիտական քննարկումների հարթակի ստեղծման, ԱՀ-ում կրթության նոր քաղաքականության և ռազմավարական ծրագրի մշակմանն ու իրագործման նպատակով իր ձևաչափով և բովանդակությամբ աննախադեպ էր ՙԱրցախի կրթական ֆորումը՚, որը ևս մեկ անգամ հաստատեց, որ անելիքներ կան կրթության հիմնախնդիրների հստակեցման ուղղությամբ: Ֆորումի ընթացում հավաքված նյութերը ներկայումս մշակվում են մասնագետների կողմից` որպես հիմք ոլորտի հետագա քաղաքականության մշակման համար:
Նախարարն առանձնացրեց նաև ՙԹեստային ձևերի կիրառումը նոր կրթական և ատեստավորման տեխնոլոգիաներում՚ խորագրով մանկավարժական որակավորման դասընթացը, որը վարել է ծնունդով արցախցի ռուսաստանաբնակ հայտնի թեստաբան, պրոֆեսոր Վադիմ Ավանեսովը: Արդյունքում ուսուցիչները ստեղծել են մի քանի տասնյակ ուսումնական տեքստեր և առաջադրանքներ, որոնք կներդրվեն դպրոցներում: Ն. Աղաբալյանը նշեց, որ դա այսօր կրթության արդիականացման հիմնական ուղղություններից մեկն է, որը հաստատվել և կիրառում է գտել համաշխարհային մանկավարժական պրակտիկայում:
Արժենշելի են Երևանի ՙՔվանտ՚ վարժարանի և ԱրՊՀ-ի հետ համագործակցությամբ հանրապետության տարբեր շրջանների ֆիզիկայի ուսուցիչների 5-օրյա վերապատրաստման դասընթացը, սովորողների մոտ բնագիտական առարկաների հանդեպ հետաքրքրությունը խթանելու նպատակով մոսկավաբնակ մեր հայրենեկիցների նախաձեռնությամբ կրթաթոշակ սահմանելը ֆիզիա, քիմիա և կենսաբանություն առարկաներից լավագույն արդյունքներ ցուցաբերած աշակերտների համար: Նախարարությունը 2020-ը հայտարարել է ֆիզիկայի տարի, և մի շարք միջոցառումներ և ծրագրեր են նախատեսված:
ՙԱյբ՚կրթական հիմնադրամի հետ նախարարությունը աշխատանքներ է իրականացնում Արցախոււմ ՙՔան՚ակադեմիայի ստեղծման ուղղությամբ, ինչը կոչված է ապահովելու առցանց որակյալ կրթություն բոլորի և յուրաքանչյուրի համար: Ծրագիրը կմեկնարկի Քաշաթաղի շրջանից: Տարբեր ծրագրեր կան դպրոցների դերը համայնքային կյանքում բարձրացնելու ուղղությամբ, մասնավորապես` ամառային դպրոց-ճամբարների միջոցով: Այդ նպատակով նախարարությունն իրականացնում է նաև դրամաշնորհային ծրագրեր, որոնցից են ՙԵս՚ կրթական հիմնադրամը` նոր տեխնոլոգիաների, ՙՀայկական կինոյի ինդուստրիալ զարգացում՚ մշակութային հիմնադրամի հետ համագործակցությամբ` նորարարական կինոդպրոցի ստեղծման ուղղությամբ և այլն:
Տեխնոլոգիական զարգացման ծրագրի շրջանակներում շարունակվում է ՙԱրմաթ՚ ինժեներական լաբորատորիաների ներդրումը: 2019-ին 5 լաբորատորիա է ներդրվել շրջաններում: ՙԹումոբուս՚ ծրագրի իրագործմամբ գյուղերից ավելանում են ՙԹումո՚-ի շահառուները:
Ուշադրության կենտրոնում են եղել համընդհանուր ներառական կրթության խնդիրները:
Հանրապետության մի շարք դպրոցներում ստեղծվել են անհրաժեշտ պայմաններ մասնագիտական խմբի աշխատանքների համար, ինչպես նաև ձեռք են բերվել դիդակտիկ նյութեր ու պարագաներ կրթության առանձնահատուկ պայմանների կարիք ունեցող աշակերտների համար:ԳԹԿ կրթական կարիքի գնահատման բաժնի կողմից գնահատվել են 200-ից ավել երեխաներ: Իրականացվել է մանկավարժահոգեբանական աջակցության դրամաշնորհային ծրագիր ՙԵլարան՚ ՀԿ-ի միջոցով:
Նախարարը կարևորում է այս ծրագիրը, քանի որ գործընթացին ներգրավել են և մասնագետներին և կրթության առանձնահատուկ պայմանների կարիք ունեցող երեխաների ծնողներից, ինչը նպաստում է այդ խնդիրների ճիշտ վերհանմանը և ճիշտ լուծումներ գտնելուն: Այս ոլորտում առաջիկայում սկսելու են նոր ծրագիր: Վերապատրաստման դասընթացներ են իրականացնելու մասնագետների, հոգեբանների, հատուկ մանկավարժների, սոցմանկավարժների համար և դպրոցները համալրելու են մասնագետներով: Խ. Աբովյանի անվան մանկավարժական համալսարանի հետ պայմանավորվածություն է ձեռք բերվել այս ուղղությամբ առաջիկայում դասընթաց կազմակերպելու, պիլոտային ծրագիր կիրականացվի մինչև ուսումնական տարվա վերջը, իսկ սեպտեմբերից արդեն համապատասխան հաստիքներ կներդրվեն այն դպրոցներում, որտեղ դրանք բացակայում են, տեղեկացրեց նախարարը՝ հավելելով, որ միայն մասնագետներ ներդնելով այս խնդիրը չեն կարող լուծել, պետք է շարունակել աշխատել ուսուցիչների հետ և մանկավարժական կրթության մեջ պետք է համապատասխան փոփոխություն կատարել: Երևանի գործընկերների հետ հանդիպման ժամանակ քննարկելու են այս խնդիրը:
Հանրակրթության ոլորտում կարևորագույն նորություններից էր ուսուցիչների աշխատավարձերի բարձրացումը 10 տոկոսով: Չնայած էական փոփոխություն չէ, բայց կարևոր է դրական միտումը: Ներկայումս ֆիննախարարի հետ համատեղ քննարկվում է կրթության համակարգի մյուս օղակների աշխատողների աշխատավարձերի բարձրացման հարցը:
Նախնական մասնագիտական (արհեստագործական) և միջին մասնագիտական կրթության ոլորտում հիշարժան է Բերձորում գյուղատնտեսական քոլեջի հիմնումը, որը 2020թ. սեպտեմբերից ընդունելություն կկատարի 5 միջին մասնագիտությունների գծով: Նաև` Ստեփանակերտի արհեստագործական ուսումնարանում արդիականացման աշխատանքները` ՙՔրիստոնյաները կարիքի մեջ՚ ՀԿ հետ համատեղ: Համագործակցության շրջանակներում սկսվել է նոր փայտամշակման արհեստանոց-արտադրամասի շինարարությունը, որը կհամալրվի բարեգործական խողովակներով առաքված ժամանակակից սարքավորումներով և որտեղ իտալացի վարպետները 2020թ. մարտից կսկսեն իրականացնել կրթական նոր ծրագիր:
Մարտունու արհեստագործական ուսումնարանի ուղղությամբ ևս որոշակի աշխատանքներ են կատարվել. հաստատությունը համալրվել է անհրաժեշտ գործիքներով և սարքավորումներով` ԱՄՆ-ից բարերար Հակոբ Բուռնազյանի աջակցությամբ, առաջիկայում ձեռք կբերվի նաև տրանսպորտային միջոց: Շարունակվում են 9-րդ դասարանցիների շրջանում մասնագիտական կողմնորոշման աշխատանքները Բոլոր իններորդցիների համար նախարարությունը հնարավորություն է ստեղծել այցելելու Ստեփանակերտի ռազմամարզական վարժարան, Շուշիի ՙԵզնիկ Մոզյան՚ արհեստագործական ուսումնարան և Արսեն Խաչատրյանի անվան հումանիտար քոլեջ՝ ծանոթանալու միջին մասնագիտական ոլորտում առկա կրթական հնարավորություններին: Նախարարի վկայությամբ՝ արդեն նկատելի է էական փոփոխություն նշված հաստատություններում ընդունվող քանակակազմի մեջ, մասնավորապես ՙԵզնիկ Մոզյան՚-ընդունվածների մեծ մասը այդ որոշումը կայացրել է նման էքսկուրսիաների արդյունքում:
Բարձրագույն կրթության ոլորտում կարևորագույն աշխատանքներից է եղել բուհերի հավատարմագրման գործընթացը:
Նախարարությունը քննարկումներ է նախաձեռնել ՙԲարձրարգույն կրթության և գիտության մասին՚ ԱՀ օրենքի նախագծի շուրջ և բուհերից ստացել առաջարկություններ: Նոր մշակույթ է ձևավորրում՝ ոչ թե սպասել, որ Հայասատանում օրենք ներդրվի, հետո արդեն այստեղ շրջանառության մեջ դրվի, այլ նախարարությունը փորձում է մասնակցել ՀՀ համանման օրենքի նախագծի քննարկմանը. առաջիկայում Արցախից առաջարկությունները կուղարկվեն հայաստանյան գործընկերներին:
Փոփոխություններ են կատարվել նաև գիտության ոլորտում, մասնավորապես` պետական բյուջեից ֆինանսավորմամբ իրականացվող գիտական թեմատիկ հետազոտությունների մրցույթի անցկացման կարգում: Հանվել է սահմանափակումը և հնարավորություն է ընձեռվել մրցույթին մասնակցելու նաև ՀՀ-ից և արտերկրից գիտական աշխատողներին` կարևորելով գիտական թեմայի առնչությունը Արցախին: Հաշվետվության կարգում կարևորվում է գիտական թեմայի արդյունքի կիրառական նշանակությունը:
Սպորտի ոլորտում շարունակվել են մարզական ֆեդերացիաներին աջակցության և միջոցառումներին մասնակցության ֆինասավորումը: Կազմակերպվել են բազմաթիվ մրցաշարեր, առաջնություններ: 2.493 մարզիկներ մասնակցել են մրցաշարերի և առաջնությունների, որոնցից 1.817-ը` Հայաստանի Հանրապետության, 79-ը` Եվրոպայի, 23-ը` աշխարհի, 574-ը` միջազգային: 145 մարզիկներ ու մարզիչներ արժանացել են պետական պարգևների ու խրախուսական նվերների: 2019-ը առանձնացել է նաև աննախադեպ սպորտային իրադարձություններով. CONIFA, Համահայկական 7-րդ խաղեր, սպորտային պարերի միջազգային մրցույթ` ՙՊար առանց սահմանի՚ խորագրի ներքո: Նախարարը տեղեկացրեց, որ 2020թ. որոշ փոփոխություններ են կատարվելու մարզական ֆեդերացիաների աջակցության կարգում, ինչը նպատակ ունի էլ ավելի խրախուսել օլիմպիական մարզաձևերի զարգացումը: Հետագայում նախատեսված է նաև փոփոխություն տարբեր առաջնություններում լավագույն արդյունքներ արձանագրած մարզիկներին ու մարզիչներին խրախուսելու կարգում:
Ն. Աղաբալյանը պատասխանեց նաև լրագրողների հարցերին: