ԿԱԿՏԻՎԱՆԱ ՇՐՋԱՆԻ ՄՇԱԿՈՒԹԱՅԻՆ ԿՅԱՆՔԸ
Թամար ԳՐԻԳՈՐՅԱՆ
ք. Քարվաճառ
Լոս Անջելեսում գործող ՙԱրարատ՚ հիմնադրամը 2017 թվականից զբաղվում է Արցախի Շահումյանի շրջանի մշակույթի և երիտասարդության կենտրոնի շենքի հիմնանորոգմամբ։ Այս ընթացքում ամբողջությամբ փոխվել է շենքի տանիքը, հիմնանորոգվել կենտրոնի բեմը, առաստաղը, պատերը, ամբողջությամբ փոխվել լուսավորության և վարագույրների համակարգը, վերանորոգվել են դահլիճի աթոռները։ Շինարարական աշխատանքների համար մինչև այս պահը ծախսվել է մոտ 80 հազար ամերիկյան դոլար։
ՙՇինարարության հիմնական նպատակը շրջանի պատանիների, երիտասարդների կյանքն ավելի հետաքրքիր դարձնելն է։ Եթե այսօրվա աշակերտը, ավարտելով դասերը, ուրիշ հետաքրքրություն չունենա և դպրոցից ուղիղ տուն գնա, նրա համար դժվար կլինի հասկանալ, թե ինչու ինքը պիտի մնա Քարվաճառում ու վաղը կառուցի ու շենացնի այն։ Երիտասարդը միշտ ցանկություն ունի նաև հետաքրքիր կյանքի՚,- մեզ հետ զրույցում նշեց ՙԱրարատ՚ հիմնադրամի նախագահ Լաուրա Մելիքյանը։ Իսկ հետաքրքիր ժամանց, ըստ մեր զրուցակցի, հնարավոր չէր ապահովել այն տխուր, մռայլ պատերով հաստատությունում, որտեղ անգամ խմելու ջուր և սանհանգույց չկար։
Շենքի վերանորոգման համար ծախսված ողջ գումարը հավաքվել է նվիրատվությունների շնորհիվ, որը կազմակերպել են ՙԱրարատ՚ հիմնադրամն ու նախագծի աջակցության համար ձևավորված ՙԱրցախ-վերակառուցենք Քարվաճառը՚ նախաձեռնող կոմիտեն, որի կազմում են Արա Ահարոնյանը, Ֆրեդրիկ Վարդանյանը, Մարալ Դաբաղյան-Անճարգոլյանը, Գայանե Գևորգյանը, Ստեփան Գումրիկյանը, Սիլվա Նատալի Մանուկյանը, Խաչիկ Մանուկյանը, Ռաքել Մելիքյանը, Լաուրա Մելիքյանը, Ֆրեդ Սարկիսյանը, Արմինե Զաքարյանը և Ռիտա Մահդեսյանը։
Ինչպես նշում է Լաուրա Մելիքյանը, այդ ընթացքում անախորժությունների ու դժվարությունների ևս հանդիպել են. ՙԱյնպես ստացվեց, որ որոշ անազնիվ մարդկանց պատճառով մի գործը երկու անգամ արեցինք, բայց կարևոր է, որ մենք չընկճվեցինք և այսօր ունեցանք այս արդյունքը։ Այդ գումարով և ժամանակահատվածում մենք կարող էինք այլ գործունեություն ծավալել, օրինակ, մի քանի դպրոց կամ մանկապարտեզ վերանորոգել։ Բայց դա չէր մեր նպատակը։ Շենքային պայմանները բարելավելուց հետո ակնկալում ենք նաև ծրագրային փոփոխություններ, գործունեության ընդլայնում և ակտիվացում հենց մշակույթի և երիտասարդության կենտրոնի շենքում։ Հուսով ենք, ակտիվորեն կկազմակերպվեն տարբեր մշակութային, ինչու չէ՝ նաև կրթական, զարգացնող ծրագրեր ամբողջ շրջանի երիտասարդների համար՚։
ՙԱրարատ՚ հիմնադրամի նախագահը վստահեցնում է՝ եթե շենքի արդեն վերանորոգված հատվածներն ակտիվորեն օգտագործվեն, իրենք կմտածեն նաև նկուղային հարկը վերանորոգելու, այնտեղ ընդարձակ ցուցասրահ և տարբեր միջոցառումների համար տաղավարներ կառուցելու մասին։
ՙԱրարատ՚ հիմնադրամի նախաձեռնած հիմնանորոգման աշխատանքներին աջակցել է նաև Շահումյանի շրջանի վարչակազմը։ Մասնավորապես, վարչակազմի նախկին ղեկավար Գագիկ Մարտիրոսյանի նախաձեռնությամբ կենտրոնն ապահովվել է անհրաժեշտ տեխնիկայով և հիմնանորոգվել են շենքի առաջին հարկում գտնվող սանհանգույցները։
Շենքի բացումը նախատեսվում է սեպտեմբերին։
;