ԱՐՑԱԽԻ ՀԱՆՐԱՅԻՆ ՌԱԴԻՈ. 24-ԺԱՄՅԱ ԵԹԵՐ
Անի ՄԱՆԳԱՍԱՐՅԱՆ
Արցախի հանրային ռադիոն տեխնիկապես վերազինվելու և վերանորոգման աշխատանքներ իրականացնելու նպատակով օգոստոսի 1-ից եթերում չէր շուրջ մեկ ամիս։ Համեմատաբար կարճ ժամանակահատվածում հաջողվեց եթեր վերադառնալ։ Այս ընթացքում բավականին մեծ ջանքեր պահանջող աշխատանքները հիմնականում համակարգում էր Արցախի հանրային ռադիոյի տնօրեն Անի Մինասյանը, ով հրավիրվել է Հայաստանի հանրային ռադիոյից: Ինչպիսի՞ նորություններով և, ինչու ոչ՝ նաև անակնկալներով է Արցախի հանրային ռադիոն ներկայանալու իր ունկնդիրներին: Այս և այլ մանրամասների շուրջ ենք զրուցել Անի Մինասյանի հետ:
-Տիկին Մինասյան, նախատեսված ժամկետում Արցախի հանրային ռադիոն կրկին եթերում է , բայց ժամանակավոր ստուդիայով, ինչն այդպես չէր նախատեսված։
- Մենք մեր խոստումը չենք խախտել, սեպտեմբերի 1-ից եթերում ենք։ Այս պահին հիմնանորոգման աշխատանքեր են ընթանում։ Տեխնիկական աշխատանքներն էլ դեռ վերջնականապես չեն լուծվել, այդ պատճառով հիմա փորձարարական ստուդիայում ենք, բայց շուտով կլինենք մեր հիմնանորոգված ստուդիայում և այնտեղից կասենք ՝ ՙՍտեփանակերտն է խոսում՚։ Համոզված եմ, որ հանրային ռադիոն առաջիկայում իր տեսքն ու որակն ամբողջովին փոխելու է։ Մեր ունկնդիրներին խոստանում ենք հանրայինի չափանիշներին համապատասխան եթեր ապահովել։
-Տարիներ շարունակ խոսվում էր Արցախի հանրային ռադիոն տեխնիկապես վերազինելու ու հատկապես՝ 24-ժամյա եթեր ապահովելու մասին: Այսօր արդեն հանրային ռադիոն տեխնիկապես վերազինված է: Ի՞նչ եք կարծում, 5 ժամյա եթերից միանգամից 24-ի անցնելը, արդյոք , ռիսկային չէ՞:
-Ես կարծում եմ ՝ հավակնոտ է, ինչ-որ տեղ նաև՝ ուշացած։ Ուրախ եմ, որ Արցախի հանրային ռադիոյի երկրորդ կյանքի առաջին քայլերի անմիջական մասնակիցն եմ։ Ես սիրով ու նվիրումով եմ այդ բոլոր աշխատանքները համակարգում, նախաձեռնում։ Լիահույս եմ ՝ 24-ժամյա մեր ծրագիրը կգոհացնի ունկնդիրներին։
-Կառուցվածքային ու ծրագրային ինչպիսի՞ փոփոխություններ ու նորություններ է ունենալու հանրայինի եթերը:
-Այսօր և առաջիկա օրերին, մինչ մի քանի հաղորդումներ պատրաստվեն, հիմնական և կառուցվածքային հիմքը կլինեն լրատվական թողարկումները։ ՙԱրցախ լրատվական՚-ը եթերում է առավոտյան ժամը 8։00-19։00։ Ուղիղ ժամերին 5 րոպեանոց թարմ լրահոս ենք հաղորդում։ Ժամը 17։00-ին 10 րոպեանոց ռուսական ծառայության լրատվական թողարկում ունենք։ ժամը 18։00-ին՝ հիմնական թողարկումը 30 րոպեի սահմանում, որին կհաջորդի օրվա գլխավոր թեմայով հարցազրույցը։ Օրվա լրահոսը կամփոփենք նաև ժամը 19։00 -ին՝ 5 րոպեանոց թողարկմամբ։ Սա սկզբնական շրջանի լրատվական ծառայության գրաֆիկն է։ Առաջիկայում մեր աշխատանքային օրը կսկսենք առավոտյան ժամը 7-ից և 5 րոպեից ավել լրատվական թողարկմամբ։ Քանի որ վերջին տարիներին սփյուռքահայ մեր հայրենակիցներից շատերը հայրենադարձության համար ընտրել են Արցախը և բնակություն հաստատել այստեղ, նախատեսում ենք ունենալ նաև արևմտահայերենով լրատվական թողարկում։ Բովանդակային փոփոխությունը հընթացս տեղի կունենա։ Նոր հաղորդումներ ու հեղինակներ կունենանք։ Իհարկե, կպահպանվեն նաև հին հաղորդումները՝ փոփոխելով ձևաչափն ու որակը։ Ուսուցողական հաղորդումներ կունենանք երեխաների համար։ Փոքրիկ ունկնդիրների համար եթերում տեղ կգտնի նաև բարբառով հեքիաթի ժամը։ Նախատեսում ենք հաղորդումներ ավելացնել ոչ միայն հայերեն, այլ նաև ռուսերենով և անգլերենով։ Սպասվող նորությունների, հաղորդումների մասին մեր ունկնդիրը կտեղեկանա Արցախի հանրային ռադիոյի եթերից, մեր ֆեյսբուքյան էջից, շուտով կլուծվի նաև կայքէջի խնդիրը, և համացանցում ևս ակտիվ կլինենք։ Աշնան երկրորդ կեսին նաև տեսաձայնագրություններով կներկայանանք ֆեյսբուքյան էջում։ Հավատարիմ ունկնդիրները հնարավորություն կունենան ոչ միայն արդեն հարազատ դարձած մարդկանց ձայները լսել, այլ նաև՝ ծանոթանալ նրանց հետ։ Այնուամենայնիվ, կշարունակենք ինչ-որ տեղ պահպանել միայն ռադիոյին հատուկ առեղծվածը։ Ինչպես խոստացվել էր, աշխատանքներ են տարվում նաև հանրայինի ձայնը հասանելի դարձնել առաջնագծում կանգնած զինվորին։ Հատուկ հաղորդումներ կլինեն նրանց համար։
-Ինչպես նկատեցինք, Դուք առաջին հերթին աշխուժացնելու եք լրատվական թողարկումները, որն առանց փորձառու լրագրողների հնարավոր չէ: Միայնակ էլ անհնար է: Հաջողվե՞լ է ձևավորել այն թիմը, որը տեսանելի է դարձնելու գաղափարը:
-Ուզում եմ մի փոքր չհամաձայնել. միայնակ էլ է հնարավոր անել այն, ինչ ուզում ես, ինչ գիտես, որ կարող ես անել և ինչպես գիտես դա անել։ Ժամանակային առումով գուցեև դանդաղ, բայց մենակ էլ հնարավոր է։ Ես այն համոզմանն եմ, որ անհնարին ոչինչ չկա։ Առհասարակ, եթե 7 միլիարդ մարդուց աշխարհում որևէ մեկն այդ քայլն արդեն արել է, ուրեմն դա անհնար չէ։ Ինչ վերաբերում է լավ լրատվական ծառայություն ունենալուն, մեզանից առաջ արել են շատերը։ Շատ ուրախ եմ, որ այս պահին շուրջս կան այնպիսի մարդիկ, որ միանգամից կիսեցին այն գաղափարները, որոնք ես առաջարկեցի և առանց տրտնջալու շատ արագ գործի անցան։ Մինչև սեպտեմբերի 1-ը 10 օր նախապատրաստական աշխատանքներ են տարվել լրագրողների հետ։ Արցախ լրատվականն այսօր ունի 4 լրագրող-մեկնաբան, թիմը դեռ կհամալրվի։
-Արդյոք պատրա՞ստ ենք լրատվական թողարկումներով և տեղական հաղորդումներով ապահովել 24-ժամյա եթերը։
-Առաջիկայում ՝ այո, երբ արդեն հստակեցվի ռադիոյի եթերացանցը։ Մասամբ արդեն եթեր են հեռարձակվում նաև մեր հաղորդումներից մի քանիսը։ Բարձրաճաշակ երաժշտություն կհնչի ու նաև Հայաստանի հանրային ռադիոյի մեր գործընկերների պատրաստած հաղորդումներից կվերահեռարձակենք։ Այս ամենի մասին լրատվական թողարկումներով կտեղեկացնենք մեր ունկնդրին։
-Ինչպիսի՞ առավելություններ ունի ռադիոն մյուս լրատվամիջոցների համեմատ և արդյոք ժամանակակից տեխնոլոգիաների դարում զիջե՞լ է իր երբեմնի առաջատար դիրքերը:
-Իմ կարծիքով ոչ միայն չի զիջել, այլև շարունակում է մնալ առաջատար դիրքերում։ Ռադիոն ամենահավաստի և լայն հնարավորություններ ունեցող լրատվամիջոցն է, որ մենք այսօր ունենք։ Ռադիոն ամենահասանելին է, ռադիոն մենք կարող ենք լսել այնտեղ, որտեղ համացանց չկա, ձեռքի տակ թերթ չկա, հեռուստացույց չկա։ Ռադիոյի ավանդական կերպարից 21-րդ դարում ռադիոն ամբողջովին դուրս է եկել։