ՆՈՐ ՊԱՅՄԱՆՆԵՐ ՆՈՐ ՈՒՍՈՒՄՆԱԿԱՆՈՒՄ
Նունե ՀԱՅՐԱՊԵՏՅԱՆ
Ինչպես ամբողջ հանրապետությունում, Հադրութի շրջանում ևս սկսվել է ուսումնական տարին: Թե ինչպես է համավարակի պարտադրած պայմաններին համապատասխանեցվել ուսումնական գործընթացը շրջանային դպրոցներում` ճշտել ենք շրջվարչակազմի կրթության և սպորտի բաժնի վարիչ Արթուր ՄԻՆԱՍՅԱՆԻՑ: Ըստ ոլորտի պատասխանատուի` նախորդ ուսումնական տարվա երկրորդ կիսամյակում, կորոնավիրուսային իրավիճակով պայմանավորված, դասապրոցեսը մեծամասամբ իրականացվել է հեռավար ձևաչափով: Շրջանում ամռան ամիսների հիվանդության աճի օրերին դպրոցականների և մանկավարժների շրջանում վարակվածության դեպքեր չեն գրանցվել:
Ըստ Ա. Մինասյանի` նոր ուսումնական տարվա առաջին օրերին շրջանի բոլոր դպրոցների տնօրեններն ստացել են ԿԳ նախարարության և շահագրգիռ այլ գերատեսչությունների կողմից մշակված ուղեցույցը, իրականացվել են համապատասխան նախապատրաստական աշխատանքներ, բոլոր դպրոցներն ապահովվել են ջերմաչափերով, ախտահանող սրսկիչներով, ալկոգելերով և այլն:
Շրջանում գործում է 28 դպրոց (16 միջնակարգ, 10 հիմնական և 2 մասնաճյուղ)` 2061 աշակերտի ընդգրկմամբ: Նոր ուսումնականում, ըստ նախնական տվյալների, դպրոց է ընդունվել 190 աշակերտ: Ուրախալի է, որ շրջանում տարեցտարի, թեև նվազ չափով, դպրոցահասակ երեխաների թվաքանակի աճ է արձանագրվում: Այս տարի առաջին դասարանցիների թիվն ավելացել է 15-ով: Շենքային առումով շրջանի դպրոցների մեծամասնությունը գտնվում է բարվոք վիճակում: Նոր ուսումնականում պետական միջոցներով կսկսվի Թաղոտի միջնակարգ դպրոցի շինարարությունը: Վերանորոգման կարիք ունեն Մեծ Թաղերի, Տումու դպրոցները: Ջրակույսի դպրոցի շենքը ևս վաղուց չի բավարարում գյուղի պահանջներին, նոր դպրոցի կառուցման խնդիրը կլուծվի առաջիկա տարիներին: ՙԱյս տարի հատուկ ուշադրության են արժանացել սահմանամերձ հատվածներում գտնվող համայնքների դպրոցները: Վերանորոգվել է Հայկավանի դպրոցի տանիքը, ներկայում ներքին հարդարման աշխատանքներ են ընթանում, առաջին օրերին մի փոքր անհարմարություններ կլինեն: Տարիներ ի վեր չէր լուծվում Խանձաձորի վթարային վիճակում գտնվող միջնակարգ դպրոցի հիմնանորոգման հարցը: Օրերս նախարար Լ. Ղարախանյանի ուղեկցությամբ շրջան այցելած շվեցարացի բարերարը պատրաստակամություն է հայտնել վերանորոգել կրթօջախը՚:
Շրջանում առկախ է մնում հատկապես հեռավոր գյուղերի դպրոցներում որոշ առարկաների գծով մասնագետների խնդիրը: Նախորդ տարում ուղեգրվածի կարգավիճակով 18 ուսուցիչներ են աշխատել տարբեր դպրոցներում` օգտվելով համապատասխան կարգով հաստատված հավելավճարներից: Նոր սկսված ուսումնական տարում արդեն իսկ կայացել է թափուր տեղերի մեկ մրցույթ, որոշ դպրոցներ նոր ուսուցիչներով են ապահովվել, իսկ մի շարք դպրոցների համար կրկնակի մրցույթ է նախատեսված սեպտեմբերի վերջին օրերին: Ոլորտի պատասխանատուի դիտարկմամբ` հիմնականում մանկավարժների պահանջ կա այն գյուղական դպրոցներում, որտեղ տվյալ առարկայի դասավանդման համար մեկ դրույքաչափը չի ապահովվում: Ուսուցչի թափուր տեղերի համար հայտարարված մրցույթները մի շարք դեպքերում հավակնորդների բացակայության պատճառով չեն կայանում: Վիճակը կարգավորելու համար կրթական ոլորտի մասնագետները ելք են առաջարկել: ՙՄտահոգիչ է հատկապես մի շարք դպրոցներում բնագիտական առարկաների գծով մասնագետների բացակայությունը: Մենք փոխնախարարի հետ եղել ենք նման մի քանի դպրոցներում և առաջարկել այդ ժամերը չտրամադրել ոչ մասնագետների (ինչը ես միանգամայն անընդունելի եմ համարում), այլ այդ առարկաների պարապմունքներն անցկացնել հեռավար ձևաչափով` մեր հանրապետության և ՀՀ լավագույն մասնագետների ընդգրկմամբ: Բացի այդ, ես առաջարկել եմ նաև չխուսափել թոշակառու ուսուցիչներին ներգրավելուց: Մի շարք կրթօջախներում հնարավորություն է տրվել կենսաթոշակային տարիքի մանկավարժներին շարունակել իրենց գործունեությունը՚,-նշել է մեր զրուցակիցը: Ըստ Ա. Մինասյանի` շրջբաժինը նաև վերահսկում է դպրոցների տնօրենների կողմից սերնդափոխության հարցը հնարավորինս սահուն, իրավական ու բարոյական նորմերի պահպանմամբ իրականացնելու հարցը: Եթե մանկավարժի կենսաթոշակային տարիքը լրանում է տարվա ընթացքում, ապա վերջինիս հնարավորություն է տրվում աշխատել մինչև ուստարվա ավարտը:
Ա. Մինասյանը ողջունելի է համարում կրթության նոր նախարարի բարեփոխումները նաև մանկավարժների մասնագիտական կարողությունների զարգացման ու նրանց վերապատրաստման մեթոդների ուղղությամբ: ՙԳաղտնիք չէ, որ շատ դպրոցներում աշխատում են նաև թույլ մասնագիտական պատրաստվածությամբ մանկավարժներ: Այսօր ուսուցչի վերապատրաստումն ու ինքնակրթությունն իրականացվում է ուսուցման այնպիսի ձևերի ու մեթոդների կիրառմամբ, որոնք բնորոշ են բուհում սովորողների ուսուցման ավանդական կազմակերպմանը: Ճիշտ է, այսօր մանկավարժի համար մատչելի են ուսուցման նորագույն տեխնոլոգիաները, բազմաթիվ աղբյուրները, սակայն տեղեկատվության բազմազանությունն ու առատությունն իր հերթին հանգեցնում է այլ բարդությունների, դժվարացնում մասնագիտական գործունեության մեջ առաջնային ուղղությունների ընտրությունը, այս կամ այն տեսության արդյունավետության օբյեկտիվ գնահատումը և ուսուցման գործընթացում կիրառումը: Այս տեսանկյունից ուսուցիչների մասնագիտական վերապատրաստման հարցերը, հաշվի առնելով շրջանային առանձնահատկությունները, պահանջում են նորովի մոտեցումներ՚:
Ըստ բաժնի պատասխանատուի` համապատասխան աշխատանքներ են տարվել շրջանում նախադպրոցական և արտադպրոցական հաստատությունների գործունեության համար անհրաժեշտ պայմանների ու ծրագրերի մշակման ուղղությամբ: Շրջանում գործում է երկու արտադպրոցական հիմնարկ՝ Հադրութի մանկապատանեկան ստեղծագործական կենտրոնը, որը 5 համայնքներում գործող 39 խմբակներ ունի և 461 սովորող, Հադրութի մանկապատանեկան մարզադպրոցը` շրջանի 9 բնակավայրերում 20 սպորտային խմբակներում 293 երեխայի ընդգրկմամբ: Հադրութի շրջանում գործում է 6 մանկապարտեզ, որոնցից 4-ը` պետական, Տողում և Մեծ Թաղերում շարունակում են գործել ՀՕՄ-ի ՙՍոսե՚ մանկապարտեզները: Նախորդ տարում մանկապարտեզների 11 խմբերում իրենց նախնական կրթությունն ու դաստիարակությունն են ստացել 280 սաներ:
Նոր ուսումնական տարվա առաջին օրերին շրջանի բոլոր մանկավարժները պարտադիր բուժզննման են ենթարկվել: ՙԴժվար տարի է լինելու, հույս ունենք, դասապրոցեսը դարձյալ համավարակի պատճառով չի ընդհատվի: Մենք պետք է շարունակենք աշխատել ուժերի գերագույն լարումով, յուրաքանչյուրս մեր հնարավորությունների սահմանում պատասխանատվություն ստանձնենք կրթության ոլորտը բարելավելու գործում: Իմ համոզմամբ այստեղ առաջին շարքում պետք է կանգնած լինի կրթօջախի տնօրենը՝ իր թիկունքում ունենալով նախարարության, համայնքի, ծնողների և կոլեկտիվի օգնությունը՚: