[ARM]     [RUS]     [ENG]

ՄԱՐՏՈՒՆԻՈՒՄ ՎԵՐՍԿՍՎԵԼ ԵՆ ԴԱՍԱՊՐՈՑԵՍՆԵՐԸ

Սերգեյ ՍԱՖԱՐՅԱՆ

 Դեկտեմբերի 22-ից վերսկսվել են Մարտունու Նելսոն Ստեփանյանի անվան թիվ 1 միջնակարգ հոսքային դպրոցի դասապրոցեսները։ Ինչպես փոխանցում է դպրոցի փոխտնօրեն Ջուլիետտա Սարգսյանը, դեկտեմբերի 22-ի դրությամբ  540 աշակերտից  դպրոց է  հաճախում 350-ը։  Բացակայող աշակերտները դեռևս ՀՀ-ում են և  արձակուրդներից հետո դպրոց կվերադառնան   կիսամյակային գնահատականներով հանդերձ։

    Պատերազմի ժամանակ վնասվել է դպրոցի նիստերի դահլիճը, մի քանի մասնագիտական կաբինետ, իսկ  ուսումնական կորպուսից  երկու դասարան վառվել է։

    Դպրոցն աշխատում է արտակարգ ռեժիմով, որպեսզի դասապրոցեսներն անցկացվեն պատշաճ, փոխանցում է Սարգսյանը։

  Նշեմ նաև, որ այս պահի դրությամբ արդեն գործում է քաղաքի Մոնթե Մելքոնյանի անվան թիվ 2 մանկապարտեզը, իսկ երկուշաբթի օրվանից իր դռները կբացի քաղաքի թիվ 1 մանկապարտեզը։ Հաստատության տնօրենի փոխանցմամբ՝ մանկապարտեզում այս պահին ընթանում են պատուհանների փոխման և ջեռուցման ապահովման աշխատանքներ, որոնք կավարտվեն  այս շաբաթվա վերջին։

    Նախադպրոցական և դպրոցական հաստատություններին զուգահեռ իր աշխատանքներն է սկսել Մարտունու Արամ Խաչատրյանի անվան արվեստի դպրոցը, այս պահին մշակութային կրթօջախում ընթանում են աշակերտների ցուցակագրման  և դասապրոցեսների համակարգված անցկացման կազմակերպչական աշխատանքներ։