ՆԵՐԿԱՅԱՑՈՒՄ` ՆՎԻՐՎԱԾ ԹԱՏՐՈՆԻ ՄԻՋԱԶԳԱՅԻՆ ՕՐՎԱՆ
Նվարդ ՍՈՂՈՄՈՆՅԱՆ
Մարտի 27-ին Ստեփանակերտի մշակույթի և երիտասարդության պալատի փոքր դահլիճում տեղի ունեցավ ՙԱլվան ծաղիկ՚ բեմադրության առաջնախաղը։ Հեքիաթի հեղինակներն են Ս. Կարնաուխովան և Լ. Բրաուսևիչը։ Բեմադրության ռեժիսորն է Ստեփանակերտի Վ. Փափազյանի անվան հայկական պետական դրամատիկական թատրոնի ժողովրդական դերասան Քաջիկ Հարությունյանը։ Նկարչական ձևավորումը կատարել է Զորիկ Գալստյանը, երաժշտական ձևավորումը Անգելինա Բաբայանը։
Թատրոնի միջազգային օրվա առթիվ ողջույնի խոսք է ասում թատրոնի գրական մասի վարիչ Կարինե Ալավերդյանը։ Նա արտահայտեց իր ուրախությունը պարտադրված երկարատև դադարից հետո հանդիպման առթիվ, ապա նշեց, որ մարտի 27-ին տոն է և՜ թատրոնի, և՜ հանդիսատեսի համար։ Իսկ Ստեփանակերտի թատրոնը ավանդույթ ունի այդ օրը նշել միջոցառմամբ կամ առաջնախաղով։
Այս տարի ևս թատրոնը հավատարիմ է մնացել ավանդույթին` հաղթահարելով բազմաթիվ դժվարություններ. ՙՄեկ անգամ ևս անցանք դժոխքի միջով,-ասաց Կ. Ալավերդյանը:-Մեր կյանքը դուրս եկավ իր բնականոն հունից: Մեր թատրոնի երիտասարդներից շատերը նույնպես զենք վերցրին և կռվեցին առաջնագծում, ինչպես բոլորը, այնպես էլ մենք հարազատներ կորցրինք, ունենք տեղահանված բնակչություն:
Մեր ստեղծագործական կազմից ոմանք այսօր էլ դեռ Երևանում են: Բայց թատերախմբի հիմնական կորիզը կա, այստեղ է, ունենք նաև նոր անուններ, և մենք հավաքվել, ի մի ենք բերել մեր ուժերն ու առաջին միտքը, որ ծագել է` ներկայացում պատրաստել պատանի հանդիսատեսի համար:
Պատերազմը մեր երեխաներին զրկել է շատ հաճույքներից: Դա արդարացի չէ, ու մենք թույլ չպիտի տանք, որ մեզ պատուհասած աղետը և այս քաղաքական տարափոխիկ վիճակը հոգևոր անդամալույծ դարձնի մեզ ու մեր մանուկներին: Այս դժվար կացությունից դուրս գալու մի ելք կա միայն` ապրել, աշխատել, արարել, ստեղծագործել` ի հեճուկս մահվան, ի հեճուկս թշնամու՚: Նա նշեց, որ
դերասանները հոգեբանական, ֆինանսական և թատերային անբարենպաստ պայմաններում ժողովրդական արտիստ Քաջիկ Հարությունյանի օգնությամբ հաղթահարել են իրենք իրենց` բեմ են բարձրացրել և պատրաստել են ՙԱլվան ծաղիկ՚ բարի հեքիաթի բեմադրությունը: Հեքիաթը Ստեփանակերտի թատրոնում առաջին անգամ բեմ է բարձրացել 1968թ. Հովհաննես Կարապետյանի հրաշալի բեմադրությամբ: Ավագ սերունդը պետք է որ հիշի այս բեմադրությունը: Այն երկար տարիներ խաղացվել է մեր մայր թատրոնի բեմում ու այս հեքիաթով պատանի հանդիսատեսի քանի սերունդ է դաստիարակվել: Կ. Ալավերդյանը հավաստիացրեց, որ թատրոնի տնօրինությունը, ստեղծագործական կազմը արել են ամեն հնարավորը, որպեսզի հաճույք պատճառեն երեխաներին, ինչու չէ, նաև նրանց ծնողներին, ովքեր հնարավորություն կունենան վերհիշելու իրենց մանկությունը:
Միջոցառման առթիվ ողջույնի խոսք ասաց Արցախում տեղակայված խաղաղապահ ուժերի մշակույթի հարցերով պատասխանատու փոխգնդապետ Իգոր Յակուշևը։ Խաղաղապահ ուժերի հրամանատարության անունից շնորհավորելով Թատրոնի միջազգային օրվա և թատրոնի աշխատանքների վերսկսման առթիվ, նա ասաց, որ առանց հոգևոր-մշակութային միջոցառումների կյանքը լիարժեք լինել չի կարող, որ իրենք համագործակցում են թատրոնի հետ։ Նա ղարաբաղյան հողին ցանկացավ խաղաղություն, իսկ բոլորին` բարի դիտում:
Հաճելի է նշել, որ մասնագիտությամբ երաժիշտ, ռեժիսոր Յակուշևը մեկ այլ խաղաղապահի հետ մասնակցել է փորձերին, առաջարկություններ են արել, որ ռուսական կոլորիտը ուժեղանա, և դերասանական կազմը ընդունել է դիտողությունները:
Գլխավոր դերում է (Ալյոնուշկա) Շողեր Սարգսյանը, դուբլյոր՝ Մարիա Խաչատրյանը։ Բեմադրության մեջ զբաղված են ավագ սերնդից՝ Մարտին Ալոյանը, Սամվել Եվրիյանը, Սվետլանա Թովմասյանը, Արմիդա Գաբրիելյանը, Սամվել Մկրտչյանը, Վլադիկ Միքայելյանը, միջին սերնդից՝ Դիանա Մելիքսեթյանը, Ռուզան Գասպարյանը, Էդուարդ Դավթյանը, երիտասարդ դերասաններից՝ Մարիաննա Գրիգորյանը, Անգելինա Բաբայանը, Ռոբերտ Կարապետյանը։
Ներկայացման վերջում՝ ծափեր և ծաղիկներ։ Իսկ թատերախմբին տոնի և առաջնախաղի առթիվ շնորհավորանքի խոսք ասացին ԱրՊՀ դասախոս, բանասիրական գիտությունների դոկտոր, պրոֆեսոր Սոկրատ Խանյանը, Արցախի ԿԳՄՍ նախարար Լուսինե Ղարախանյանը: ՙԱյսօր էլ համոզվել ենք, որ թատրոնը կատարում է հասարակության մարդասիրացման, բարոյականացման, բարձր արժեքներ ու համոզմունքներ ձևավորելու և փոխանցելու ինստիտուտը։ Տեսանելի պետական քաղաքականությամբ պետք է նպաստենք, որ թատրոնը դառնա կեցության հույժ կատեգորիա, դառնա հանրային ուժ, որովհետև դաստիարակող օղակները միայն դպրոցները չեն։ Որ մեր մշակութային սոցիալականացման համար թատրոնը կարևոր ինստիտուտ է, այսօր մենք համոզվեցինք։ Թատրոնն իսկապես պայքար է, պայքար ստեղծագործական ինքնահաղթահարման, ինքնակատարելագործման, ինքնահաստատման համար։ Պատերազմից հետո այս դժվար օրերին իսկապես գնահատելի է, որ մարդիկ հավաքվել, ի մի են բերել իրենց ստեղծագործական մտքերը, ուժերը և նորից մեզ տարել հեքիաթի, նպատակների, երազների, անկատարի ու բարության հաղթանակի աշխարհ՚,- ասաց նախարարը:
Հանդիսատեսները ներկայացումը դիտեցին նաև մարտի 28-ին։