ՙԵՐԳՈՎ ՈՒ ՍԻՐՈՎ՚ ԵՐԳՉԱԽՄԲԱՅԻՆ ՓԱՌԱՏՈՆՆ ԱՎԱՐՏՎԵՑ ՏՈՆԱԽՄԲՈՒԹՅԱՄԲ
Սուսաննա ԲԱԼԱՅԱՆ
Երեք օր Արցախում ՙԵրգով ու սիրով՚ երգչախմբային փառատոն էր: Այն կազմակերպվել է ՀՀ ԿԳՄՍ նախարարության կողմից և ՙՀայաստանի փոքրիկ երգիչներ՚ երգչախմբի գեղարվեստական ղեկավար Տիգրան Հեքեքյանի նախաձեռնությամբ:
Մայիսի 30-ին Գանձասարի Սուրբ Հովհաննես եկեղեցում ՙՀայաստանի փոքրիկ երգիչներ՚ երգչախմբի կատարմամբ հնչեց Պատարագ: Մայիսի 31-ի երեկոյան Ստեփանակերտի Սուրբ Աստվածամոր հովանի մայր եկեղեցում տեղի ունեցավ հայկական և արևմտաեվրոպական հոգևոր երաժշտության համերգ: Իսկ մայիսի 1-ին` Երեխաների պաշտպանության միջազգային օրվա երեկոյան Մշակույթի և երիտասարդության պալատի մեծ դահլւճում փառատոնն ամփոփվեց երգչախմբային երգերի տոնախմբությամբ, որի սկիզբն ազդարարեց Վանքի արվեստի դպրոցի գեղարվեստական բաժնի աշակերտների նկարների ցուցահանդեսը:
Նշենք` վերջին երկու համերգները, որոնք ունկնդրեցին երգչախմբային երգարվեստի բազմաթիվ սիրահարներ, անցան մեծ ոգևորությամբ: Երգչախմբի` հոգևոր երգերի հոգեթովիչ կատարումները բուժիչ ուժով էին տոգորված և եկեղեցում ներկա մարդկանց հոգու հանգստություն, երանություն պարգևելու նպատակ ունեին: Համերգի ծրագրում հնչել են հնագույն հայկական հոգևոր երգարվեստի գոհարները` Շնորհալու, Նարեկացու շարականները, հատվածներ Եկմալյանի, Կոմիտասի պատարագներից:
Իսկ Ստեփանակերտի մշակույթի և երիտասարդության պալատի դահլիճում պարզապես ուրախություն էր տիրում: ՙՀայաստանի փոքրիկ երգիչներ՚ երգչախմբի հետ մեկտեղ ելույթ էին ունենում նաև Արցախում գործող երգչախմբեր: Մարտունու արվեստի դպրոցի և Ստեփանակերտի մանկապատանեկան ստեղծագործական կենտրոնի երգչախմբերն արժանացան առանձին հանդես գալու պատվին: Նրանց կատարմամբ հնչեցին հայկական մանկական երգեր:
ՙՀայաստանի փոքրիկ երգիչներ՚ երգչախումբը` մաեստրո Հեքեքյանի ղեկավարությամբ, ոգևորում էր հանդիսատեսին բարձր կատարողական վարպետությամբ: Հնչում էին հայ, ամերիկյան և արևմտաեվրոպական կոմպոզիտորների հանրահայտ ու սիրված երգեր: Առավել ջերմությամբ էին ընդունվում Կոմիտասի, Ռոբերտ Պետրոսյանի, Արեգ Լուսիկյանի, Արմինե Կարապետյանի, Ստեփան Շաքարյանի, Էդգար Հովհաննիսյանի երգերը: Յուրահատուկ տրամադրություն էին հաղորդում ամերիկյան ջազային հանրահայտ կոմպոզիցիաների թեթև ու հմուտ կատարումները:
Համերգի ավարտին ՙՀայաստանի փոքրիկ երգիչներ՚ երգչախումբը և փառատոնի մասնակից բոլոր երգչախմբերը միացյալ կատարմամբ հնչեցրին մի քանի երգ: Տեղեկացնենք` բացի նշված երգչախմբերից, վերջին երգերի կատարմանը մասնակցում էին նաև Ստեփանակերտի Սայաթ-Նովայի անվան երաժշտական քոլեջի ՙԾիածան՚ մանկական երգչախումբը, Ստեփանակերտի Կոմիտասի անվան երաժշտական և Հադրութի դպրոցի երգչախմբերը: Միացյալ երգչախումբը մեծ ոգևորությամբ վերջում կատարեց Էդգար Հովհաննիսյանի ՙՍարդարապատ՚ և ՙԵրևան-Էրեբունի՚ երգերը: Դահլիճը հոտնկայս, բուռն ծափահարություններով արտահայտում էր իր խանդավառությունը: Դահլիճում ներկա խաղաղապահ զորքերի ներկայացուցիչները նվերներ բաժանեցին փառատոնին մասնակցող բոլոր երեխաներին:
Մաեստրո Հեքեքյանն իր ամփոփիչ խոսքում խորին երախտագիտություն հայտնեց Արցախում նման փառատոնի անցկացմանն աջակցող բոլոր հաստատություններին և կազմակերպություններին` ՀՀ ԿԳՄՍ և ԱՀ ԿԳՄՍ նախարարություններին, ՙՀայաստան՚ համահայկական հիմնադրամին, ՙԿոնվերս՚ բանկին: Նա իր ելույթում ընդգծեց հետպատերազմական այս բարոյահոգեբանական ծանր իրավիճակում նման փառատոնի անցկացման անհրաժեշտությունը և հույս հայտնեց` դարձնելու այն ամենամյա: Նաև երգն ու սերն է, որ կարող են բուժել մարդու վիրավոր հոգին, համոզված է Տիգրան Հեքեքյանը: Երգով ու սիրով են լցված երգչախմբի երեխաները, որ համարձակվեցին վտանգավոր այս ճանապարհով գալ Արցախ և երգ ու սեր նվիրել արցախցի իրենց հասակակիցներին, ասում է մաեստրոն: Ահա թե ինչու փառատոնն այս անվանեցին հենց այդպես` ՙԵրգով ու սիրով՚:
ԱՀ ԿԳՄՍ նախարար Լուսինե Ղարախանյանն իր հերթին շնորհակալություն հայտնեց մաեստրո Հեքեքյանին` Արցախում մշակութային կյանքն աշխուժացնելու, երեխաներին ոգևորելու համար և, ի նշան երախտիքի, մաեստրո Հեքեքյանին հանձնեց պատվոգիր և հուշանվեր: Լ. Ղարախանյանը հավաստիացրեց, որ նախարարությունն ամեն ջանք կգործադրի, որպեսզի հաջորդ տարի փառատոնն անցկացվի ավելի մեծ թափով:ԱՆ