Sunrise ՓԱՌԱՏՈՆԸ ՇԱՐՈՒՆԱԿՈՒՄ Է ԻՐ ԳՈՐԾՈՒՆԵՈՒԹՅՈՒՆԸ
Սուսաննա ԲԱԼԱՅԱՆ
Ստեփանակերտի Պոլ Էլուարի Տուն Ֆրանկոֆոնիայի Կենտրոնում ՙSunrise Stepanakert՚ փառատոնի շրջանակներում շարունակվում են միջոցառումները: Փառատոնն սկսեց իր աշխատանքը հունիսի 26-ին, կշարունակվի մինչև հուլիսի 17-ը: Ընթացքում տեղի են ունեցել լուսանկարչության և թվային արվեստի ցուցադրություններ, երաժշտական կատարումներ, կինոդիտումներ և ստեղծագործական վարպետության դասեր:
Հերթական միջոցառումն էր ՙՏիեզերք Բենդ՚-ի համերգը: Երաժիշտներին ներկայացրեց ՙԱրցախ արտ՚ նախագծի հեղինակ Շուշան Քեշիշյանը? ևս մեկ անգամ հիշեցնելով, որ ՙSunrise Stepanakert՚ փառատոնի բոլոր միջոցառումներն իրագործվում են ՙԱրցախ արտ՚-ի և ՙԳալուստ Գյուլբենկյան՚ հիմնարկության աջակցությամբ:
ՙՏիեզերք Բենդ՚-ի երաժիշտներն են Լուսինե Գալստյանը /վոկալ, ֆլեյտա, դաշնամուր, մանդոլին, ջութար հորինված գործիք/ և Էլիզա Բաղդիյանը /վոկալ, ներդաշնակ, կիթառ/: Խումբը հիմնադրվել է 2015-ին, պատմում է Լուսինե Գալստյանը, իսկ 2019-ին խմբում ընդգրկվեցին Լուսինեն ու Էլիզան: Երաժշտական խումբը չունի գեղարվեստական սահմանումներ, ասում է Լուսինեն: Նրանք ստեղծում են երաժշտություն` օգտագործելով հայ գրողների բանաստեղծությունները:
Այդ երեկո Պոլ Էլուարի Տուն Ֆրանկոֆոնիայի Կենտրոնի դահլիճում ՙՏիեզերք Բենդ՚-ի մշակմամբ հնչեցին Կոմիտասի, հայկական ժողովրդական երգեր, հնչեցին սեփական կոմպոզիցիաներ:
ՙՏիեզերք Բենդ՚-ը պարբերաբար համագործակցում է ՄԻՀՐ ժամանակակից պարի թատրոնի հետ: Ոգեշնչված պարային շարժումներից, թատրոնի ներկայացումների, այլ նախագծերի ժամանակ ներկայացնում են իրենց ստեղծած երաժշտությունը: Դրան ականատես եղանք հուլիսի 3-ին, նույն հարթակում տեղի ունեցած վարպետության դասին: ՄԻՀՐ ժամանակակից թատրոնի գեղարվեստական ղեկավար Ցոլակ Գալստյանն անց էր կացնում ժամանակակից ու ազատ պարի բաց դաս: Դասին մասնակցում էին թե’ պրոֆեսիոնալ պարուհիներ և թե’ պարզապես պարարվեստ սիրող երեխաներ, պատանիներ, երիտասարդներ: Նրանք մեծ սիրով ու պատրաստակամությամբ կատարում էին պարուսույցի` իրենց համար անսովոր առաջադրանքները, հատկապես, որ դրանք ընթանում էին ՙՏիզերք Բենդ՚-ի երաժիշտների նվագակցության ներքո:
Ց. Գալստյանը հավաստիացրեց, որ, հաշվի առնելով մասնակիցների սովորելու պատրաստակամությունը, նման բաց դասեր Ստեփանակերտում կանցկացվեն պարբերաբար, հնարավորինս հաճախ: Կապն Արցախի հետ այսուհետ կլինի ավելի սերտ ու խոր:
Հավելենք` ՄԻՀՐ թատրոնն ու ՙՏիեզերք Բենդ՚ խումբը, ունենալով հոգևոր, գաղափարական սերտ կապեր, հաճախ են միասին մասնակացում Հայաստանում և արտերկրում տեղի ունեցող միջազգային փառատոներին, հանդես գալիս համատեղ նախագծերով աշխարհի տարբեր հարթակներում: