ՇՈՒՇԻԻ ԴՊՐՈՑԱԿԱՆՆԵՐԻՆ ՍՏԵՓԱՆԱԿԵՐՏՈՒՄ ՀԱՄԱԽՄԲՈՂ ԿԱՐՈՏՆ ՈՒ ՀՈՒՅՍԸ
Աննա ՊԵՏՐՈՍՅԱՆ
Շուշիի Խ. Աբովյանի անվան միջնակարգ դպրոցն ամենախոշորն է շրջանի այն դպրոցներից, որոնք ներկայումս իրենց գործունեությունը շարունակում են Արցախի տարբեր կրթօջախների հարկի տակ։
Տնօրեն Լիանա Հարությունյանը մեզ հետ զրույցում ասաց, որ Շուշիի Խ. Աբովյանի անվան միջնակարգ դպրոցը Արցախյան երրորդ պատերազմից հետո վերաբացվեց 2021թ. հունվարի 11-ին՝ Ստեփանակերտի Ա. Ղուլյանի անվան համար 2 հիմնական դպրոցում։
-Պատերազմը սեփական մաշկի վրա զգացած արցախցի երեխաների համար կրթությունը երբեք երկրորդական չդարձավ։ Այդպիսինն են նաև մեր սաները, որոնց հոգին ամուր է, կամքը՝ անկոտրում,-ասաց տնօրենը։
Վերաբացումից հետո, սկզբում դպրոց է հաճախել 147 աշակերտ։ Լ. Հարությունյանը պատմեց, որ, աշակերտները մեծ ոգևորությամբ ընդունեցին հարազատ կրթօջախի վերաբացումը։ Չնայած հարազատ դպրոցի կարոտին ու դասերին, երկրորդ հերթով հաճախելուն, միասին ու համախմբված լինելու հանգամանքը լավատեսություն ու հույս է ներշնչում շուշեցի դպրոցականներին։
Տնօրենի խոսքով, երբ դպրոցը նոր էր վերաբացվել և դասագրքերի զգալի պակաս կար։
-Մեր աշակերտները դասագրքերի էջերը հեռախոսով լուսանկարում էին` դասը տանը սովորելու համար, իսկ ովքեր համակարգչից օգտվելու հնարավորություն ունեին, համացանցում գիրքը գտնում էին, սովորում, որպեսզի միշտ պատրաստ ներկայանան,- ասաց Լ. Հարությունյանը՝ հավելելով, որ 10-12-րդ դասարաններն այս պահի դրությամբ ապահովված են բոլոր դասագրքերով, իսկ միջին օղակում՝ 1-9-րդ դասարաններում, սղություն զգացվում է, բայց ԱՀ կրթության, գիտության, մշակույթի և սպորտի նախարարությունն առաջիկա օրերին կտրամադրի անհրաժեշտ դասագրքերը։
Տնօրենի հաղորդմամբ՝ ներկայումս Ստեփանակերտում գործող Շուշիի Խ. Աբովյանի անվան միջնակարգ դպրոցն ունի 273 աշակերտ, որը կազմում է նախկինի գրեթե 50 տոկոսը։ Շուշիի վերաբացված դպրոցն այժմ կրթօջախ է նաև Շուշիի Դանիել Ղազարյանի անվան և Քարինտակի դպրոցների աշակերտների համար։
-Դպրոցում գործում են 1-12-րդ դասարանները, որոնք համալրված են բոլոր առարկաների մասնագետներով։ Ուսուցիչները հիմնականում Շուշիի դպրոցից են, բացառությամբ ՝ ինֆորմատիկայի ուսուցչուհու, ով Հադրութի շրջանի Ազոխ գյուղից է, և շախմատի մասնագետի, ով Շուշիի Դանիել Ղազարյանի անվան դպրոցից է միացել մեզ,- ասաց տնօրենը՝ ավելացնելով, որ երկրորդ հերթի պայմաններում նախադպրոցական խումբը դեռևս չի կարող գործել։
Մեր զրուցակիցը նշեց, որ Շուշիի Խ. Աբովյանի անվան միջնակարգ դպրոցի աշակերտների ավելի քան 50 տոկոսը ևս Արցախում են, բայց հաճախում են ուրիշ կրթօջախներ, որովհետև նրանց մեծ մասը մասնակցում է արտադպրոցական տարբեր խմբակների, իսկ երկրորդ հերթով կազմակերպվող դասերը խանգարում են։
Լ. Հարությունյանն ընդգծեց, որ, անտեսելով բոլոր դժվարությունները, քայլում են առաջ, որովհետև իրենց ուսերին է դրված պետության համար արժանի սերունդ դաստիարակելու սուրբ գործը։