ԱՐՑԱԽՑԻ ՊԱՏԱՆԻ ԾԱՆՐԱՄԱՐՏԻԿՆԵՐԸ ԿՄԱՍՆԱԿՑԵՆ ՀԱՅԱՍՏԱՆԻ ԱՌԱՋՆՈՒԹՅԱՆԸ
Անի ՄԱՆԳԱՍԱՐՅԱՆ
Արցախցի ծանրամարտիկները պատրաստվում են 2022 թվականի հունվարին Հայաստանում կայանալիք պատանիների առաջնությանը, որին Արցախից կմասնակցի 3 մարզիկ / Էլինա Նազարյան, Րաֆֆի Հովհաննիսյան, Տիգրան Պետրոսյան/։ ՙԱզատ Արցախ՚-ի հետ զրույցում Ծանրամարտի ասոցիացիայի հիմնադիր Արթուր Շիրինյանը նշեց, որ արցախցի մարզիկները պարբերաբար են մասնակցում Հայաստանի պատանիների առաջնությանն ու մարզային առաջնություններին՝ գրավելով մրցանակային տեղեր։
-Հավատում եմ, որ սպասվող առաջնությունից ևս բոլորն էլ մեդալներով կվերադառնան։ Նրանք հստակ նպատակ ունեն. Արցախն աշխարհին ճանաչելի դարձնել նաև օլիմպիական այս սպորտաձևով,-ասաց Արթուր Շիրինյանը՝ անդրադառնալով Հայաստանի առաջնությանը մասնակցելու ակնկալիքներին։
Պատերազմից հետո մարզադպրոցներ են բացվել նաև Ասկերանում և Մարտունու շրջանի Բերդաշեն համայնքում, որտեղ արդեն 4 ամիս է, ինչ ծանրամարտի մարզադպրոցում պարապմունքները վերսկսվել են։
Մասնավորապես` Ստեփանակերտի ծանրամարտի մարզադպրոցն ունի 30 մարզիկ, Բերդաշենը՝ 12, իսկ Ասկերանի մարզադպրոց հաճախում է 10 մարզիկ։ Մեր զրուցակցի հաղորդմամբ՝ ծանրամարտի մարզադպրոցի ընդունելությունը շարունակվում է։ Կարող են դիմել և հաճախել 6 և բարձր տարիքի երեխաներ։
-Կարևորը համարձակությունն ու ինքնավստահությունն է,-ընդգծում է զրուցակիցս։
Մարզադպրոցի սաներից 6-ամյա Յուլյա Շիրինյանը երազում է դառնալ արցախցի առաջին մարզիկը, ով կնվաճի ծանրամարտի աշխարհի չեմպիոնի տիտղոսը։ Իսկ մինչ այդ, նա իր պարապմունքները կշարունակի արդի չափանիշներին համապատասխանող մարզադպրոցում։
ԱՀ կառավարության ֆինանսավորմամբ և Արցախի ծանրամարտի ասոցիացիայի ջանքերով, Ստեփանակերտի համար 7 դպրոցում վերանորոգվում է ծանրամարտի մարզադպրոցը, որը կանվանակոչվի աշխարհի և Եվրոպայի չեմպիոն, օլիմպիական խաղերի փոխչեմպիոն Սիմոն Մարտիրոսյանի պատվին։ Վերանորոգման աշխատանքների ավարտը նախատեսված է մինչև տարեվերջ։
Արցախի ծանրամարտի ասոցիացիան գործում է 2017 թվականի փետրվար ամսից։ Մարզադպրոցի հիմքը դրվեց Ստեփանակերտում, իսկ 2018-ից նաև Շուշիում էին գործում։
- Երազանք էր Հայոց բերդաքաղաքում ծանրամարտի նոր մարզադպրոց ունենալը։ Մարզիկներն անհամբերությամբ էին սպասում նորակառույց մարզադպրոց հաճախելուն։ Ներքին հարդարման աշխատանքներն արդեն ավարտման փուլում էին... Պատերազմի օրերին շուշեցիներին այն ծառայեց որպես ապաստարան,-ասաց ասոցիացիայի նախագահը։