ՙԾանրացող ձյուն՚ գրքից
Նեմրութ
Հիմա ուրիշ մարդիկ են
քայլում ճանապարհին,
անշուք է
ամեն ինչ.
ստվերն անգամ
հայտնվում է
անզգայացած։
Լռությունը
մեկ րոպեանոց
անվերջության է
վերածվել,
ծաղիկը՝
ինչ-որ մեկի ձեռքում
դողացող
մի գունավոր փնջի...
Դիտված
ֆիլմեր են շրջում
կիսադատարկ
դահլիճներում,
փոխվել է հանդիսատեսը,
և տեղն է փոխվել
բեմի ու ծափահարող այն մեկի,
ով միշտ
հրաժարվում է պատմել,
թե ինչ եղավ
ֆիլմի վերջում։
Իսկ վերջում
ամեն ինչ փոխվել է,
ծառերից էլ
տերևներ չեն թափվում,
աշունն այլևս
տարվա եղանակ չէ,
մայթն այլևս փողոց չէ
և ոչինչ,
որ քաղաքն այլևս
մեռնելու տեղ չէ...
Եվ ես էլ ուրիշ մարդկանց պես
սկսել եմ
չլինել,
չզգալ,
ու չապրել։
(ուրիշ մարդիկ նույնն են մի տեսակ)...
***
Աշունը
մխրճվեց ինքն իր մեջ. (ձմռանը ձյունը
կարող է և չտեղալ)
տերևներն այլևս
դեղնած
չեն թափվում...(սևն էլ գույն դարձավ)։
Լուսաբացի
գունատ
հեքիաթից
հեռացել են
մարդիկ։
ծածկեք
փոթորիկները
հողից
ծխացող
շշուկներով.
(Տղերքը
աշնանը
գարուններ են քանդակում)։
***
Վիրավոր
ԱՍՏՎԱԾՆԵՐԻՑ
վախեցեք.
(պատերազմը թատերաբեմ է,
ուր ծափահարող հանդիսատեսը՝
վարագույրի ետևում է միշտ...)։
Ամենականոնավոր
երևույթը
ռազմադաշտում
մահն է. (...հատկապես, երբ չես մեռնում)։
...բայց դուք վախեցեք
վիրավոր
ԱՍՏՎԱԾՆԵՐԻՑ...
(Նրանցից մեկն էլ՝ ապրում է
Ղազանչեցոց վանքում)։
Շուշին
ապրելու համար
հիմա
ավելի շատ
պատճառ ունի։
***
Եվ որքան կուզեք
աղավնիներ
բաց թողեք,
միևնույն է,
խաղաղությունը
բերում են
արծիվները։
***
Հետո
կսկսենք
ավելի խիստ
կարոտել,
և հուշերը
կամաց-կամաց
կվերածվեն
նոր ու չավարտվող
պատերազմի...
(Մենք հողի տակ ծովից ծով հայրենիք ունենք)։
***
...Ու կծնվեն
մանուկներ,
ՀԱՅՐԵՆԻՔԻ
դիմագծերով։
***
...Ես տեսել եմ ինչպես է քաղաքը մրսում,
երբ հողը սկսում է տաքանալ ցավից...
Մենք երկրի մարդ չենք,
մենք էրգրի մարդ ենք։