ԻՏԱԼԱՑԻՆԵՐԻ ԲԱՐԻ ԳՈՐԾԵՐՆ ԱՐՑԱԽՈՒՄ
Սվետլանա ԽԱՉԱՏՐՅԱՆ
Դեռևս երկու տարի առաջ էր քննարկվում Ստեփանակերտի արհեստագործական ուսումնարանը իտալական մոդելով, միջազգային չափորոշիչներին համապատասխան մասնագիտական կրթական հաստատություն վերաձևավորելու հարցը, և բարեգործական կազմակերպությունների միջոցով որոշակի աշխատանքներ կատարվում էին: Մասնավորապես, տարածքում կառուցվել էր կից շինություն` կարի արտադրության համար, արդեն ստացվել էին համապատասխան սարքավորումները, նյութերը, ԱՀ կրթության, գիտության, մշակույթի և սպորտի նախարարության կողմից համապատասխան աշխատանքներ էին տարվում հանրակրթական դպրոցներում աշակերտներին ուղղորդելու, մասնագիտությունների մասին իրազեկվելու համար, սպասվում էր իտալացի վարպետների ժամանումը: Սակայն սկզբում Covid-ը, ապա պատերազմը խափանեցին այս ծրագրի իրագործումը: Այն դանդաղեց, սակայն կանգ չառավ: Ընդհակառակը, կյանքի կոչվեց ավելի մեծ պլանով:
Եվ այսօր Ստեփանակերտում ունենք իր տեսակով նոր կրթական հաստատություն` ՙԱնտոնիա Արսլան հայ-իտալական կրթահամալիր՚ հիմնադրամ: Իրավաբանորեն այն Ստեփանակերտում գրանցվել է 2021թ. հունիսի 15-ին: Ունի հինգ համահիմնադիր` ԱՀ կառավարություն` ի դեմս ԱՀ ԿԳՄՍՆ-ի, Արցախում գործող Սի Այ էն էՖ Արցախ և ԱՄՆ-ում գործող ՙՔրիստոնյաները` կարիքի մեջ՚ բարեգործական հիմնադրամներ, իտալահայ անվանի գրող, պրոֆեսոր Անտոնիա Արսլան և ԱՄՆ-ից` քրիստոնեության փիլիսոփայության պրոֆեսոր Շվոն Նաշ-Մարշալ: ԱՀ կառավարության որոշմամբ` կրթահամալիրը ստեղծվել է հ. 4 դպրոցի և Ստեփանակերտի արհեստագործական ուսումնարանի հիմքի վրա: Նշված ուսումնական հաստատությունների սովորողները և ուսուցիչները տեղափոխվել են կրթահամալիր: Հիմնադիրների որոշմամբ` կրթահամալիրի գլխավոր տնօրեն է նշանակվել ՙՍի Այ էն էՖ Արցախ՚ կազմակերպության ղեկավար, իրավաբան-մանկավարժ Տաթև Զաքարյանը, ով ղեկավարում է ընդգրկված կրթական երեք օղակները` նախադպրոցական, հանրակրթական և մասնագիտական /արհեստագործական/: Ինչպես մեզ հետ զրույցում ասաց գլխավոր տնօրենը` կրթահամալիրի կանոնադրության մեջ ներառել են նրա ընդարձակման հնարավորությունները` նախադպրոցական խմբերից մինչև ավագ դպրոց և բարձրագույն ուսումնական հաստատություն:
Ուշագրավ է իտալացի վարպետների այցը:
Իտալացի վարպետները, ովքեր այստեղ են հոկտեմբերի 1-ից, երեքն են` փայտագործ և երկու դերձակ:
ՙՈ՜չ հոգնում են, ո՜չ բողոքում են, ասում են` մենք եկել ենք, որ աշխատենք: Մեր հիմնադիրների և իտալացիների, ինչպես նաև մեր նշանաբանը` միանգամից բարձր որակի վրա աշխատելն է՚,-դեպի կից շինություն` արհեստանոցներ, գնալու ճանապարհին պատմում էր տնօրենը: Երբ առաջին օրը մտել ենք արհեստանոց, շարունակում է Տ. Զաքարյանը, իտալացիները տեսնելով, որ պատերազմի հետևանքով այստեղ բավականին վնասներ են եղել և դեռ չեն հասցրել վերանորոգել, մտածում են` ինչից սկսեն, Ջիլոլան առաջին իսկ րոպեից իր ասեղով գործի էր անցել. կարում էր մանեկենի պոկված հատվածը:
Պատմեց, որ նրանք Ստեփանակերտում էլ շարունակում են խանութներից գնել որոշ նյութեր, երբ տեսնում են, որ ինչ-որ բան պակասում է. խոզանակ, մկրատ և այլն, ոչ մի րոպե պարապ չեն մնում, ինչքան էլ հոգնած լինեն:
Ահա և կարի արհեստանոցը: Մի խումբ կանայք լսում էին վարպետին: Տնօրենն ասաց, որ կարի արտադրության տեխնոլոգիայի բաժնում մեկի փոխարեն ստիպված են եղել երկու խումբ բացել, նաև` մեծերի համար: Նրանք մայրիկներ են` տնտեսագիտություն, իրավագիտություն, ռուսաց լեզու և գրականություն, այլ մասնագիտություններ ավարտած, եկել են սովորելու կարի արտադրության տեխնոլոգիայի բաժնում: Ի՞նչն է նրանց բերել այստեղ. պատասխանեցին` պատերազմը ցույց տվեց, որ օրվա ապրուստ վաստակելու համար անպայման պետք է մի արհեստի տիրապետել:
Իտալացի մյուս վարպետն ասեղով կար էր անում: Կախարանի վրա պատրաստի հագուստներ էին, տնօրենն ասաց, որ փայտագործներն են սարքել: Իսկ իտալական թանկարժեք կտորներից հագուստները ձեռքի աշխատանք են՝ մեքենակար: Որոշ ժամանակ անց ցուցահանդես կունենան, դրանից հետո կընդլայնեն արտադրությունն արդեն վաճառքի համար: Մարդիկ կարող են նաև պատվիրել հագուստներ: Վարպետներից մի քանի թանկ րոպեներ խլեցի` խնդրելով պատասխանել ի՞նչն է նրանց բերել Արցախ, ի՞նչ տպավորություններ ունեն:
Վիսմարա ԱՄԲՐՈՋԻՆԱ
-Միլանում աշխատում եմ նորաձևության տանը: Այն գտնվում է Վիասեկա փողոցի վրա, որը շատ հայտնի է Իտալիայում: Անտոնիա Արսլանը և Շվոն Մարշալը հրավիրել են ամուսնուս Արցախ: 2019թ. նա ընկերոջ հետ այցելել է Արցախ, ու ծնվել է համագործակցելու գաղափարը: Բայց Covid-ը հետաձգեց: Շվոնն ինձ էր վստահել Արցախի երեխաներին սովորեցնելու պատասխանատվությունը: Ես բացահայտեցի, որ հայ ժողովրդի հետ ունեմ շատ մեծ ընդհանրություն: Ես տեսնում եմ, որ այստեղ կանայք, աղջիկները շատ մեծ ցանկություն ունեն սովորելու ու շատ հետաքրքրված են: Ժամանակ է պետք, որպեսզի նրանք սովորեն, կարևորը ցանկությունն ու ձգտումն է, որ նրանք ունեն:
Ինձ ու Ջիլիոլայի /մյուս դերձակուհին է/ համար էլ սա մեծ հնարավորություն է, որ իրար հետ ծանոթանայինք: Մենք Իտալիայի տարբեր քաղաքներից ենք եկել` նույն կազմակերպության միջոցով:
Իզոտոն ՋԻԼԻՈԼԱ.
-Երկու տարի սպասել եմ, որ գամ այստեղ: 2019թ. իմ գործընկերուհու հետ սկսել ենք այս նախագիծը: Մենք սինյոր Արմանդոյի միջոցով այս սարքավորումներն ուղարկել էինք: Փայտամշակման նյութերը նա է ձեռք բերել, ես` կարի մեքենաները, նյութերը, կտորեղենը, ինչ անհրաժեշտ է ատելյեի գործունեության մեկնարկի համար: Ես ունեի իմ ֆիրման, 40 տարի շարունակ աշխատել եմ, հիմա թոշակառու եմ և գործարարությամբ եմ զբաղվում: Նաև կարում էի հարսանեկան զգեստներ, որոնց արժեքը շատ բարձր է, հատուկ մարդիկ էին պատվիրում: Անցյալ սեպտեմբերին էի պատրաստվում գալ, բայց այստեղ պատերազմ սկսվեց: Իմ գործընկերը, ով նույնպես ուղարկել է այս նյութերը, ինձ հետ պիտի գար, սակայն առողջական խնդիրների պատճառով չկարողացավ: Իսկ ես այսօր այստեղ եմ և շատ երջանիկ եմ դրա համար:
Սանդիտո ՋԱՆԱՆՏՈՆԻՈ.
- Իտալիայում ես հիմնադիրն եմ նման արհեստագործական դպրոցի: Մենք տարվա մեջ ունենք վերհիշելու օրեր` Հայոց ցեղասպանությունը և հրեաների ցեղասպանությունը: Այդ միջոցառումներից մեկին հրավիրել էինք Անտոնիա Արսլանին: Տեսնելով մեր դպրոցը, որը նաև հյուրանոցային համալիր է, ցանկացավ ծանոթանալ ինձ հետ: Նա մեզ հրավիրեց Արցախ: 2019թ. ընկերոջս և Անտոնիայի հետ եկել ենք: Եվ այդ ժամանակ արդեն իսկ մտածել էինք օգնել, այստեղ մի դպրոց բացել, որը կլինի հայ-իտալական: Մեզ հետ Բելունո նահանգից ուրիշ մարդիկ էլ էին եկել, այդ թվում` սինյոր Արմանդոն, ով ունի փայտամշակման արտադրամաս: Եվ այսպես մեր նպատակները համընկել էին. ես եկել էի խոհարարական, իսկ նա փայտամշական դպրոցի համար: Արմանդոն քրոջից ժառանգություն էր ստացել 20 հազար եվրո, որին ավելացրել էր իր գումարից 10 հազար ու գնել այս մեքենաները, սարքավորումները և ուղարկել այստեղ: Ցավոք, նա մահացել է: Հիմա ես այստեղ եմ, որ շարունակեմ ընկերոջս գործը: Ուզում եմ 2 ուսանողի և խոհարար-վարպետին 4 ամսով ինձ հետ տանել Իտալիա, որպեսզի մեր ռեստորանային համալիրի դպրոցում փորձուսուցում անցնեն: Մեր ուսանողները դասի ժամանակ պատրաստում են ուտեստներ և իրենք էլ մատուցում ռեստորանում, որից օգտվում են ինչպես սովորողները, այնպես էլ հանրությունը: Տաթևի հետ նպատակ ունենք այստեղ էլ բացել մի փոքր ռեստորան: Փայտագործության մասով Իտալիայում ես աշխատում եմ ամենահայտնի դիզայներների, ճարտարապետների հետ: Նրանց փորձը կբերենք այստեղ, ինչու չէ` այստեղից էլ նախշեր կտանենք: Տարվա մեջ մի քանի անգամ ցուցահանդեսներ կլինեն:
Մեր զրույցի վերջում չէի կարող իտալացի վարպետներին, հատկապես կանանց, այս հարցը չտալ` իմանալով, որ Արցախը վտանգավոր գոտի է, ի՞նչ զգացումով է եկել:
Վիսմարա Ամբրոջինան, ի դեպ նա Սանդիտո Ջանանտոնիոյի կինն է, պատասխանեց. ՙԵթե կարևոր գործ ես անում, միշտ էլ պետք է ռիսկի դիմես: Եթե միշտ մտածենք, որ բարին ավելին է, քան չարը, ուրեմն հաղթելու է բարին: Միշտ այս հույսը պետք է ունենալ: Շվոն Նաշ-Մարշալն ասում էր, որ մեր գալը մեծ հույս է արցախցիների համար՚: