ԹԱՏՐՈՆԸ ՀՅՈՒՐԱԽԱՂԵՐԻ ՆԱԽԱՇԵՄԻՆ
Ստեփանակերտի Վ. Փափազյանի անվան պետական դրամատիկական թատրոնը նոյեմբերի 17-ին վերադարձել է արձակուրդից և անմիջապես ներգրավվել ստեղծագործական աշխատանքի մեջ։ Սկսվել է 90-րդ թատերաշրջանը, որը թատրոնի համար հոբելյանական է լինելու։
Տնօրեն Արմեն Հարությունյանի հետ զրույցից տեղեկացանք, որ թատերաշրջանի բացման առաջին իսկ օրից թատրոնում սկսվել են նախապատրաստական աշխատանքները Հայաստանում հյուրախաղերով հանդես գալու համար։ Հյուրախաղերի են տանելու մեկ ներկայացում՝ ՙՀրեշը լուսնի վրա, որի բեմադրող ռեժիսորն է Վահան Խաչատրյանը, պիեսի հեղինակը՝ Ռիչարդ Կալինոսկին։
Հյուրախաղերը Հայաստանի Հանրապետության մայրաքաղաք Երևանում կտևեն 3 օր՝ նոյեմբերի 30-ին, դեկտեմբերի 1-ին և 2-ին, պատանի հանդիսատեսի թատրոնում։
Մեր այն հարցին, թե քովիդը արդյոք չի խանգարի հյուրախաղերին, տնօրենը պատասխանեց, որ խստորեն կպահպանվեն անվտանգային կանոնները. ՙՄենք մշտական կապի մեջ ենք պատանի հանդիսատեսի թատրոնի և Երևանի քաղաքապետարանի մշակույթի բաժնի ղեկավարության հետ, տեղյակ ենք, որ ներկայացումներ մշտապես ցուցադրվում են՚,-ասաց տնօրենը։
Արմեն Հարությունյանը տեղեկացրեց նաև, որ եթե մինչև տարվա վերջ խիստ սահմանափակումներ չլինեն, Ստեփանակերտի մշակույթի և երիտասարդության պալատում մանուկ հանդիսատեսների համար կցուցադրվի ՙԱլվան ծաղիկ՚ ներկայացումը (բեմադրիչ ժողովրդական արտիստ Քաջիկ Հարությունյան)։ Ի դեպ, ներկայացումը, որը բեմադրվել է 44-օրյա պատերազմից անմիջապես հետո, շատ լավ արձագանք է գտել և փոքրիկների, և տարբեր տարիքի հանդիսատեսների կողմից։
Այս տարվա նոյեմբեր-դեկտեմբերին թատրոնն սկսելու է աշխատանքները նոր բեմադրությունների վրա՝ ՙՄատնաչափիկը՚ (մանկական), ՙԱնմահների գիրքը՚ (նվիրված ապրիլյան քառօրյա պատերազմի նահատակ հերոսներին)։
Հաջորդ տարվա նախնական ծրագրերը ևս ուրվագծված են, բայց այդ մասին՝ ավելի ուշ։
Ոչ պաշտոնական աղբյուրներից տեղեկացանք, որ Ամերիկայի Միացյալ Նահանգներում բնակվող, ՙԵրկնքից երեք խնձոր ընկավ՚ ներկայացման բեմադրիչ-ռեժիսոր Կարինե Քոչարյանն աշխատանք է տանում` կազմակերպելու Ստեփանակերտի թատրոնի հյուրախաղերը Ռուսաստանի Դաշնությունում գալիք տարում։