[ARM]     [RUS]     [ENG]

Միջազգային գիտաժողով՝ Արցախում

Ստեփանակերտում   2022թ. հոկտեմբերի 29-ին  նախատեսվում է  «Գիտության և կրթության դերը պետության զարգացման գործում» խորագրով միջազգային գիտաժողով, որը կազմակերպում է Մեսրոպ Մաշտոց Համալսարանը։

Բուհի  գործունեության  25-ամյակին նվիրված գիտաժողովին կարող են մասնակցել Արցախի, ՀՀ և արտասահմանյան բուհերի ու գիտահետազոտական կենտրոնների գիտաշխատողներ, ասպիրանտներ, հայցորդներ, դասախոսներ, գիտությունների թեկնածուներ ու դոկտորներ: Ոլորտներն  են՝ պատմություն, իրավագիտություն, քաղաքագիտություն և միջազգային հարաբերություններ, արևելագիտություն, տնտեսագիտություն, մանկավարժություն, սոցիոլոգիա, հոգեբանություն, բանասիրություն, լրագրություն և այլն։

ՄՄՀ Կովկասագիտության կենտրոնի ղեկավար Հովիկ Ավանեսովը մեզ հետ զրույցում նշեց, որ յուրաքանչյուր  մասնագետ կարող է ներկայացնել  հետազոտություն՝  բացահայտելով ոլորտի ազդեցությունը կրթության և գիտության զարգացման գործում: 

«Կրթությունն ու գիտությունը պետության զարգացման հիմնական խթանիչ ուժն են:  Առանց դրանց հնարավոր չէ կայուն զարգացում ու անվտանգություն ապահովել:  Թեման արդիական է, քանզի,  հատկապես հետպատերազմյան երկրներում, ճգնաժամային իրավիճակներից դուրս գալը և  պատերազմի հետևանքները չեզոքացնելը հնարավոր է միայն կրթության ու գիտության  զարգազման միջոցով»,-ասաց Հ. Ավանեսովը:

Գիտաժողովը մասնակիցների համար բավականին լայն հարթակ կլինի փորձի փոխանակման համար: 

Գիտաժողովի աշխատանքային լեզուներն են՝ հայերեն, ռուսերեն, անգլերեն: Այն անցկացվելու է առկա ձևաչափով:  Հեռակա մասնակիցների   համար  նախատեսվում է  հեռավար միացում (տեխնիկական խնդիրներից խուսափելու համար կազմակերպիչները խնդրում են ուղարկել նաև զեկույցի տեսաձայնագրությունը): 

 

Աննա Ալեքսանյան