«ԲԱՐԻ ԳԱԼՈՒՍՏ ՏՈՒՆ»
Այսօր՝ հունիսի 13-ին Ստեփանակերտի Սուրբ Աստվածամոր Հովանու Մայր եկեղեցում տեղի ունեցավ հոգևոր համերգ՝ «Հայաստանի փոքրիկ երգիչներ» երգչախմբի մասնակցությամբ:
«Բարի գալուստ տուն»՝ այս խոսքերով է դիմավորել «Հայաստանի փոքրիկ երգիչներ» երգչախմբին ՀԱԵ Արցախի թեմի առաջնորդ Վրթանես եպիսկոպոս Աբրահամյանը: Համերգի բացման իր խոսքում թեմի հոգևոր առաջնորդը, բարձր գնահատելով երգչախմբի գեղարվերսական ղեկավար, մաեստրո Տիգրան Հեքեքյանի աշխատանքը, կարևորեց հատկապես միասնականության և հավաքական աշխատանքի ուժը գործադրելու նրա ունակությունը:
Սրբազան Հայրը երգչախմբին նվիրեց շնորհակալական գիր՝ նրանց կատարած մեծ աշխատանքի և այն տեսլականի համար, որ շատ շուտով այս խումբը կկատարի Արցախի հաղթանակի երգը:
Տիգրան Հեքեքյանն իր խոսքում ասաց, որ իրենց բոլոր համերգները շաղախված են հոգևոր երաժշտությամբ, և որ ուրախ է այս անգամ հանդես գալ Արցախի՝ հոգևոր կյանքով ապրող հանդիսատեսի առջև: «Երեխաների շուրթերով բարձրացված աղոթքներին ի պատասխան ցանկանում եմ, որ լույսերի մեջ հայտնվեն մեր հերոս նահատակ տղաների ու աղջիկների հոգիները»,-ասաց երգչախմբի գեղարվեստական ղեկավարը: Նա տեղեկացրեց, որ երեկ Գանձասարում երգեցողությամբ մասնակցել են սբ Պատարագին, իսկ այսօր, շեղվելով ծրագրից, եղել՝ Ամարասում: «Դա արվում է, որպեսզի երեխաները լցվեն հոգով, զգան, որ Հայաստանի արմատները գտնվում են Արցախում: Եվ շատ ուրախացա, որ երեկ Սրբազան Հայրը, ողջունելով երեխաներին, ասաց՝ բարով եք եկել տուն: Այո, իսկապես, Արցախը բոլոր հայերիս տունն է»,-եզրափակեց մաեստրոն:
Մեկ ժամ տևողությամբ հոգևոր համերգը անտարբեր չթողեց ներկաներին: Ինչպես վերջում նշեց Արցախի թեմի առաջնորդը՝ համերգը խաղաղությամբ լցրեց ներկաների սրտերը:
Համերգներին մասնակցել են Սյունիքի ու Արցախի 17 երգչախմբեր և «Հայաստանի փոքրիկ երգիչներ» երգչախումբը:
Սոֆի ԲԱԲԱՅԱՆ