ՎՍՏԱՀ ԵՄ՝ ՎԱՂՎԱ ԼՈՒՅՍԸ ՉԻ ՈՒՇԱՆԱ...
«Ճեպընթացի» իմ ուղեկիցը բանաստեղծ, արձակագիր Դավիթ ՄԻՔԱՅԵԼՅԱՆՆ է
- Եկա…
- … Եկա, որ հորս հորդորներին ունկնդիր՝ շիտակ անցնեմ ճամփաս: Պապենական այգու տարեց թթենու ճյուղերին մանկությանս հուշերը նորոգեմ, շենացնեմ հայրական օջախը: Եկել եմ, որ մնամ…
- Ամեն առավոտ…
- Լույսը դեռ չծագած փորձում եմ շոշափել օրվա խորհուրդը: Բոլոր արցախցիների պես մտահոգ՝ բացում եմ հոգուս պատուհանները, որ կարողանամ լիաթոք շնչել երկրիս օդը: Համոզված լինել, որ սատանան այն չի աղտոտել ու մանուկները դեռ մուշ-մո՜ւշ քնած են: Փառք տամ Աստծուն, որ պայթյուններ չեն հնչում և սահմաններում «հանգիստ է»…
- Միտքս…
- Այն դեպի երկինք է թռչում՝ երազիս թևով ու այնտեղ ճերմակ աղավնիներ եմ փնտրում…
- Վայրկյանը հնարավորություն է…
- Հուսահատությանս պահին վայրկյանը հնարավորություն է տալիս մղձավանջներից սթափվել և համարձակ վճիռներ կայացնել՝ ունկերիս մեջ ունենալով երջանկահիշատակ ծնողներիս իմաստուն խորհուրդները…
- Երևակայությունը կարող է…
- Մարդն առանց երևակայության աշխարհի ո՞նց կապրի: Ինչպե՞ս կարող է նա գոյատևել, արարել, պայքարել իր նպատակների և գաղափարների համար: Էլ չեմ խոսում ստեղծագործական երևակայության մասին, որի սահմաններն այնքան ընդգրկուն են և անսպառ: Ճակատագրական պահերին անգամ պայծառ երևակայությունը կարող է կործանումից փրկել մարդուն և լուսավոր պատուհաններ բացել նրա առաջ…
- Ամենակարևոր արժանիքը…
-Արժանիքներ շատ կարող է ունենալ մարդը: Սակայն մեր ժամանակներում, երբ անորոշության շղարշով է պատված Հայաստանի, Արցախ աշխարհի ճակատագիրը, պարտավոր ենք ազնիվ լինել…
- Խղճի դուռը…
- Եթե վայրկյան անգամ այն փակեցիր՝ անեծքից, նզովքից բացի ոչինչ չես կարող վաստակել: Խղճի դուռն է, որ անաղարտ է պահում, մաքրագործում մարդկային հոգին: Հետևաբար՝ խղճի դուռը մշտապես բաց պիտի պահել…
-Մարդու ներուժը…
-Այն օրից, երբ լույս աշխարհ է եկել մարդը, Աստված նրան օժտել է զանազան շնորհներով, դժվարություններին և փորձություններին դիմակայելու ուժ հաղորդել: Բազմիցս ենք համոզվել այն ճշմարտության մեջ, որ միասնական, համերաշխ լինելու պարագայում, երբ մարդու ներուժն օգտագործվում է ի շահ ընտանիքի, հայրենիքի շենացման և զորացման, ցանկացած երազանք իրականություն է դառնում: Այսօր մենք այդ խնդրի իրագործման մեկնարկը կարծես թե ուշացնում ենք…
- ժամանակի հետ…
- Հաճախ ենք սովոր այսպիսի խոսք լսել. «Կյանքից հետ չմնալու համար քայլել է պետք ժամանակի հետ»… Որքան էլ որ քմահաճ լինենք՝ չենք կարող չհամաձայնել: Ցավոք, առօրյա կյանքում այնպիսի տխուր երևույթների և օտարածին բարքերի ենք առնչվում, որ ափսոսում ենք զուր վատնած ժամանակի, վայրկյանների համար: Հատկապես շատ եմ տխրում, երբ մտերիմ, հարազատ անձնավորություն է կոխկրտում այնքան թանկ գին ունեցող մեր ժամանակը…
- Միայն այն պատճառով…
- Միայն այն բանի համար, որ հազարավոր հայորդիներ իրենց արյունն են տվել մայր հողին, վիրավոր Արցախս պիտի բուժի վերքերը, գոտեպնդվի և հավերժի, պարտավոր ենք ապրել ու մաքառել, լույսիշող որոնել՝ խավարը ցրելու և միաբանվելու, 88-ի պայքարն ավարտին հասցնելու համար:
- Վաղվա լույսը…
- Վստահ եմ, վաղվա լույսը չի ուշանա… Տարիներ առաջ մի բանաստեղծություն էի գրել՝ «Թե իմանայի»… վերնագրով:
Թիթեռն այս,
Որ մի օր էլ չապրեց թիթեռավարի,
Այսօր մահացավ իմ սեղանին,
Գրքերիս վրա…
Մինչդեռ երեկ
Նա մինչև ուշ գիշեր
Անհոգ խաղում էր լուսամփոփիս հետ,
թռչկոտում ուրախ:
Սիրտն իմ թնդում էր նրա ջերմությունից
(Ես մենակ չէի):
Ինչո՞ւ, ինչո՞ւ մարեցի
Լուսամփոփն իմ սեղանի:
… Թե իմանայի
թիթեռն իմ ծարավ է լույսի,
Լուսամփոփս
Ողջ գիշեր անմար կպահեի,
Արթուն կմնայի մինչև լուսաբաց,
Թե իմանայի…
Լույսով ծնվում ենք, լույսով սնվում, լույսով մահանում: Օ՜ պաշտում եմ լույսը, մարդիկ…
Անի ՄԱՆԳԱՍԱՐՅԱՆ