ՀԱՋՈՂՈՒԹՅՈՒՆՆԵՐԸ՝ ԹՎԵՐՈՎ ԵՎ ՓԱՍՏԵՐՈՎ

ԼՂՀ կառավարությանն առընթեր  սպորտի  պետական կոմիտեի սպորտի  զարգացման և մարզական  հերթափոխի համակարգման  բաժնի վարիչ Լևոն  Գասպարյանի տեղեկատվությամբ`  առաջնթացն աներկբա է։ 

Տարվա  լավագույն  ձեռքբերում  կարելի է  համարել  սպորտի  վաստակավոր  վարպետ  Աշոտ Դանիելյանի` սամբոյի աշխարհի  առաջնությունում չեմպիոնի  կոչմանն արժանանալը։ 

Իր օգտին բազմաթիվ խոստումնալից  ցուցանիշներ է գրանցել  միջազգային  կարգի սպորտի  վարպետ  Մավրիկ Նասիբյանը։ Վերջինս սամբոյի գծով ՀՀ  առաջնությունում գրավել է առաջին տեղը, իսկ  աշխարհի  գավաթի մրցումներում ստացել Ղազախստանի նախագահի  մրցանակը  (Ղազախստան, ք. Ուրալսկ, 3-րդ տեղ)։ Սակայն սրանով  չեն ավարտվում  Մ. Նասիբյանի  մարզական հաջողությունները. մասնավորապես, նա Ա. Խարլամպիևի հիշատակին  նվիրված՝ աշխարհի գավաթի փուլում  (ՌԴ, ք.Մոսկվա)  զբաղեցրել է 2-րդ տեղը, իսկ Ա. Աստախովի հիշատակին նվիրված՝ աշխարհի գավաթի  խաղարկությունում  (Վենեսուելա, ք. Մարակայբո)` 1-ին տեղը։ Եվրոպայի  և աշխարհի  առաջնություններում, որոնք  համապատասխանաբար  անց են կացվել  Իտալիայի  Կրեմա  և ՌԴ Սանկտ Պետերբուրգ քաղաքներում, Մ. Նասիբյանը  մրցանակային  3-րդ հորիզոնականում էր։ 

ՀՀ սպորտի վարպետ Սոսե Բալասանյանը  ՀՀ սամբոյի կանանց  առաջնությունում  (ք. Երևան) 1-ին, իսկ ՀՀ ձյուդոյի  առաջնությունում 2-րդ  տեղերում էր։ Ս. Բալասանյանը Եվրոպայի ու աշխարհի առաջնություններից վերադարձել է  մրցանակային  3-րդ հարթակը գրաված։ 

Սամբիստներ Դավիթ Գրիգորյանը և Մարտին Միրզոյանը նույնպես  հաջողություններով են  եզրափակել տարին` զբաղեցնելով  մրցանակային 1-ին, 2-րդ և  3-րդ տեղերը։ Նրանցից հետ չեն  մնում Էռնեստ Հայրապետյանը, Հայկ Հայրիյանը, Գևորգ Յակուբյանը, Արմեն Ադամյանը, Մուշեղ Հովսեփյանը, Մարատ Գրիգորյանը, Տիգրան Համբարձումյանը։ 

Ձյուդոիստ Լաուրա Հայրապետյանը ՀՀ սամբոյի կանանց առաջնությունից վերադարձել է հաղթանակով (1-ին տեղ)։ Մրցանակային 1-ին տեղերում էին նաև Գենադի Առուստամյանն ու Հայկ  Խաչատրյանը՝ թաեքվոնդոյի ՀՀ առաջնությունում։ 

Մարզական  հաջողություններն այսքանով  չեն ավարտվում։ Հաջողության են հասել  և  մրցանակներով տուն վերադարձել սանդա ուշու, թայ-քիք բոքսինգ,  պաուերլիֆտինգ մարզաձևերը ներկայացնող  արցախցի մարզիկները։ 

Մարզասերներին ուրախանալու առիթներ է պարգևել բասկետբոլի  տղամարդկանց հավաքականը՝ ՀՀ առաջնությունում 1-ին տեղի գրավմամբ (ի դեպ, այն երրորդ տարին է, ինչ անընդմեջ արժանանում է  առաջին պատվավոր  տեղին), իսկ վոլեյբոլի տղամարդկանց  և կանանց  հավաքականները  ՀՀ առաջնությունում բավարարվել են, համապատասխանաբար,  2-րդ և 3-րդ տեղերով։ 

 

Սիրվարդ ՄԱՐԳԱՐՅԱՆ