Logo
Print this page

ԷԿՈԼՈԳԻԱԿԱՆ ՀԻՄՆԱԽՆԴԻՆԵՐԻՆ ՓՈՐՁՈՒՄ ԵՆ ԼՈՒԾՈՒՄ ՏԱԼ ՆԱԵՎ ՈՒՍՈՒՄՆԱԿԱՆ ԾՐԱԳՐԵՐՈՎ

   Երևանի ՙՄխիթար Սեբաստացի՚ կրթահամալիրի մի խումբ աշակերտներ իրենց  ուսուցիչների հետ,  ուսումնական նախագծեր իրականացնելու նպատակով, չորսօրյա այցով հերթական անգամ Արցախում են։ Ի դեպ, այս կրթահամալիրն իրականացնում է նաև  կրթական այլընտրանքային, հեղինակային  ծրագրեր, ակումբային աշխատանքներ, որոնցից է էկոտուրը: 
Մայրաքաղաքի հ. 3 միջնակարգ դպրոցի դահլիճում տեղի ունեցած հավաքույթին ներկա էին  ԼՂՀ կրթության  և գիտության փոխնախարար Միքայել Համբարձումյանը, Ստեփանակերտի քաղաքապետարանի կրթության բաժնի վարիչ Կառլեն Մարգարյանը, քաղաքի դպրոցների ներկայացուցիչներ: 
 Էկոտուր նախագծի ղեկավար Մարթա Ասատրյանն ասաց, որ խումբը,  որում  ընդգրկված են նաև վրացախոսների ակումբի անդամները, բազմաթիվ նախագծեր է իրականացրել Հայաստանում և Վրաստանում: Արցախ պետք է այցելեին նաև Թբիլիսիից երեխաներ,  բայց ինչ-ինչ պատճառներով չկարողացան մասնակցել: Նրա խոսքով` Արցախ գալու  հիմնական նպտակն է   տեղի դպրոցականներին   ծանոթացնել էկոտուր միջազգային ստուգատեսին, ցույց տալ այն նախագծերը, որոնք նախորդ տարի ճանաչվել են լավագույնը։ Էկոլոգիական նախագծերն առօրյայում մեծ տարածում ունեն, և սովորողների միջոցով այդ խնդիրներին լուծում տալը ճիշտ միջոց է:
Նշենք, որ անցած ուսումնական տարում Ստեփանակերտի դպրոցների աշակերտներից կազմված թիմը փորձնական կարգով մասնակցել է ստուգատեսին և լավ արդյունք ցույց տվել ու  շահել ՀՀ Նոյեմբերյանի շրջանի ՙԶիկատար՚ բնապահպանական կենտրոնի համանուն միջազգային ճամբարի ուղեգիր:  
Էկոտուրի  աջակիցներ են ՀՀ կրթության և գիտության  և բնապահպանության նախարարությունները: Նպատակն է  հասարակության ուշադրությունն  ուղղել էկոլոգիական խնդիրներին և որոշակի լուծում տալ դրանց  ուսումնական նախագծերով: 
Հանդիպման ժամանակ տեսանյութով ներկայացվեց  Արցախի թիմի աշխատանքը: Էկոլոգիական կարևորագույն խնդիրներից է շրջակա միջավայրի աղտոտումը: Աշխարհում տարեկան մոտ 2 մլն մարդ մահանում է քաղաքային տարաբնույթ  աղտոտումներից: Արցախը նույնպես ունի այդ հիմնախնդիրը: Երեխաները ներկայացրել էին Կարկառ գետի էկոլոգիական խնդիրները` կատարելով  հետազոտություններ, անցկացնելով հարցազրույցներ: 
Հանդիպման ժամանակ ցուցադրվեցին նաև այլ աշխատանքներ, որոնցից էր 
 թափոնների վերամշակման մասին տեսանյութը: Ցուցադրվեց, թե ինչպես այդ թափոններից  կարելի է խաղալիքներ պատրաստել: Մեկ ուրիշ աշխատանք  լճի վրա կառուցվող հէկ¬ի կապակցությամբ դպրոցականների հետազոտությունների մասին էր, թե ինչպես է այն ազդում շրջակա միջավայրի վրա:  
Մ. Ասատրյանը ներկայացրեց նաև ՙՄխիթար Սեբաստացի՚ կրթահամալիրի տնօրեն Ա. Բլեյանի ուղերձ-առաջարկը: Այս տարի լրանում է  կրթահամալիրի 25-ամյակը: Նոյեմբերի կեսերին տոնական օրեր են սպասվում այնտեղ: Նշվեց, թե ժամանակացույցով  ինչ միջոցառումներ են  լինելու`  վարպետության դասեր, մի շարք նորամուտներ, նոր ծրագրեր, ցուցահանդեսներ: Արցախցիներին հրավիրվեց  մասնակցելու այդ միջոցառումներին: 
Էկոտուրի նախագծերի առաջարկն արդեն արված է: Յուրաքանչյուր թիմում պետք է  ընդգրկվեն 4 կամ 5 աշակերտ և մեկ ղեկավար: Հայտերը պետք է ներկայացվեն  ապրիլի 1-12-ը,  քննարկումները կարող են լինել նաև առցանց, որից հետո, հանձնաժողովի կողմից թիմերը ստանում են հրավեր երևանյան էկոտուրի հավաքին մասնակցելու համար, որը լինելու է ապրիլի 23-ին:
 Հանձնաժողովում լինում են  նաև Բնապահպանության նախարարության ներկայացուցիչները: Մրցանակը կարող է լինել ճամբարային ուղեգիր, դրամական պարգև: 
ԼՂՀ ԿԳ փոխնախարար Մ. Համբարձումյանը և կրթության բաժնի վարիչ Կ. Մարգարյանը, ողջունելով նախագիծը, արցախցի դպրոցականներին կոչ արեցին մասնակցել ակտիվորեն: 
 Էկոտուրն ունի նաև հայրենագիտական և ճանաչողական նշանակություն:  Ակումբի անդամները շրջել են ամբողջ Հայաստանով մեկ, նույնն անում են նաև Արցախում, փորձում են ճանաչել հայրենիքը, վեր հանել նրա արժեքները: Նրանք հյուրընկալվել են  արցախցի իրենց հասակակիցների տներում, մոտիկից ճանաչում են նրանց  կենցաղը:   
 
Սվետլանա ԽԱՉԱՏՐՅԱՆ
Կայք էջից օգտվելու դեպքում ակտիվ հղումը պարտադիրէ © ARTSAKH TERT. Հեղինակային իրավունքները պաշտպանված են.